Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 169

ہیر وارث شاہ: بند 169

June 21st, 2011

چوچک سیال تھوں لکھ کے نال چوری ہیر سیال نے کہی تبیت ہے نی
ساڈی خیر تساڈڑی خیر چاہاں چٹھی خط دے لکھن دی رِیت ہے نی
ہو رانجھے دی گل جو لکھیا جے ایہا بات میری انانیت ہے نی
رکھاں چا مُصحف قرآن اُسنوں قسم کھائی کے وِچ مسیت ہے نی
تُسیں مگر کیوں ایس دے اُٹھ پیاں ایہدی اساں دے نال پریت ہے نی
اسیں تِرنجناں وچ بہنیاں ہاں سانوں گاؤنا ایسدا گیت ہے نی
دینہہ چھیڑ مہیں وڑے جھل بیلے ایس مُنڈڑے دی ایہاریت ہے نی
راتیں آن اِلہ نوں یاد کردا وارثؔ شاہ دے نال اُدمیت ہے نی

اوکھے لفظاں دے معنے
تبیت: سرگزشت، گزری ہوئی گل۔
مصحف: صحیفہ، مراد قرآن پاک۔
انانیت: انا دا مسئلہ۔
ریت: راہ رسم، رواج۔
پریت: پیار، محبت۔
دیہہ چھیڑ مہیں: دن ویلے مجھاں ہِک کے۔
منڈڑے: منڈے۔
اُدمیت: مستی خماری (عام طور تے جنسی)

سدھا مطلب
ہیر نے آپڻے پیو چوچک سیال توں چوری چوری رانجھے دیاں بھابیاں نوں خط لکھیا جیس وچ آپڻی گل یاں کتھا کیتی۔
اوس لکھیا جو چٹھی دی ریت ہے جو پہلاں تہانوں آپڻی خیر بارے دساں تے تہاڈی خیر چاہاں۔
ہور جیہڑی گل تسیں رانجھے بارے لکھی ہے اوہ میری ہوند ، میری ہستی (انا ایتھے ایہناں معنیاں وچ ہے)۔
میں مسیت وچ قرآن تے ہتھ رکھ کے قسم کھا سکنی ہاں جو اوہ میرا ہے۔
تسیں ہُڻ اوہدے پچھے ایویں کیوں دوڑ پئیاں ہو، میری ا اوس نال محبت ہے۔
اسیں ترنجڻاں وچ جاکے بہنیاں تے اوسے دے گیت گاؤنیاں۔
اوہ دن ویلے مجھاں نوں ہک کے جنگل بیلے وچ جا وڑدا ہے۔ ایہو ایس مُنڈے دا روز دا ورتارا ہے۔
رات نوں آڻ کے اللہ نوں یاد کردا ہے۔ اُنج میرے نال اوس دی مستی وی ہے۔

کھلارواں مطلب
ہیر آپڻے پیو توں چوری ہی رانجھے دیاں بھابیاں نوں خط لکھ رہی ہے کیوں جے نہیں تے ہور فساد ہو جاوے۔ وارث شاہ اوس دے خط لکھے نوں گلے، الاہمے یاں مقابلے بازی دی تھاں ہیر دی کتھا کہندا ہے۔ مطلب ہیر نے بھابیاں دے حُسن عشق نال کوئی مقابلہ نہیں کرنا اوہنے صرف آپڻی کہاڻی دسڻی ہے۔ اوہ نہ کسے نال مقابلہ کر رہی ہے تے نہ ہی کسے دا کُجھ کھو رہی ہے جیویں بھابیاں دا دعویٰ ہے۔

دوجے مصرعے وچ اوہ بھابیاں نوں اک طرحاں دی چوبھ وی لا رہی ہے۔ ایہہ دس کے جو خط دے لکھڻ دی ریت ایہہ ہے جو لکھڻ والا پہلے آپڻی خیر بارے دسدا فیر دوجے دے خیر دی دعا کردا تے فیر ہور کوئی گل ہوندی ہے۔ پر بھرجائیاں دے خط اِنج شروع نہیں ہوندے سڻ۔ سگوں اوہ پہلی گل ہی مقابلے دی کردیاں سڻ۔ ہیر اوہناں نال سجڻاپا وکھا رہی ہے تے خط انج لکھ رہی جیویں کسے آپڻے نوں لکھیا جاندا جدوں کہ بھابیاں انج لکھ رہیاں ہیڻ جیویں کسے ویری یاں دشمڻ نوں چٹھی گھلی دی ہے۔

تیجے مصرعے وچ ہولی نال رانجھے دی گل چلاؤندی ہے۔ اوس وچ وی اوہ ایہہ نہیں کہندی جو تسیں گھٹ سوہڻیاں یاں عشق وچ گھٹ ہو، اوہ بس ایہہ کہندی ہے جو ایہہ میری میں میری ہستی دا سوال ہے۔ میرے لئی ایہہ کوئی کھیڈ نہیں یاں کوئی کھو کھس نہیں ۔ایس گل نوں ثابت کرن لئی اوہ کہندی ہے جو میں ایہہ گل مسیت وچ قرآن تے ہتھ رکھ کے کہ سکنی آں کہ رانجھا میرا ہے۔ مسیت وچ جاکے قرآن تے ہتھ رکھ کے کہہ دیڻا جو ایہہ چیز میری ہے سب توں وڈی قسم ہوندی ہے۔ تے ایس نوں منڻ بناں کوئی راہ نہیں ہوندا۔ ہُڻ وی جے کوئی دعوی کرے تے کہندے نیں جو توں مسیتے جاکے قرآن تے ہتھ رکھ کے کہہ دے تے گل منی جاوے گی۔ عقیدہ ایہہ ہے جو جے جھوٹھی قسم کھاہدی جاوے گی تے اوس دے بدلے وچ عذاب (شراپ) لگے گا۔

فیر اوہ اوہناں نوں ہی پُچھدی ہے جو تسیں ایس دے پچھے کیوں اُٹھ نسیاں ہو، ایس نال تے میرا پیار ہے۔ مطلب ہُڻ تہانوں پیار کتھوں جاگ پیا ہے۔ تے نال ہی کہندی ہے جو میرا تے ایس نال پیار اینا گوڑھا ہے جو جد میں تے میریاں سہیلیاں ترنجڻاں وچ بہنیاں تے اوسے دے گیت گاؤنیاں۔ ہیر نوں آپڻیاں سہیلیاں نال یاں سہیلیاں نوں اوہدے نال کوئی ساڑا نہیں۔ اوہناں سب دا آپڻے آپڻے رنگ دا رانجھے نال پیار ہے۔ ہیر دا ذاتی وی ہے تے سہیلیاں دا یاری دوستی والا۔

فیر اوہناں نوں دسدی ہے جو ایس مُنڈے دا ویہار ایہہ ہے جو ایہہ دن ویلے مجھاں ہک کے جنگل بیلے جا وڑدا ہے۔ مطلب ایہہ کوئی میرے مُڈھ نہیں بیٹھا رہندا۔ ایہہ کوئی نکما نکھٹو نہیں۔ تے رات نوں آکے الہے نوں یاد کردا ہے۔ ایس دا مطلب ہے جو ساڈا اک روحانی ساک وی ہے۔
پر وارث شاہ ہوریں رانجھے نوں فرشتہ یا رب نہیں بڻن دیڻا چاہوندے۔ اوہ اوس نوں بندہ ہی رکھڻا چاہوندے نیں۔ ایسے لئی اخیر ہیر دے مونہوں ایہہ وی کہایا جو میری اوس نال مستی وی ہے۔ ایتھے لفظ اُدمیت ورتیا گیا ہے جیہڑا اُدماد توں نکلیا۔ اُدماد دا مطلب جنسی خواہش ہے جیویں ہیر دی ماں اوہنوں گالھ کڈدیاں کہندی اے " تینوں وڈا اُدماد آ جاگیا ہے تیرے واسطے منس (مرد) سہیڑیئے نی "۔ ایس لئی ایس وچ کوئی شک نہیں جو ہیر ایہہ کہہ رہی ہے جو میرا اوس نال مرد عورت والا رشتہ وی ہے۔اوہ ایہہ گل بھابیاں نوں ایس واسطے وی دس رہی ہے جو تسیں اوس نال ایہہ تعلق نہیں بڻا سکدیاں سو یاں نہیں بڻا سکدیاں۔

اگے جا کے وی تسیں ویکھو گے جو وارث شاہ عشق دے روحانی تے جسمانی دوہاں پکھاں نوں لازم سمجھدا ہے۔ تے اوہناں نوں وکھرے وکھرے کرن نوں غلط منندا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels