Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 173

ہیر وارث شاہ: بند 173

July 21st, 2011
5 / 5 (1 Votes)

چوچک سد بھائی پرہے لا بیٹھا کِتے ہیر نوں چا پرناہیئے جی
آکھو رانجھے دے نال وواہ دیواں اکے بنڑے چا منگائیے جی
ہتھیں آپڻے کِتے سامان کیجے جان بُجھ کے لِیک نہ لائیے جی
بھائیاں آکھیا چُوچکا اےہہ مُصلحت اسیں کھول کے چا سنائیے جی
وارثؔ شاہ فقیر پریم شاہی ہیر اوس تھوں پُچھ منگائیے جی

اوکھے لفظاں دے معنے
پرہے: مجلس، محفل۔
پرنائیے: ویاہ دیئے۔
بنڑا: لاہڑا دولہا، بنڑے منگواؤڻا دا مطلب منڈیاں دے ساک منگواؤڻا ہووے گا۔ جٹکے سماج وچ منڈیاں دے ساک منگواؤڻ دی کوئی خاص ریت یاں طریقہ ہووے گا۔
مصلحت: صلاح مشورہ، وچار وٹاندرہ۔
پریم شاہی: رب نال محبت رکھڻ والا، عشق دا مرید

سدھا مطلب
چوچک نے آپڻے بھرا بلا کے مجلس بیٹھک کیتی تے اوہناں نوں کہیا جو ہُڻ ہیر نوں کتے ویاہ دئیے۔
جو تسیں کہو تے میں رانجھے نال ہی اوس نوں ویاہ دینا تے جے چاہو تے باہروں منڈیاں دا ساک منگوا لینے ہاں۔
اسیں آپ ہی آپڻیں ہتھیں ایہہ بندوبست کردیوئیے تے جاڻ بُجھ کے آپڻی عزّت خراب نہ کروائیے، آپڻے آپ تے لیک (یاں داغ) نہ لگوائیے۔
اوس دے بھراواں کہیا جو اسیں گل تے کھول کے تینوں دسنے ہاں جو کیہ کیتا جاوے یا کیہ تدبیر بڻائی جاوے۔
ہیر دی منگڻی وارث شاہ کولوں پُچھ کے کرئیے جیہڑا عشق دا بالکا یاں فقیر ہے۔

کھلارواں مطلب
وارث شاہ بندیاں دے سماج نال تے آپو وچ دی رشتے دیاں کئیاں پکھاں تے چانڻ پا کے فیر کہاڻی ول پرتدا ہے ۔ بھائیاں بھابیاں دی خط کتابت توں پہلے کیدو نے چوچک نوں لیا کے ہیر رانجھے نوں جنگل وچ اکٹھیاں ہویاں پھڑوا دتا سی تے اوتھے ہی چوچک نے پکی کر لئی سی جو ہُڻ ہیر دا ویاہ کردیڻا۔

پہلے ہی مصرعے توں پتہ لگدا ہے جو چوچک ایہہ فیصلہ کلا نہیں کر سکدا۔ برادری دے نظام وچ پوری برادری نے فیصلہ کرنا ہوندا ہے جو مُنڈا یاں کُڑی کتھے ویاہی جاوے۔ اک تے دوجی دھر (کڑم) برادری دی شوبھا ودھا سکدے ہیڻ یا گھٹا سکدے ہیڻ ۔ جے رشتہ بھیڑے یاں گھٹ درجے دے لوکاں وچ ہو گیا تے ساری برادری نوں بُرا کہیا جاڻا ہے۔ لوکاں کہڻا "ویکھو سیالاں کیہ گھٹیا لوکاں نوں کُڑی دے دتی ہے" دوجی گل ایہہ جو اوس نظام وچ ویاہ کُڑی منڈے دا نہیں اک برادری دا دوجی برادری نال ہوندا ہے۔ برادری نظام مُکڻ مگروں وی رشتہ کڑی منڈے وچ نہیں دو ٹبراں وچ ہی ہوندا سی۔ یورپ تے امریکہ وچ صنعتی انقلاب توں مگروں وی اِنج ہی ہوندا رہیا۔ امریکہ وچ تے کوئی 1960 یاں 70 دے دہاکے وچ ایہہ نظام مکیا تے کُڑی منڈے سدھے آپو وچ رشتے کرن لگ پئے نہیں تے اوتھے وی دو ٹبر ہی اخیری فیصلہ دیندے سڻ۔

چوچک نوں وی ہیر دا ویاہ کرن لئی بھراواں تے برادری کولوں صلاح لیڻی لازمی سی۔ ایسے لئی اوہنے کہیا جو جے تسیں کہو تے اسیں رانجھے نال ہی ہیر نوں ویاہ دئیے تے جے چاہو تے باہروں ساک منگوا لیئے۔ ایس توں لگدا ہے جو چوچک پیو ہوندیاں ہیر دی چوڻ نوں منڻ لئی تیار ہے پر گل اوہدے وس وچ نہیں برادری دے ہتھ وچ ہے۔ چوچک رانجھے نال کرن دی چوڻ شاید ایس لئی وی رکھ رہیا ہے جو کِتے برادری والے ایہہ نہ کہہ دیڻ جو توں اوس کولوں باراں سال مجّاں ہیر دے ساک دی آس تے چروائیاں تے ہُڻ توں کیویں مُنکر ہو سکنا ہیں۔

نال ہی ایہہ وی دس دیندا جو آپڻے ہتھیں ایس دا ویاہ کر دیوئیے تے کِتے ایہہ نہ ہووے جو ایہہ رانجھے نال نس جاوے تے ساری برادری نوں لیک لگ جاوے۔ چوچک تے باقی سیالاں نوں وی ہیر تے رانجھے دے عشق دا پتہ ہے ایس لئی چوچک ایہہ گل برادری کولوں تے لکا نہیں سکدا۔ اُنج وی کیدو نے پرہیا وچ ایہہ گل پہلاں ہی کھول دتی سی۔

چوچک دی گل سُڻ کے برادری والیاں کہیا جو اسیں گل کھول کے تینوں صلاح (مصلحت صلاح توں ہی نکلیا ہے) دیواں گے۔ مطلب ایہہ گل کوئی سدھ پدھری نہیں تے ایس دے کئی پکھاں تے گوہ کرن دی لوڑ ہے۔

اخیری مصرعے وچ وارث شاہ ہوراں دا خیال ہے جو اوہ پریم شاہی بالکے ہیڻ اوہناں کولوں پچھیا جاڻا چاہیدا ہے۔ پر اوہناں نوں پتہ ہے جو سیال سردار پریم شاہی بالکے کولوں کدی صلاح نہیں لے سکدے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels