Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 174

ہیر وارث شاہ: بند 174

July 24th, 2011

رانجھیاں نال نہ کدی ہے ساک کیتا نہیں دتیاں اساں کڑمائیاں وو
کِتھوں رُلدیاں گولیاں آئیاں نوں دِجن ایہہ سیالاں دیاں جائیاں وو
نال کھیڑیاں دے ایہہ ساک کیجے دِتی مصلحت سبھناں بھائیاں وو
بھلیاں ساکاں دے نال چاء ساک کیجے دُھروں ایہہ جے ہندیاں آئیاں وو
وارثؔ شاہ انگیاریاں بھکھدیاں بھی کسے وِچ بارُود چُھپائیاں وو

اوکھے لفظاں دے معنے
کُڑمائیاں: کُڑی یاں مُنڈے دے سوہرے کُڑم ہوندے نیں تے ایس رشتے نوں کُڑمائی کہیا جاندا ہے۔
رُلدیاں: کھجل ہوندے،غلام، نوکر۔
گولیاں: غلاماں۔
دجن: ایہہ دیجڻ دا نکا روپ ہے جیس دا مطلب ہے دتیاں جاڻ۔
جائیاں: جمیاں۔
ساک: رشتہ۔
دھروں: ازل توں، خاندانی ریتاں وچ، شروع توں۔
انگیاریاں وچ بارود پاؤڻا: فساد مچاؤڻا

سدھا مطلب
رانجھے دے بھرا کہندے نیں جو اسیں رانجھیاں دی برادری یاں قبیلے نال کدی رشتہ نہیں کیتا تے نہ ہی اوہناں نوں کدی کُڑم بڻایا۔
اسیں سیالاں دیاں جمیاں کُڑیاں نوں کدی کھجل خوار ہوکے آئیاں غلام چاکراں نوں نہیں دے سکدے۔
بھراواں ایہہ صلاح دتی جو ایہہ ساک کھیڑیاں نال کرنا چاہیدا ہے۔
ازل توں شروع توں انج ہی ہوندا آیا جو بھلیاں (آپڻے جوڑ دے) دیاں نال رشتے کیتے جاندے نیں۔
بھکھدیاں انگیاریاں نوں بارود وچ لُکاؤڻ نال بربادی ہوندی ہے۔

کھلارواں مطلب
چوچک دے بھرا اوس نوں صلاح دیندیاں پہلی تے ایہہ گل کہندے نیں جو اسیں رانجھیاں دی برادری نال کدی ساک نہیں کیتا تے ایس لئی رانجھے نال ہیر نہیں ویاہی جا سکدی۔ ایہہ ذات برادری دا نظام ایڈا کرڑا ہے جو وارث شاہ دے مرن توں دو سو سال مگروں وی چالو ہے۔ ایسے لئی ہیر تے رانجھے دا عشق اگونہا (ترقی پسند) ہے جو اوہ ہور شیواں دے نال نال ذات برادری دیاں بڻایاں ولگڻاں (چار دیواری) نوں توڑن دا اُپرالا (کوشش) ہے۔ دنیا دے دوجے کلاسیکی ادباں دیاں عشق کہاڻیاں وچ وی عشق دو وکھرے یاں بھڑدے قبیلیاں دے مُنڈے کُڑی وچکار ہوندا ہے۔ مطلب عشق ہے ہی آلے دوالے دیاں حد بندیاں نوں توڑن دا ناں۔ جے رانجھا کھیڑیاں دی برادری دا کھاندا مُنڈا ہوندا تے اوس نوں ہیر چگی لگدی تے فیر ویاہ ہو جاندا جیویں دوجے ویاہ ہوندے ہیڻ۔ عشق دا پواڑا تے پیندا ہی اوتھے ہے جتھے بندہ تے زنانی روکاں نوں بھن کے من مرضی دا رشتہ بناؤڻا چاہوندے ہیڻ۔

دوجے مصرعے وچ گل ہور وی ننگی ہو گئی ہے جو رانجھے نال ہیر ایس لئی نہیں ویاہی جا سکدی جو اوہ کھجل خوار ہوندا آیا تے آ کے چوچک سیال دا چاک یا نوکر بڻ گیا۔ اک سردار دی دھی نوکر نال کیویں ویاہی جاوے۔ اج وی بہتے سماجاں وچ اِنج ہی کہیا جاوے گا جو ایہہ کیویں ہو سکدا ہے۔ ایتھے وی ویکھو تے ایہہ مصرع ایس لئی آیا ہے جو سیال اوکھے سوکھے رانجھیاں نوں وی شاید رشتہ دے ہی دیندے جے رانجھا اوہناں دا چاک نہ ہوندا۔ چاک نوں جوائی بناؤڻا انہوڻی ہے۔ ایس پکھوں عشق تے ہے ہی انہوڻی دا ناں۔

اگلے مصرعے وچ کھیڑیاں نال ایہہ رشتہ کرن دی کہہ کے ایہہ وی کہہ دتا گیا ہے 'بھلیاں' نال ساک کرنے چاہیدے نیں۔ بھلیاں دا ایتھے مطلب ہی ہے آپڻے جوڑ دے ، امیر تے سردار۔ سیال سرداراں لئی 'بھلے ساک' اوہو ہی ہو سکدے ہیڻ جیہڑے اوہناں دی ٹکر دے ہوڻ جیویں کھیڑے۔

اخیر تے وارث شاہی فارمولا ورتیا گیا ہے جو بھکھدیاں انگاریاں نوں بارود وچ نہیں لُکایا جا سکدا۔ مطلب ہیر بھکھدا انگیارا ہے تے رانجھا بارود۔ ہیر آپڻے حسن نال تتا کر دیڻ والی ہے تے رانجھا بارود ہے جیس نے اوہناں دے نظام نوں چیلنج کر دتا ہے۔ اک طرحاں نال سیال ٹھیک وی آکھدے ہیڻ جو ہیر رانجھے دا مِلڻ انگیارے تے بارود دا اک تھاں ہوڻا ہے جیس نال چالو سماج نوں ڈھیہ جاڻ دا ڈر ہے۔ ریتاں رواجاں دے مُک جاڻ دا خطرہ ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels