Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 177

ہیر وارث شاہ: بند 177

September 7th, 2011
3 / 5 (1 Votes)

ملی جاء ودھائی جاں کھیڑیاں نوں لُڈی مار کے جُھنبراں گھت دے نی
چھالاں لین اُپٹھیاں خوشی ہوئے لا مجلساں کھیڈ دے وت دے نی
بھلے کُڑم ملے سانوں شرم والے رجے جٹ وڈے اہل پَت دے نی
وارثؔ شاہ دی شیرنی ونڈئیانیں وڈے دیگچے دُدھ تے بھت دے نی

اوکھے لفظاں دے معنے
جھنبراں: جھُنبر اک خاص طرحاں دا مرداں دا ناچ جیہڑا گول دائرے وچ پایا جاندا ہے، خوشی دے ناچ۔
وتدے : ٹردے، کردے۔
کڑم: سانجھی، سمدھی، کُڑی مُنڈے دے سوہریاں والے۔
پت دے: عزت دے
بھت دے: چاولاں دے

سدھا مطلب
جد کھیڑیاں نوں ہیر دا رشتہ ملڻ دی مبارکباد ملی تے اوہناں خوشی نال جھنبراں پاؤڻیاں شروع کردتیاں (نچڻ لگ پئے)۔
اوہ خوشی وچ پُٹھیاں چھالاں مار رہے ہیں مجلساں لا کے کھیڈاں کھیڈ رہے ہیڻ۔
اوہ کہندے نیں جو سانوں منڈے لئی بڑی شرم تے اڻکھ والے سوہرے ملے ہیڻ۔
اوہناں وارث شاہ دے ناں دی نیاز دی مٹھائی ونڈی تے دُدھ چاولاں دے دیگچے لوکاں ساہمڻے رکھ دتے۔

کھلارواں مطلب
ایس بند وچ ایہہ پتہ لگدا ہے جو کھیڑیاں نوں سیالاں دی کُڑی ویاہوڻ دا کڈا چاء سی۔ نال ہی ایہہ وی پتہ لگدا ہے جو صرف سیالاں دی راٹھی نوں ویکھ کے رشتہ کرن وچ کنے بھلیکھے تے ہنیرے وچ ہیڻ۔

پہلے دو مصرعے تے سدھے کھیڑیاں دی ہیر نال منگڻی ہوڻ دی خوشی مناؤڻ دے ہیڻ ۔ ایتھے ایہہ دسی جائیے جو پراڻے جٹکے پنجاب دے لوک گول دائرے وچ اک ناچ کردے ہیڻ جیس نوں جُھنبر کہیا جاندا ہے۔ ایہہ ناچ چڑھدے پنجاب دے لوکاں یاں پنجاب وچ وسے پناہ گیراں یا آبادکاراں وچ اُنج نہیں کیتا جاندا۔ ایس وچ ناچ کرن والے ڈھول دوالے ہتھ اُتے لے جاندے نیں تے پیراں نوں خاص طرحاں اگے پچھے کردے نیں۔ جھنگ وچ اجے وی بہتا جٹکا سماج ہے تے اوتھے جھُنبر عام ہوے گی یاں ہے۔

تیجا مصرع خاص ہے تے وارث شاہ دی ٹچکر راہیں وچار دھارا نوں اگھیڑن دے ہُنر دی ودھیا مثال ہے۔ اتوں ویکھو تے جد لوکیں ایس طرحاں دے رشتے کر کے آؤندے نیں ایسے طرحاں دیاں گلاں کردے نیں۔ پر وارث شاہ ہوریں ایہہ ٹچکر دے طور تے ورت رہے ہیڻ جو کھیڑے جیہڑے ایڈیاں چھالاں مار رہے ہیڻ کڈے انھے ہیڻ۔ ایہہ سمجھدے ہیڻ جو اوہناں نے بڑی اڻکھ تے شرم حیا والے ٹبر نال ساک کیتا ہے۔ اوہناں نوں ایہہ نہیں پتہ جو مُنڈے دا سوہرا اوہ ہے جیس کہیا سی "ساڈی کُڑی دا کُجھ نہ لاہ لیندا چار دن تاں مجھیں چرا لئیے۔"

وارث شاہ شاہ ہوریں وکھا رہے ہیڻ جو لوک تے خاص طور تے حاکم میل دوجے دے مال دولت تے رُعب دبدے نوں ویکھ کے اوہناں دا کردار (چلتر) متھ لیندے ہیڻ۔ چوچک سیالاں دا سردار ہے ایس لئی فرض ایہو کیتا جاوے گا جو اوس نے آپڻی کُڑی نوں بڑا سانبھ کے رکھیا ہووے گا۔ مطلب اوہدی سرداری اوہدے شرم حیا دا سر ٹیفیکیٹ ہے۔ اندر جو حقیقت ہے اوہ ایس دے اُلٹ ہے، سردار وی معاشی غرض لئی اڻکھ تے شرم حیا اک پاسے رکھ کے آپڻا کم چلا رہیا ہے۔ ایہہ گل طبقے دے اُچھاڑ تھلے لُکی رہندی ہے۔ اگے جا کے پتہ لگے گا جو کھیڑیاں دی آپڻی شرم حیا وی وکھالا ہی ہے کیوں جو اوہناں دی کُڑی سہتی وی مُراد بلوچ نال عشق کردی ہے تے کھیڑے اوس نوں مار کے نسا وی چکے ہیڻ۔ مطلب کھیڑیاں نوں آپڻی شرم حیا بارے وی بڑا پتہ ہے۔

ایس پکھ توں ویکھو تے حاکم میل دوہیں ٹبر، سیال تے کھیڑے دوغلی تے منافقت دی زندگی گذار رہے ہیڻ۔ پر حاکم میل وچ ہوندیاں اوہناں معاشی لوڑاں لئی کیتی جاڻ والی بے غیرتی نوں لُکایا ہویا ہے۔

اخیری مصرعے وچ وارث شاہ ہوریں وی نیاز دی مٹھائی ونڈ رہے نیں۔ اُنج تے ایہہ کم کھیڑے ہی کر رہے ہیڻ پر جے اسیں مزہ لیڻ لئی ایس نوں وارث شاہ ہوراں دے ناں لا دئیے تے کہہ سکنے ہاں جو اوہ ایس گل دی مٹھائی ونڈ رہے نیں جو ویکھو میں کیس طرحاں ٹچکر لا کے حاکم میل دے انھے ہوڻ نوں وکھاؤڻ وچ سپھل (کامیاب) ہاں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels