Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 178

ہیر وارث شاہ: بند 178

September 11th, 2011
5 / 5 (1 Votes)

ہیر ماؤں دے نال آ لڑن لگی تُساں ساک کیتا نال زوریاں دے
کدوں منگیا منس میں آکھ تیتھوں ویر کڈھیوئی کِنہاں کھوریاں دے
ہُن کریں ولا کیوں اساں کولوں ایہہ کم نہ ہوندے نی چوریاں دے
جیہڑے ہون بے عقل چا لاوندے نی اٹ ماڑیاں دی وچ موریاں دے
چاء چُغد نوں کونج دا ساک دِتو پری بدھیاجے گل ڈھوریاں دے
وارث ؔ شاہ میاں گنا جگ سارا مزے وکھ نیں پوریاں پوریاں دے

اوکھے لفظاں دے معنے
منس: مرد۔
کھوریاں: کسے نال گھجی کھیہہ رکھڻا، دشمڻیاں خفیہ کینہ۔
ولا: پردہ، رازداری۔
ماڑیاں: محل منارے۔
موری: غسل خانے دے پاڻی دی نالی جیس نوں وہڻی وی کہیا جاندا ہے، زمین تلے تھلے کڈھی سرنگ نوں وی موری کہیا جاندا ہے۔
چغد: اُلو۔
ڈھوریاں: جانور، ڈنگر۔
زوریاں: زبردستی۔
پوری: گنے دیاں گنڈھاں وچ دا حصہ۔

سدھا مطلب
ہیر آکے ماں نال لڑن لگ پئی تے اوس کہیا جو توں زبردستی میرا رشتہ کیتا ہے۔
میں تیتھوں آکے کدوں مرد منگیا سی یاں منگ کیتی سی جو مینوں مرد چاہیدا ہے تے توں کیہڑی گجھی دشمڻی میرے نال کیتی ہے۔
جیہڑے محلاں وچ غسل خانے یاں وہڻی دی نالی دیاں اٹاں لاؤڻ اوہ بے عقل (مورکھ) ہوندے نیں۔
تسیں اُلّو نوں کونج دا ساک دتا ہے تے اک پری نوں ڈنگراں دے گل نال بنھ دتا ہے۔
وارث شاہ ، ایہہ دنیا گنے وانگ ہے جیس دی ہر پوری دا وکھرا سواد ہے۔

کھلارواں مطلب
پچھلے بند وچ ہیر نوں کھیڑیاں گھر آپڻی منگڻی ہوڻ دا پتہ لگ گیا سی۔ ایس لئی اوہ آکے ماں نال لڑن لگ پئی جو اوہناں نے زبردستی اوہدا ساک کیتا ہے۔ تے نال ہی ایہہ وی کہندی ہے جو میں تینوں کدی کہیا سی جو مینوں مرد چاہیدا ہے۔ فیر جے ایہہ وی نہیں سی توں کیہڑی لکی ہوئی یاں تیرے اندر میرے نال گجھی کوڑ سی جیدے پاروں توں ایہہ بدلہ میرے کولوں لیا ہے۔ ہیر نوں وی چنگی طرحاں پتہ ہے جو کیہڑا گجھا ویر اوہدی ماں نوں اوہدے نال سی پر آپڻی ماں دے مونہوں سڻنا چاہوندی ہے۔ہیر ایہہ سوال ایس لئی وی پُچھ رہی ہے جو جے اوہدی ماں نوں رانجھے نال ساک کرن تے اعتراض سی تے فیر اوہ رانجھے نوں موڑ کے کیوں گھر لے کے آئی سی۔

پڑھنہاراں نوں یاد ہووے گا جو جدوں پہلی واری ہیر دی ماں نوں ہیر دے رانجھے نال عشق پتہ لگا سی تے اوہ بہت غصے ہوئی سی، اوہنے آپ ہی کہیا سی جو "تینوں وڈا اُدماد آ جاگیائے تیرے واسطے منس سہیڑئیے نی"۔ پر فیر جد چوچک نے رانجھے نوں نوکریوں ہٹا دتا، اوہ چلا گیا پر مجھاں نوں کوئی ہور نہ چار سکیا تے فیر ملکی نے جاکے رانجھے دا منت ترلا کیتا سی تے پتیا کے موڑ لیائی سی۔ اوس ویلے اوہنے کہیا جو توں ہی ہیر لئی سب کجھ کرنا ہے۔ ظاہر گل ہے ہیر تے رانجھا ایہو سمجھڻ لگ پئے جو اک دن اوہناں دا ویاہ ہو جاوے گا پر جد ہیر دی منگڻی کھیڑیاں ول ہوگئی تے ہیر ایہہ پچھڻ دی حق دار ہے جو تسیں کیہڑی گجھی دشمڻی میرے نال کیتی ہے۔ مطلب اک پاسیوں تسیں رانجھے نوں وعدے کیتے تے دوجے پاسے تسیں ساک کتے ہور کر دتا۔ ہیر "منس منگڻ" دا ایس لئی وی کہہ رہی ہے جو اوہنے تے اجے تیکر ایہہ وی نہیں سی کہیا جو اوہدا ویاہ رانجھے نال کردیو۔

تیجے مصرعے وچ اوہ ماں نوں کہندی ہے جو توں ہڻ میرے کولوں سچی گل لکا رہی ہیں جدوں کہ ایہو جیہے کم چوری چوری نہیں ہو سکدے۔ مطلب ویاہ یاں منگڻی ہوڻی ہے تے سارے جہان نوں پتہ لگڻا ہے ایس لئی ماں دا لکاؤڻ دا کوئی لابھ نہیں۔ ولاؤڻا دا مطلب اکھ وچ اکھ نہ پاؤڻا وی ہوندا ہے، مطلب جے کوئی بندہ شرمندہ ہوے، یاں اوہنے کسے دے خلاف کوئی پلان کیتا ہووے تے اوہ دوجے کولوں ولاؤندا ہے۔ ہیر اصل وچ ایہہ کہہ رہی ہے جو توں میرے نال اکھ نہیں ملا سکدی کیوں جو تینوں پتہ ہے جو ایہہ بڑی ناانصافی والا کم ہو رہیا ہے۔ پر تیرے اکھاں نہ ملاؤڻ نال ایہہ ویاہ چوری چوری تے ہو نہیں جاڻا۔

اگلے دو مصرعیاں وچ ہیر کھیڑے نال ویاہ نوں بے جوڑ کہہ کے ماں نوں جھوٹھیاں کردی ہے۔ پہلے تے اوہ کہندی ہے جو جیہڑے لوک محل بناؤڻ وچ وہڻی دیاں اٹاں لواؤڻ اوہ بے عقل ہوندے نیں۔فیر ایس گل نوں اُلو تے کونج دا ساک کہندی ہے۔ کونج اک ملوک (نازک) تے سوہڻی شکل دا پکھو ہے جیہڑا پاڻیاں تے رہندا ہے تے اُلو اک بد شکلا بھیڑی آواز وال پکھو ہے جیہڑا دن نوں سوندا تے رات نوں جاگدا ہے۔ کونج بڑی قدر والا پکھو ہے تے اُلو کولوں لوک کریہت کھاندے نیں۔ ہیر کہندی ہے اوس دا کھیڑے نال جیہڑا جوڑ جوڑیا جا رہیا ہے اوہ کونج تے اُلو والا ہے۔ فیر ایسے گل تے زور پاؤڻ لئی اوہ کہندی ہے جو اوس نوں کھیڑے نال ویاہوڻاں اِنج ہی ہے جیویں ڈنگر دے گل وچ پری نوں بنھ دتا جاوے۔

اخیر تے وارث شاہ ہوریں تت کڈھدیاں کہندے نیں جو ایہہ جگ گنے دیاں پوریاں ورگا ہے تے ہر پوری دا وکھ سواد ہے۔ ایہہ سب جاڻدے ہیڻ جو گنے دے مڈھ دیاں پوریاں بہت مٹھیاں ہوندیاں نیں۔ جیویں جیویں اتّے جاندے جاؤ گنے دیاں پوریاں پھکیاں ہوندیاں جاندیاں نیں۔ تے آگ (گنے دے پتیاں والا حصہ) دے لاگے گنے دی پوری پھوکی تے بے سواد ہوندی ہے۔ سو جگ وی اک گنّے وانگ ہے جیس وچ ہر بندے دیاں خصلتاں وکھو وکھ ہیڻ۔ جے اوہناں نوں اکو جیہا سمجھ کے ورتڻا چاہو تے اوہ مورکھتا ہے۔ ایس وچ ہیر کہہ رہی ہے جو اوہ گنے دے مُڈھ لگدی مٹھی پوری ہے تے کھیڑا آگ دے نال لگدی پھکی تے بے سواد پوری۔ جے ہیر دا جوڑ جڑنا ہے تے فیر اوہ ایسے بندے نال ہووے جو اوسے دی طرحاں مڈھ لاگے ہوندیاں مٹھا ہے جیویں رانجھا۔

ہیر دیاں ایہناں ساریاں گلاں دا اوہدی ماں کول کوئی جواب نہیں تے وارث شاہ ہوراں اوس ولوں جواب لکھیا وی نہیں۔ اوہ جاڻدے ہیڻ ہیر دی ماں ملکی وی اوسے دی طرحاں مدھولی ہوئی زنانی ہے تے چاہوے وی تے کجھ نہیں کر سکدی۔ اوس نوں پتہ ہے جو فیصلہ برادری نے کرنا ہے تے جے اوہ ہیر دے حق وچ بولنا چاہوے وی اوس دی گل کسے نہیں سڻنی۔ وارث شاہ ہوراں ایہہ جواب ایس لئی وی نہیں لکھیا جو ہیر دی ماں تے اوس چال دا حصہ سی جیہڑا اوہدا پیو نے رانجھے کولوں کجھ چر ہور مجھاں چرواؤڻ لئی چلائی سی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels