Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 179

ہیر وارث شاہ: بند 179

September 13th, 2011

ہیر آکھدی رانجھیا قہر ہویا ایتھوں اُٹھ کے چل جے چلنا اِی
دونویں اُٹھ کے لمّڑے راہ پوئیے کوئی اساں نے دیس نہ ملنا اِی
جدوں جھگڑے وڑی میں کھیڑیاں دے کسے اساں نوں موڑ نہ گھلنا اِی
ماں باپ نے جدوں ویاہ ٹوری کوئی اساں دا وَس نہ چلنا اِی
اسیں عشق دے آن میدان رُدّھے بُرا سُورمے نوں رنوں ہلنا اِی
وارثؔ شاہ جے عشق فِراق چھُٹے ایہہ کٹک پھیر آکھ کِس جھلنا اِی

اوکھے لفظاں دے معنے
لمڑے: لمے۔
دیس ملنا: بادشاہی لیڻی ہے۔
جُھگڑے: گھر۔
توری: گھلی۔
رُدھے: ایہہ رُجھے دی ہی اک شکل ہے، مصروف ہوئے۔
رنوں: جنگ دے میدان توں۔
کٹک: فوج، لشکر۔
سُورما: بہادر
سدھا مطلب
ہیر رانجھے نوں جاکے کہندی ہے جو غضب ہو گیا ہے تے جے ایتھوں چلنا ای تے چل۔
چل دوہیں کسے دور تھاں ول ٹُڑ پئیے یاں چلے جائیے ، اساں کیہڑا کوئی کسی دیس تے باشاہی کرنی ہے یا ملکیت بناؤڻی ہے۔
جدوں میں کھیڑیاں دے گھر چلی گئی تے فیر مینوں کسے نے موڑ کے ایتھے نہیں گھلنا۔
جدوں ماں پیو نے مینوں ویاہ دتّا تے فیر میرا کوئی وس نہیں چلنا۔
اسیں عشق دے میداں وچ رُجھے ہوئے ہاں ، تے کوئی وی بہادر جنگ دے میدان توں نہیں ہلدا۔
تے جے فیر عشق دی جدائی پے گئی تے ایہہ دھاوا یاں حملہ کوڻ جھلے گا۔

کھلارواں مطلب
اسیں پہلاں ہی کہہ ہٹے ہاں جو ہیر دی ماں یاں اوہدے ٹبر کول ہیر دی گل دا جواب نہیں۔ ایس لئی اوہ رانجھے نوں آڻ کے کہندی ہے جو جے توں ایتھوں چلنا تے چل نکل جائیے۔ ہیر دے ایس سدے تے لوک اوس نوں بڑی بہادر کہندے ہیڻ تے رانجھے نوں چُڈھو جیس ہیر دی گل نہیں منّی۔ پر ایس گل دا نیاں (فیصلہ) اسیں رانجھے دا جواب سُڻ کے کراں گے جو کیہہ اوہ تھوڑدلا سی جو اوس ہیر دی گل نہ منّی۔

دوجا مصرع وی بڑا ڈوہنگا ہے جیس وچ ہیر پہلاں تے کہندی ہے جو چل کسے دور تھاں ول چلے جائیے۔ لمّا دور دے علاقے نوں وی تے جنوب والے علاقے نوں وی کہندے ہیڻ۔ ایتھے دوہاں صورتاں وچ مطلب ہے جھنگ توں بہت دور چلے جاڻ دا۔ مصرعے دے دوجے حصے وچ "کوئی اساں نے دیس نہ ملنا ای" کہہ کے اوہ آپڻے عشق دا مُڈھ دس رہی ہے۔ جو اوہدا رانجھے نال رشتہ مالکی دا نہیں تے نہ ہی کتے جاکے کوئی تھاں ملڻ لئی ہے۔ ایتھے اوہ ایہہ وی اک طرحاں کہہ رہی ہے جو اوہنوں اوہدی تخت ہزارے دی بھوئیں نال وی کوئی لیڻا دیڻا نہیں ۔ جے ایہہ نہ ہوندا تے اوہ کہندی چل تخت ہزارے تیرے وطن ول چلے جائیے، پر اوہ تے رانجھے لئی نتھاواں بنڻ لئی تیار ہے تے اوس نال حیاتی دا ساک نبھاؤڻ لئی کِتے اوپری دور دی تھاں تے جاڻ دا کہہ رہی ہے۔

فیر اوہ رانجھے نوں سمجھاؤندی ہے جو حقیقت تے اِنج ہے جو اوہ جدوں کھیڑیاں دے گھر چلی گئی تے کسے نے اوہنوں موڑ کے نہیں گھلنا تے ماں پیو نے جدوں اوہدا ویاہ کردتا تے اوہدا کوئی وس نہیں چلنا۔ ہیر دی حیاتی وچ جو ہوندا ہے اوہنوں ساہمڻے رکھ کے اوس نوں مت دے رہی ہے جو اوہ ایس بھلیکھے وچ نہ رہوے جو ویاہ توں بعد اوہ اک دوجے نوں مل سکڻ گے۔ عام طور تے عورت وچ روز بروز واپرن والیاں اوکڑاں نوں سمجھڻ تے اوہناں نال نبڑن دی مرد نالوں بہتی مت ہوندی ہے۔ ایتھے سانوں ہیر اک عورت دے روپ وچ سیاڻی تے معاملے نوں سمجھڻ والی دِس رہی ہے۔ اوہدی ایہہ گل سچ ہے جو جے رانجھے نے اوس نال رہنا ہے تے فیر اوتھوں نسڻ دے سوا کوئی راہ نہیں۔

عمل دے نال نال اوہ ایہہ وی دس رہی ہے جو اسیں دوویں عشق دے میدان وچ لڑ رہے ہاں تے بہادر ہوندیاں اسیں ہار من کے نہیں بہہ سکدے۔ اوہدا مطلب ہے جو جے اوہدا ویاہ ہوجاندا ہے ، اوہ کھیڑیاں دے گھر وس جاندی ہے تے عشق دے میدان وچ اوہناں دی ہار ہو جاڻی ہے۔ اوہ ایہہ ہار کسے وی طرحاں منڻا نہیں چاہوندی۔

اخیری مصرعے وچ اوہ کہندی ہے جو جے ہار من وی لئی، اوہ چلی وی گئی تے فیر عشق دی جدائی دے جس لشکر نے حملہ کرنا اوہنوں کوڻ سہے گا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels