Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند182

ہیر وارث شاہ: بند182

September 21st, 2011

رانجھے آکھیا مونہوں کیہ بولنامیں گھٹ وٹ کے دُکھڑا پیونا ایں
میرے صبر دی داد جے رب دِتی کھیڑیں ہیر سیال نہ جیونا ایں
یَومَ تشقَّق السماء بالغمام سارے دیس وِچ ایہہ غم تھیونا ایں
یوم تبدل الارض غیرالارض فی السماء انبر پاٹڑے نوں کس سیونا ایں
صبر دلاں دے مار جہان پٹن اُچی کاس نوں اساں بکیونا ایں
تُسیں کملیاں عشق تھیں نہیں واقف نیہوں لاونا نِم دا پیونا ایں
وارثؔ شاہ جی چُپ تھیں داد پائیے اُچا بولیاں نہیں وہیونا ایں

اوکھے لفظاں دے معنے
گھٹ وٹ: صبر صبوری، آپڻا غم یا غصہ اندر رکھ کے۔
یوم تششق السماء بالغمام: جیس دیہاڑ پاٹ جاوے گا اسمان بدلاں توں (سورہ فرقان ٥٢/٥٢)۔
تھیوڻا: ہوڻا۔
یوم تبدل الارض غیر الارض فی السماء: اُس دن بدلی جاوے گی ایہہ زمین اُس زمین نال۔
امبر: اسمان۔
بکیوڻا: بکڻا۔
نیوں: دوستی۔
وہیوڻا: گزارہ ہوڻا، ویلا لنگھڻا

سدھا مطلب
رانجھا ہیر دیاں سہیلیاں نوں جواب دیندا ہے جو میں چُپ چاپ ہی ایہہ سارا غم سہہ رہیاں تے مونہوں بولڻ نال کیہ ملنا۔
جے رب نے میرے صبر دا بدلہ دتا تے ہیر نے کھیڑیاں دے گھر جا کے جیوڻا نہیں (یاں زندگی نہیں گذارنی)۔
ایہہ ایڈی بے انصافی دی گل ہوئی ہے جو جیویں قیامت دے دن بدلاں اتوں اسمان پاٹ جاوے گا۔ ایڈی وڈی واپری تے سارے جہاں نوں غم لگڻا ہے۔
جدوں اسمان اک واری پاٹ ہی گیا تے اک زمین دی تھاں دوجی زمین آ جاڻی ہے۔ پر پاٹے ہوئی اسمان نوں کوئی سیں نہیں سکدا ( دوجی زمین نوں ایس زمین دی تھاں روکڻ توں کوئی روک نہیں سکدا)۔
دلاں دے صبر جہان دی اُتلی تھلے کر دیندے نیں تے ایس لئی مینوں کجھ بکڻ دی کیہ لوڑ ہے۔
تسیں (ہیر دیاں سہیلیاں) ناسمجھ ہو تہانوں نہیں پتہ جو عشق کرنا نم دا کوڑا زہر شربت پیڻ وانگ ہے۔
وارث شاہ ہوریں وی کہندے ہیڻ جو بندے نوں چُپ رہ کے نا انصافی دا نتیجہ ویکھڻا چاہیدا ہے کیوں جو اُچے بولیاں کیہ ہو جاڻا ہے۔ جے وہیوڻا، ویاہ توں نکلیا ہے تے ایس دا مطلب ہے جو میرے رولا پاؤڻ نال کیہڑا میرا ویاہ ہیر نال ہو جاڻا ہے۔

کھلارواں مطلب
پچھلے بند وچ ہیر دیاں سہیلیاں رانجھے نوں کہیا سی جو توں ہیر نوں ایہہ ایہہ پُچھ تے اوس نال دغا دیڻ دی گل کر۔ ایس بند وچ وارث شاہ دوگلاں کر رہے ہیڻ: اک تے ایہہ جو اک مقام آ جاندا ہے جتھے چُپ تے صبر ہی چنگا ہوندا ہے تے صبر ہی دوجی دھر نوں مُکا دیندا ہے۔ دوجا اوہ ہیر دیاں سہیلیاں نوں سمجھا رہیا ہے جو ایہہ گل ایڈی سِدھی نہیں جیویں اوہ سمجھدیاں ہیڻ کہ ہیر نوں کھریاں کھریاں سڻا کے معاملہ مُک جاوے گا۔ سگوں اوہ کہندا ہے جو عشق کرنا نِم دا کوڑا شربت پیڻ وانگ ہے جیس لئی حوصلے تے صبر دی لوڑ ہے۔ جیویں نم دا پاڻی خون دی صفائی کردا ہے اِنج ہی عشق وی بندے دی صفائی کردا ہے اوہنوں شوہدے بندیاں طرحاں رولا پاؤڻ توں روکدا ہے۔

دوجے مصرعے وچ اوہ کہندا ہے جو جے رب نے اوہدے صبر دا بدلہ دتا تے ہیر کھیڑیاں دے گھر جی نہیں سکدی۔ رانجھے نوں یقین ہے جو ہیر مرد دے نال جیس طرحاں دے آزادی دے ساک دا سواد چکھ چکی ہے اوہ کھیڑیاں دے گھر جی ہی نہیں سکدی۔ اوہ اک عام بیوی بڻ کے حیاتی لنگھا ہی نہیں سکدی۔

ایسے گل نوں فیر مذہب دی رمز وچ دسیا گیا ہے۔ پہلے ایہہ کہیا گیا جو اوہدے غم نال بدلاں اُتے دا سمان پھٹ جاوے گا۔ فیر ایہہ کہیا گیا جو جدوں اسمان پھٹ جاوے گا تے اک زمین دی تھاں دوجی زمین لے لوے گی تے فیر پاٹے ہوئے اسمان نوں کوئی سیں نہیں سکدا۔ ہیر رانجھے دے عشق دا وی اک جہان سی، اوہدی اِک زمین تے اک اسمان سی۔ ایہدا اِک مطلب تے ایہہ ہے جو ہُڻ جدوں ہیر دا ویاہ ہو گیا تے اوس اسمان نے پھٹ جاڻا ہے اوس زمین دی تھاں نویں زمین آ جاڻی ہے تے ایس نوں فیر کوئی موڑ کے پہلی زمین نوں واپس نہیں لیا سکدا۔ ایسے لئی مذہبی سینتاں توں فوراً بعد دلاں دے صبر دا جہان پُٹڻ دا ذکر ہے۔

ایس سینت دی دوجی پڑھت اِنج ہے کہ رانجھا کہہ رہیا ہے جو سب نوں لگدا ہے ہیر دے ویاہ نال کیہڑا اسمان پھٹ جاڻا ہے۔ اوہ کواری سی تے عشق کر رہی سی ہُڻ کسے نال ویاہ ہوگیا تے اوہ کھیڑے دی بیوی بڻ کے جیوڻا شروع کر دیوے گی۔ عام لوک سمجھدے ہیڻ جو عام طور تے انج ہی ہوندا ہے تے اِنج ہی ہوندیاں رہڻا۔ایہہ اک طرحاں دا وگڑی کُڑی نوں ٹھیک کرن دا علاج سمجھیا جاندا ہے۔ پر رانجھا کہہ رہیا ہے جو اوہدا صبر ایڈا ڈوہنگا ہے کہ اِنج نہیں ہوڻا۔ ہیر نے عام کڑیاں طرحاں کھیڑیاں دے گھر نہیں وسڻا۔ مطلب سماج دے ورتارے دا اسمان پھٹ جاڻا ہے تے اک نویں زمین نے آ جاڻا ہے۔ اوہ ایہہ ہے جو ہیر دا ویاہ کرکے اوس نوں عام کُڑیاں دی طرحاں وسڻ دا فارمولا ایتھے نہیں چلڻا۔

ایس بند وچ چُپ وٹ کے سہہ جاڻا تے صبر کر لیڻا نوں ایہہ وی سمجھیا جاوے گا جو ایہہ آپڻی بے وسی نوں منڻ والی گل ہے۔ تے بے وس بندہ کر وی کیہ سکدا ہے؟ پر وارث شاہ ہوریں رانجھے راہیں ایتھے ایہہ کہہ رہے ہیڻ جو آپڻے پورے جتن کرکے کدی کدی دیکھڻا وی پیندا ہے تے نتیجہ پل وچ ہی ساہمڻے نہیں آجاندا۔ رانجھے نے ہیر نال چلاؤ اکھ مٹکا نہیں سی کیتا سگوں عشق وچ باراں سال جنگل بیلیاں وچ مجھاں چاریاں سڻ۔ ایس کرنی تے اوس نوں یقین ہے جو اوہدے صبر یاں اوہدی کرنی دا نتیجہ ضرور نکلے گا۔

ایسے لئی فیر اوہ کھول کے سہیلیاں نوں کہندا ہے جو تُسیں ناسمجھ ہو جو ایس گل دا تت نہیں سمجھدیاں۔ تے اوہناں نوں مثال دیڻ لئی کہندا ہے جو تسین عشق نوں اِنج سمجھو جیویں کوڑا شربت پیڻا ہوندا ہے۔ رانجھا ایہہ کوڑا شربت باراں سال توں پی رہیا ہے تے ایس ویلے جد ہیر دا ویاہ متھیا گیا ہے تے ایہہ کوڑے شربت دا اک ہور کوڑا گُھٹ ہے۔

ایہناں ہی معنیاں وچ وارث شاہ صبر دی دی گل کر رہے ہیڻ۔ جو بندہ سماج نوں اگے ودھاؤڻ دے جتناں وچ رُجھ جاوے تے رانجھے وانگ اوکھت جھلے تے فیر اوس نوں رولا نہیں پاؤڻا چاہیدا۔ صبر نال ویکھڻا چاہیدا جو اخیر سٹا کیہ نکلدا ہے۔ اج جو مرداں زنانیاں نوں اک دوجے نال جُڑن دی کُھل ہے (بہتیاں مُلکاں وچ) اوس دے پچھے پتہ نہیں کنیاں رانجھیاں سینکڑیاں سال مجھاں چاریاں ہیڻ تے کنیاں ہیراں قربان ہوئیاں۔ ایہہ اوہناں دیاں کرنیاں یاں صبر ہے جیس دا پھل اجوکا زمانہ کھا رہیا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels