Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 183

ہیر وارث شاہ: بند 183

September 22nd, 2011
4.5 / 5 (2 Votes)

رل ہیر تھے آئیاں پھیر سبھے رانجھے یار تیرے سانوں گھلیا ای
سوٹا ونجھلی کمبلی سُٹ کے تے چھڈ دیس پردیس نوں چلیا ای
جے توں انت اوہنوں پچھا دیونا سی اُس دا کالجا کاسنوں سلیا ای
اساں ایتنی گل معلوم کیتی تیرا نِکل ایمان ہُن چلیا ای
بے صدق ہوئی ایں صِدق ہاریوئی تیرا صِدق ایمان ہُن ہلیا ای
اوہدا ویکھ کے حال احوال سارا ساڈا روندیاں نِیر نہ ٹھلیا ای
ہائے ہائے مُٹھی پھرے نیک نیتی اوہنوں سکھنا کاسنوں گھلیا ای
نِراس دِی راس لے عشق کولوں سقلات دے بیاں نوں چلیا ای
وارثؔ حق دے تھوں جدوں حق کھُتھا عرش رب دا تدوں تر تھلیا ای

اوکھے لفظاں دے معنے
کمبلی: بھورا، کمبل۔
سلیا:پھٹڑ کیتا، اوہدے دل وچ چھید یاں سوراخ کردتا۔
ہائے ہائے مُٹھی: ہائے ہائے میں لُٹی گئی یاں گیا۔
سکھڻا: خالی خولی۔
نراس: بے امید۔
راس: بیوپار لئی ہتھ وچ مُڈھلا سرمایہ۔
سقلات : لال رنگ دا اک کپڑا، تنبو قناتاں بناؤڻ والا اک کپڑا۔
بیا: ایک جولاہا، پکھو۔
کھتھا: کھوہیا گیا۔
تھر تھلیا: کنبیا

سدھا مطلب
ہیر دیاں سہیلیاں رل کے ہیر کول گئیاں تے اوہناں کہیا جو سانوں تیرے یار رانجھے نے گھلیا ہے۔
اوہ آپڻا سوٹا ونجھلی تے بھورا سُٹ کے کِتے ہور مُلک ول نوں چلیا ہے۔
جے توں اوہنوں اخیر دغا ہی دیڻا سی تے فیر اوہدا دل کیوں پھٹڑ کیتا۔
سانوں اینا پتہ لگ گیا ہے جو توں ایمان چھڈ بیٹھی ہیں۔
توں سچ دی راہ نوں چھڈ کے کراہے پے گئی ایں۔ تیرا ایمان تے صدق دوہیں چلے گئے نیں۔
رانجھے دا حال ویکھ ویکھ کے ساڈے اتھرو نہیں ڈکے جاندے۔
میں لٹی جاواں اوہ تے بڑی نیک نیت نال تیرے نال سی تے توں اوس نوں خالی ہتھ چھڈ کے کیویں گھل رہی ایں۔
اوس کول ہُڻ عشق وچ ناامیدی دی ہی پونجی ہے اوس نال کیہڑیاں بناتاں اُڻ لوے گا۔
وارث شاہ وی کہندا ہے جد حقدار کولوں حق کھوہیا جاوے تے رب دا عرش وی کنب جاندا ہے۔

کھلارواں مطلب
ایس بند وچ سہیلیاں ہیر نوں رانجھے دے مندے حالاں بارے دسدیاں ہیڻ تے اوس تے دوش لاؤندیاں ہیڻ جو اوہ بے ایمان ہوکے سدھا راہ چھڈ رہی ہے۔ تے اخیر تے ایہہ وی کہندیاں ہیڻ جو ایڈی ناانصافی ہے جو رب دا عرش وی کنب جاوے ۔ مطلب رب لئی وی ایہہ گل اجیہی ہے جو اوس دا بڻایا سب توں اُچا تھاں وی کنب جاوے گا۔ مطلب رب دا نظام ہل جاوے گا۔

ایہہ ساریاں گلاں گھٹو گھٹ اوہو ہیڻ جو سہلیاں نے رانجھے نوں کہیاں سڻ جو توں جا کے ہیر نوں کہہ۔ جد رانجھے نے کہیا جو اوہ چُپ وٹ کے صبر نال ویکھے گا جو ایس بے انصافی دا کیہ سٹا نکلدا ہے تے فیر اوہ آپ ہی ایہہ گل ہیر نوں کہڻ آ گئیاں ہیڻ۔ اوہ رانجھے دیاں سنگی دھراں ہیڻ تے اوہ ہیر نوں ایہہ سب گلاں کہیاں بنا رہ نہیں سکدیاں۔ اوہ آپڻا ایہہ حق وی سمجھدیاں ہیڻ جو اوہ ہیر رانجھے دے عشق دیاں محرم تے راز دار سڻ۔ ایس لئی ہیر اوہناں نوں ایہہ نہیں کہہ سکدی بئی کاہدا عشق تے کاہدا قول اقرار۔ اوہنوں کوئی جواب دیڻا پوے گا۔

تسیں ویکھو وارث شاہ دی کہاڻی وچ اجے تیکر کوئی اجیہا مرد نہیں آیا جیہڑا اوہدا محرم راز ہووے یاں اوہدا پکھ پوردا ہووے۔ بھاویں سہیلیاں ہوڻ تے بھاویں مِٹھی نائڻ سب عورتاں ہی ہیڻ جیہڑیاں اوہناں دا آسرا ہیڻ۔ ایہدا مطلب ہے جو عورت ہی سب توں بہتی مدھولی ہوئی ہے تے اوہو کسے تے ہوندا ظلم نہیں ویکھ سکدی۔ جے تھلڑے میل دے مرد رانجھے دے حمائتی وی ہوڻ گے تے اینے جوگے نہیں جو چوچک یاں سیالاں کولوں ایس ناانصافی بارے سوال کر سکڻ۔ پر وکھریاں وکھریاں ذاتاں تے طبقیاں توں آئیاں ہیر دیاں سہیلیاں وچ اک آپڻی سانجھ ہے اوہناں دی اوہو سانجھ ہیر نال ہے۔ ایسے لئی اوہ ہیر کولوں ایہہ سوال پُچھ سکدیاں ہیڻ۔

اک ہور گل ایتھے وچارڻ جوگ ہے جو ایہہ پہلی واری ہے جو رانجھا آپڻی ونجھلی چھڈ رہیا ہے۔ جدوں اوہ تخت ہزاریوں نکلیا سی تے اوتھوں نال لے کجھ نہیں چلیا، صرف ونجھلی ہی لئی سی۔ ایہہ مقام پہلی وای اوس دی زندگی وچ آیا ہے جو اوہ ونجھلی چھڈ رہیا ہے۔ ہیر دیاں سہلیاں جدوں کہندیاں ہیڻ جو اوہ سوٹا، ونجھلی تے کملی سُٹ کے جا رہیا ہے تے ایہہ اعلان ہے جو وارث شاہ ہُڻ رانجھے نوں کسے ہور پدھر تے لے کے جا رہے ہیڻ۔ ونجھلی دی تان رانجھے دی جوانی وچ آزادی دی تاہنگ سی جس دا دوجا روپ ہیر نے دھاریا۔ سوٹا تے کمبلی اوہدا باراں سال دا چلہ سی جیہڑا اوہنے ہیر دے ناں تے کٹیا۔ ہُڻ حیاتی دی ایہہ منزل مُک گئی جس نوں وارث شاہ نے اسمان دا پاٹڻا تے نویں زمین دا پراڻی زمین دی تھاں لیڻا آکھیا سی۔ ہڻ اگلی منزل ہے۔

ایس منزل تے اوس نوں ونجھلی دی لوڑ نہیں کیوں جو اوہدا ہر ساہ ونجھلی دی تان تے اگ بڻ چکیا جیس نوں وارث شاہ نے صبر تے صدق دی چُپ کہیا سی۔ ہُڻ اوہنوں سوٹے تے کمبلی دی لوڑ نہیں کیوں جو اوہدا انگ انگ اوہ بڻ چکیا جیس دی سینت سوٹا تے کمبلی سڻ۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels