Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٦٩

ہیر وارث شاہ بند ٦٩

March 18th, 2008
5 / 5 (1 Votes)

مینوں بابلے دی سونہہ رانجھیا وے مرے ماؤں جے تدھ تھیں مُکھ موڑاں
تیرے باہجھ طعام حرام مینوں تُدھ باہجھ نہ نین نہ انگ جوڑاں
خواجہ خضر تے بیٹھ کے قسم کھادی تھیواں سور جے پریت دی ریت توڑاں
کوڑی ہوء کے نین پران جاون تیرے باہجھ جے کونت میں ہور لوڑاں

مشکل لفظاں دے معنے


بابلے۔ پیو
سونہہ۔ قسم
نین۔ اکھیاں
انگ۔ جثہ، جثے دے حصے، رشتہ
خواجہ خضر۔ اک بزرگ جیہڑے سدا جیون گے۔ اوہ دریا دے کنڈھیاں تے سفر کردے ہین تے بندے دے روپ وچ آکے بھلیاں راہیاں نوں راہ پاوندے نیں۔ ملاح تے پانیاں نال جڑیا کم کرن والے اوہناں دی بہت مانتا کردے ہین۔
تھیواں۔ ہوواں
نین پران۔ اکھاں تے باقی جثہ
کونت۔ خاوند

سدھا مطلب

ہیر[ رانجھے نوں یقین دواؤن لئی] کہندی ہے جو مینوں اپنے پیو دی قسم ہے جو میں قائم رہواں گی۔ جے میں تیرے توں مکراں تے میری ماں مر جاوے۔
تیرے بغیر مینوں کھانا پیا وی حرام ہے تے تیرے توں وکھ کسے نال میں اکھ یاں جثے دا رشہ نہیں جوڑاں گی۔
میں خواجہ خضر نوں حاضر ناظر جان کے قسم کھاہدی ہے جو میں پریت دی ریت توڑاں تے میرا مونہہ سور وانگ ہو جاوے۔
جے تیرے توں وکھ میں کسے ہور نوں اپنا خاوند مناں تے میں انھی لولی ہو جاواں۔

کھلارواں مطلب

ایس بند وچ ہیر ہر اوہ قسم کھاندی ہے جیہڑی اوس زمانے وچ وڈی سمجھی جاندی سی۔ ایس لئی ایس بند وچ اک تے ایہہ پتہ لگدا ہے جو ہیر ہر طرحاں نال رانجھے نوں اعتبار دواؤن دے جتن کر رہی ہے تے دوجے پاسے ایہہ وی پتہ لگدا ہے جو اوس ویلے سماج وچ کیہڑے رشتے تے کیہڑیاں ہستیاں نوں وڈا منیا جاندا سی۔ قسم کھان والا اج دی طرحاں رب رسول دی نہیں سگوں انسانی رشتیاں دی تے اپنی ہوند دی قسم کھاندا سی۔ لگدا ہے جو سماج دی اک خاص پدھر تے جا کے ماں پیو دی تھاں رب رسول دی قسم بہتی عام ہوئی۔ ایہہ بدلی آپ وچار یوگ ہے۔

سانوں سب توں پہلاں تے ایہہ پتہ لگدا ہے جو ماں پیو دی قسم بڑی وڈی سی۔ تے جے کوئی کہوے جو میں مکراں تے میری ماں مر جاوے تے عقیدہ سی جو ماں مر جاوے گی۔ ہر جی لئی ماں سب پیاری ہستی ہوندی ہے ایس لئی اوسے دی ہی قسم کھاہدی جاندی سی۔ مطلب ماں دا مرنا ہور وڈیاں طاقتاں نوں ناراض کرن نالوں وڈا سی۔ ایہدا ایہہ وی مطلب ہے جو جیون دین والی ہستی ماں سب توں اُچی منی گئی۔

دوجی وڈی سونہہ کھاون دی ہے۔ ایہہ اجے تیکر وی کافی حد تائیں دیسی بندیاں وچ چل رہی ہے۔عام طور تے کہیا جاندا ہے ''ویکھو جی رزق میرے سامنے ہے، میں جھوٹ نہیں بول سکدا'' مطلب رزق نوں ساہمنے رکھ کے جھوٹ بولنا اوس رزق توں وانجے جانا ہے۔ ایہہ عقیدے دا حصہ سی تے کسے حد تائیں اج وی ہے۔ اسیں ایہہ وی جاننے ہاں جو پرچلت عقیدیاں پچھے لوکائی دے تجربے ہوندے ہین۔

پرانے ویلیاں وچ کھاہد خوراک بڑی پوتر منی جاندی سی۔ ہن تیکر کہیا جاندا ہے جو رزق ضائع نہیں کرنا چاہیدا گناہ ہندا ہے۔ ایس دی وجہ ایہہ وی ہے جو پرانے زمانے وچ کھاہد خواراک سی وی بڑی گھٹ تے بہتا چر نسان قدرتی واپریاں دا غلام رہندا سی۔ ایس لئی سوکے، کال، ہڑ تے طوفان اوس نوں بھکھ تے بیماری نال مار جاندے سن۔ ایس لئی رزق دی تعظیم کرنا انسان دا اپنے آپ نوں جیوت رکھن لئی ضروری قانون سی۔ ایسے لئی اوس دی قسم وی کھاہدی جاندی سی تے ہے۔ ایسے لئی ہیر وی ایہو قسم کھا کے یقین دواؤندی ہے جو جے اوہ کسے ہور نال اکھاں یاں انگ جوڑے تے اوس تے طعام حرام ہو جاوے۔

تیجے مصرعے وچ خواجہ خضر دی سونہہ کھاہدی جا رہی ہے جیہڑا دریا دے کنڈھے رہن والیاں (جیویں جھنگ) وچ بہت ہی منے جاندے سن۔ خواجہ خضر روپ وٹا سکدے سن تے ایسے لئی قسم کھاندیاں کہیا گیا ہے جو جے میں پریت دی ریت توڑاں تے میری شکل سور ورگی ہو جاوے۔ مطلب جے اوہ قسم بنھے گی تے خواجہ خضر آپ ہی اوس دی شکل سور ورگی کر دین گے۔

اخیر تے اپنے جثے دی سونہہ کھاہدی جا رہی ہے۔ جو جے میں تیرے بنا کسے ہور نوں اپنا خاوند مناں تے میں کوڑھی انھی تے لولی ہو جاواں۔ مطلب میں سماج وچ نہ اپنے تے نہ ہی کسے ہور دے قابل رہواں۔

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels