Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٧٠

ہیر وارث شاہ بند ٧٠

March 19th, 2008

چیتا معاملے پین تے چھڈ جائیں عشق جالنا کھڑا دوہیلڑا ای
سچ آکھنائی ہُنے آکھ مینوں ایہو سچ تے جھوٹ دا ویلڑا ای
تاب عشق دی جھلنی کھری اوکھی عشق گرو تے جگ سبھ چیلڑا ای
ایتھوں چھڈ ایمان جے نس جاسیں انت روز قیامتے میلڑا ای

مشکل لفظاں دے معنے

چیتا۔ خیال، شعور
جالنا۔ برداشت کرنا۔ جھلنا
دوہیلڑا۔جے ایس نوں شریف صابر ہوراں طرحاں دُھیلڑا پڑھیا جاوے تےایس دا مطلب اوہناں مشکل، بھاری، ناقابل گذر دسیا ہے تے بابا فرید دا حوالہ دتا ہے پل صراط دا پند دُھیلا۔ پر ایس نوں جے انج وچاریا جاوے جو ایہ دو حیلیاں والا کم ہے۔ جیس دا مطلب ہے جو بندے نے دوگنا ٹل لاونا پیندا ہے۔
ویلڑا۔ ویلا
تاب۔ چمک گرمی، لشکارا
کھری اوکھی۔ سچی مچی اوکھی، بڑی اوکھی
انت۔ اخیر
قیامتے۔ قیامت
میلڑا۔ ملاپ

سدھا مطلب۔

پہلے مصرعے وچ رانجھا ہیر نوں خبردار کردا ہے جو ویکھ جدوں اوکھت پئی تے توں وعدہ بھل کے نس نہ جائیں کیوں جو عشق نوں جھلنا بڑا اوکھا ای۔
میں تینوں آکھنا جو جو کجھ کہنا ہے ہنے کہہ لے، ہنے سچ تے جھوٹ نوں نکھیڑن دا وقت ہے۔
عشق دے لشکارے تے اوسدی گرمی جھلنی بڑی اوکھی ہے کیوں جو عشق گرو ہے تے ساری دنیا اک چیلا یا شاگرد ہے۔
جے ایس حیاتی وچ توں ایمان چھڈ کے نس جاویں گی تے اخیر قیامت دے روز میل ہونا ای۔ مطلب اوس ویلے تینوں وعدہ توڑن دی سزا بھگتنی پوے گی۔

کھلارواں مطلب

پہلے مصرعے دا پہلا لفظ چیتا بڑا وچار یوگ ہے۔ چیتا معاملہ پین تے چھڈ جائیں نوں انج وی پڑھیا جا سکدا ہے جو جدوں معاملہ پوے تے توں چیتا چھڈ جاویں۔ پر ایس دا ایہہ مطلب وی ہو سکدا ہے جو جد چیتے وچ معاملے پین، مطلب جدوں اندر پرانے سماج دی آدر بھاء تے عشق دی جنگ ہوئی تے توں چھڈ جاویں۔کیوں جو جدوں عشق سماج وچ اپنے آپ نوں منواؤن دی کوشش کردا ہے تے وڈیاں توں وڈیاں اوکھتاں سامنے آؤندیاں نیں۔ ماں پیو، سکے سودھرے خاندانی ریتاں دی دہائی دیندے نیں۔ قاضی مذہب لے کے عشق نوں رد کرن دی کوشش کردا ہے۔ ظاہر گل ہے جو ایہو جیہے ویلے بندے دے شعور وچ بھچال آجاندا ہے۔ اوسنوں پتہ نہیں لگدا جو سچ کیہڑا ہے تے کیہڑی دھر حق تے ہے۔ ظاہر گل ہے ایہو جیہے ویلے بہت سارے لوک نس جاندے نیں۔ اوہناں دا شعور پچھونہیاں سوچاں ول مڑ جاندا ہے۔
ظاہر گل ہے جو عشق دی جھال جھلنی بڑی اوکھی ہے۔ وارث شاہ ایس مصرعے وچ کھرا دوہیلڑا تے تیجے مصرعے وچ کھری اوکھی دے لفظ ورتدا ہے۔ کھرا ہوون دا مطلب ہے سچی مچی، پوند۔ کھرا دا مطلب خالص وی ہے۔ ایہہ ادھار دا الٹ وی ہے۔ مطلب ایہہ کہ ایہہ ہو ہی نہیں سکدا جو جو عشق مشکل نہ ہووے۔ اہناں مشکلاں دے آؤن وچ نہ کوئی شک ہونا چاہیدا ہے تے نہ ہی ایہہ کہ شاید ویلا بنا اوکھت دے ٹپ جاوے، یا اوکھت نوں ٹالیا جا سکے۔

تیجے مصرعے وچ وارث شاہ عشق نوں اک لشکارا، اک گرمی چڑھاون والا جذبہ کہندا ہے۔ مطلب عشق اک لشک، اک چمک ہے جیہناں نوں اکھیاں جھل نہیں سکدیاں یا عشق دی گرمی انسانی جثہ سہہ نہیں سکدا، سڑ کے سواہ ہو جاندا ہے۔ دوہاں پکھاں توں گل اک ہی ہے، جو عشق دی چمک نال اکھیاں دنیا دے چالو ورتارے نوں ویکھنا تے مننا بند کر دیندیاں ہین۔ ورتارے نوں ویکھن والی اکھ عشق دی چمک نال انھی ہو جاندی ہے، مطلب اوس دا ویکھن ڈھنگ مڈھوں بدل جاندا ہے۔ جثے تے سریر دے سڑن دی رمز وی ایہو ہے جو اوہ جثہ تے سریر تے دنیا دے ورتارے نوں چلاؤن دے کم آ رہیا سی مک جاندا ہے تے اک ہور ہستی پیدا ہو جاندی ہے۔

ایسے لئی مصرعے دے دوجے حصے وچ عشق نوں گرو تے جگ نوں چیلا کہیا گیا ہے۔ گرو عشق دیاں ساریاں جھالاں جھل کے نتر تے نکھر گیا ہے، اوہ ہن جگ نوں اپنی راہ تے چلاؤندا ہے۔ جگ چیلا ہے جیس وچ اجے کھوٹ ہے، اوہ اجے عشق دی جھال جھل کے نتریا نہیں۔ ایسے لئی اوہ گرو اگے نیوندا ہے۔

انسانی سماج دے ارتقاء پکھوں وی ایہہ گل سچ ہے۔ کیوں جو جاگیرداری سماج وچ اک مرد تے زنانی دا ذات برادری تے طبقے نوں اک دوجے لئی چھڈ دینا ، آپ اپنی پسند سہیڑن دے خیال اج بہتی دنیا وچ عام ہین۔ ہن بہتی دنیا وچ مرد تے زنانی اک دوجے نوں پسند کر لین تے سماج وی من لیندا ہے۔ پر انساناں نوں ایہہ حق بنا قربانی دے نہیں ملیا۔ ایس وچ ہیر رانجھے ورگے کئی جنے کوہے گئے تے صدیاں یدھ ہوندا رہیا۔ ایس لئی جو ہیر تے رانجھا پرانے جاگیرداری سماج وچ کر رہے سن۔۔۔ بندے نوں بندہ سمجھ کے اوس نال جڑنا۔۔۔ اوہ خیال اپنے زمانے توں کتے اگے دا سی۔ ایس لئی ایہہ خیال گرو سی تے جو جگ کر رہیا سی اوہ کھوٹاں بھریا چیلا سی۔

ہن وی جدوں منڈے کڑی دا ویاہ ہُندا ہے تے اوہ دو جنیاں دا ملاپ نہیں ہُندا سگوں اک ٹبر دوجے ٹبر نوں ویاہوندا ہے۔ ایسے لئی ذات برادری تے خاندانی حیثیت ویکھی جاندی ہے۔ پرانے جاگیرداری سماج وچ تے ایہو جہیاں باندھاں ہور وی پکیریاں سن۔ اودوں تے کلی طور تے اک قبیلہ یا اک ٹبر دوجے نال ویاہ کردا سی۔ جیویں ہیر دے ویاہ ویلے سیالاں دی برادری اکٹھی ہو کے فیصلہ کردی ہے کہ تے رانجھے دے خلاف ہی نہیں رانجھیاں دی ذات دے خلاف فیصلہ دیندے ہین۔

رانجھیاں نال ہے کدی نہ ساک کیتا نہیں دتیاں اسیں کڑمائیاں وو

تے کھیڑیاں دے حق وچ دلیل دیندیاں کہیا گیا جو

نال کھیڑیاں دے ایہہ ساک کیجے دتی مصلحت سبھناں بھائیاں وو
بھلیاں ساکاں دے نال چا ساک کیجے دُھروں ایہہ جے ہُندیاں آئیاں وو

ایس لئی ایہو جیہے سماج وچ اک مرد تے اک زنانی دا ایس گل تے کھلو جانا جو اوہ ایہناں سب گلاں نوں نہیں منندے تے ٹبراں دی آپو وچ ویاہ دی تھاں اک دوجے نال انساناں دے طور ملنا چاہندے ہین عشق ہی کروا سکدا ہے۔ ظاہر گل ہے حیاتی دی ایس طرحاں دی سیدھ اک چمک ہی ہے جیہڑی ویہار تے ورتارے دیاں نیہاں ڈھاہ دیندی ہے۔ پر ایہہ اگونہی سوچ ہے، گرو ہے کیوں جو اخیر جگ نوں کدے نہ کدے اوس نوں من لینا ہے۔ جویں نویں زمانے نے من لیا جو مرد زنانی ہی اک دوجے نال جڑن گے ، ٹبر آپو وچ ویاہ نہیں کرن گے۔

اخیری مصرعے وچ قیامت دا ذکر ہے تے کہیا گیا ہے جو جے ایتھوں ایمان چھڈ جاویں گی تے قیامت دے دن حساب دینا پوے گا۔ قیامت ہر شے دے انت دی علامت ہے۔ اوس دن چنگے بھیڑے کماں دا نتارا ہونا ہے۔ تے رانجھا کہہ رہیا ہے جو جے ہیر نے وعدہ خلافی کیتی تے پھیر اوس دا بھرے گی۔

قیامت دا مطلب اک نویں زمانے دا پہلے والے زمانے نوں مٹا دینا۔ نواں زمانہ پہلے والے زمانے دا حساب کردا ہے، اوس دیاں بھیڑیاں کیتیاں تے واپریاں نوں مٹا دیندا ہے تے اوس دیاں اگونہیاں سوچاں نوں مانتا دیندا ہے۔ مثال دے طور تے اوہ سیالاں تے کھیڑیاں دے ورتارے مٹا دیندا ہے تے ہیر رانجھے دے ورتارے دی مانتا کر لیندا ہے۔ ایس لئی جے ہیر اپنا قول بھل کے سیالاں تے کھیڑیاں دے ورتارے وچ مُڑ جاوے تے زمانہ اوس نوں اُنج ہی مٹائے گا جیویں پرانا ورتارا مکا (یا مک جاوے گا)۔ جے اوہ صدق نال اپنے ایمان تے کھڑی رہوے تے پھیر اوس دی حیاتی سدا رہوے گی۔ ہیر صدق نال کھڑی رہی تے سدا لئی جیوت ہو گئی۔ ایہو اوس دی جنت ہے، اوس دا مٹ جانا اوس لئی دوزخ سی!

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels