Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند ٧١

ہیر وارث شاہ: بند ٧١

March 20th, 2008
5 / 5 (2 Votes)

تیرے ناؤں توں جان قربان کیتی مال جیو تیرے اتوں واریا ای
پاسا جان کے سیس میں لائی بازی تساں جتیا تے اسیں ہاریا ای
رانجھا جیو دے وچ تدبیر کرکے مہر چوچکے پاس سدھاریا ای
اگے پینچنی ہو کے ہیر چلی کول رانجھے نوں جاء کھلیاریا ای

مشکل لفظاں دے معنے

جیو۔ دل، جی
واریا۔ قربان کیتا
پاسا ۔ چوسر کھیڈن دا چھ پاسیاں والا قرعہ۔
جان کے۔ جاندیاں ہویاں، سوچ سمجھ کے
لائی بازی۔شرط لائی،
سدھاریا۔ گیا
پینچنی۔ چودھرانی، پنچائتی عورت

سدھا مطلب

[ہیر رانجھے دے شکاں تے وچاراں دا جواب دیندی ہے ] میں تیرے ناں اُتوں جان، مال، تے اپنا دل قربان کر چکی ہاں۔
میں قرعے نوں ویکھ کے اپنے سر نوں ایس بازی تے لایا ہے، تے توں ایہہ کھیڈ جت لئی تے میں ہار گئی
رانجھے نے دل وچ چنگی طرحاں سوچیا تے پھیر مہر چوچک ول ٹر پیا
ہیر اگے اگے اینویں ٹر رہی ہے جیویں کوئی وڈی پینچنی ہوندی ہے تے کسے سوالی نوں لے کے اودھرجا رہی ہے۔ اوس نے رانجھے نوں لے کے [اپنے پیو] چوچک دے کول کھڑا کردتا۔

کھلارواں مطلب

ایس توں پہلے بند وچ رانجھے نے ہیر نوں خبردار کیتا سی جو جیس عشق وچ توں وڑ رہی ہیں ایہہ جہان دا سب توں اوکھا کم ہے۔ عشق جگ دا گرو ہے جیس دے وچ توں پے رہی ہیں۔ ایسے لئی اوس دے جواب وچ ہیر کہندی اے جو میں تیرے اُتوں حیاتی دیاں دوہیں مڈھلیاں شیواں، جان، مال تے دل قربان کر چکی ہاں۔قربان کرن دا مطلب ہے اپنے وس نوں تیاگ دینا تے دوجے دے ناں لا دینا۔

جان مال تے جیو دی ونڈ وی بڑی وچار جوگ ہے۔ جان انسان دی ہوند ہے تے ایسے لئی اوہ بندے لئی سب توں پیاری شے ہے۔ ایس توں بعد مال ہے جیس نال بندہ اپنے طبقے دی حیاتی جیوندا ہے۔ ایہہ وی جان جنا ہی پیارا ہوندا ہے ۔ کیوں جو مال ، یعنی زمین بھانڈا تے ہور وستواں لئی لوک جان وی دے دیندے نیں۔ لوک مردے مر جاندے نیں اپنے مال توں وکھ نہیں ہوندے۔ ایس لئی ایہہ جان جِنا نہیں تے اوس توں گھٹ پیارا وی نہیں ہوندا۔ پر دل اہناں دوہاں توں تھوڑا وکھ وی ہے۔ جان تے مال تے بندہ کئیاں گلاں لئی دے دیندا ہے جنہاں وچ اوس دا دل وی نہیں ہوندا۔ پر دل دا وارنا اپنی پوری اندرونی ہوند نوں دوجے دے اختیار دینا ہے۔

جان مال تے قربان کرن دے فیصلے توں بعد ہیر ایہہ گل صاف کردی ہے جو میں ایہہ جوا سوچ سمجھ کے کھیڈیا ہے تے شرط وچ جو میں چیز داء تے لائی ہے اوہ میرا سر ہے۔ میں ایہہ کوئی ایویں چل چلاؤ وچ فیصلہ نہیں کیتا تے نہ ہی جذباتی فیصلہ کیتا ہے۔ سگوں میں قرعے دے پاسے ویکھے، مینوں پتہ سی میں ہار جانا ہے تے پھیر وی میں اپنے سر دی بازی لا دتی۔ یعنی میں ہارن لئی ایہہ بازی کھیڈی ہے تے کھیڈی وی سوچ سمجھ کے۔ تے اوہ کہندی ہے جو میں جتیا تے توں ہاریا ہے۔

رانجھے نے وی اپنے دل وچ تدبیر کیتی ہے۔ یعنی اوس نے ہر پاسے تے غور کیتا، اوس سوچیا جو ہیر کنی اک پکی یا کچی ہے تے پھیر اوہ ہیر دے پیو چوچک ول ٹرپیا۔ ''تدبیر'' تے زور پا کے وارث شاہ نے ایہہ گل صاف کیتی ہے جو عشق دا معاملہ ایویں وقتی سدھر دا ناں نہیں ہے، سگوں ایہہ ایسا عمل ہے جیس وچ ڈوہنگا وچار ہوندا ہے۔

چوتھے مصرعے وچ وارث شاہ پھیر راس دھاریا بن کے کہانی نوں تورن لئی آن حاضر ہوندا ہے۔ تے تھوڑے جیہے ہاسے والا منہ بنا کے ڈرامہ کردا ہے۔ ہیر نوں پینچنی بنا کے تورن نال وارث شاہ تھوڑی جیہی جگت وی کر رہیا ہے۔ اوس نوں پتہ ہے جو اوس توں پہلاں بڑیاں ڈوہنگیاں گلاں ہویاں ہین تے ہن ناٹک ویکھن والیاں نوں کجھ مُسکاون دا موقعہ وی دینا چاہیدا ہے۔

انج ہیر ہے وی اوس طبقے دی تے اوس دی چلنی پینچنی وانگ ہووے گی۔ تے سماج وچ رانجھا اک پردیسی ہے تے نویں سماج وچ سوالی لگدا ہے۔ ایس لئی ہیر جد اوس نوں نال لے کے پیو کول لے جا رہی ہے تے باہروں ویکھن والیاں نوں انج ہی لگدا ہے جیویں پینچنی ہیر بن کسے اک سوالی نوں لے کے پیو کول لے جا رہی ہے۔

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels