Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند ٧٤

ہیر وارث شاہ: بند ٧٤

April 3rd, 2008
5 / 5 (1 Votes)

کیہڑے چوہدری دا پُت کون ذاتوں کیہا عقل شعور دا کوٹ ہے نی
کیکوں رزق تے آب اُداس کیتا اس نوں کیہڑے پیر دی اوٹ ہے نی
فوجدار وانگوں کر کوچ دھانا مار جیوں نقارے تے چوٹ ہے نی
کنہاں جٹاں دا پوترا کون کوئی کیہڑی گل دی ایس نوں تروٹ ہے نی

اوکھے لفظاں دے معنے

رزق تے آب اداس۔کھان پین دا سامان مُک جانا، کھان پین توں رشتہ توڑ لینا
اوٹ۔اوہلا، حفاظت کرن ہار
فوجدار۔مغلیہ فوج دا علاقے دا فوجی ہیڈ ۔۔اجکل دا کور کمانڈر
کوچ۔ٹُر پینا،
دھانا۔ حملہ کرن یا زوراور رنگ وچ اگے ودھنا
نقارے تے چوٹ۔ فوج دے چلن ویلے نوبت یا تقارہ وجنا

سدھا مطلب

ہیر دا پیو پچھدا جو ایہہ کیہڑے چوہدری دا پتر ہے تے ایس دی ذات کیہہ ہے۔ ایس دی عقل وی کنج دی ہے۔
ایہہ روٹی پانی ترک کے کیوں چھڈ تریا تے ایس دی پُٹھ تے کیہڑا پیر ہے، جیس دی ایس نوں رکھیا ہے۔
ایہہ انج اپنی تھاں توں نقارے دی چوٹ کے حملہ آور ہویا جیویں مغلاں دا کوئی کمانڈر ہُندا
ایہہ کیہڑیاں جٹاں دی اولاد وچوں ہے (کیہناں دا پوترا ہے) تے ایس دی لوڑ کیہہ ہے؟

کھلارواں مطلب

پچھلے بند وچ ہیر دے پیو چوچک نے ہس کے تھوڑا جیہا پھرولیا سی جو ایہہ منڈا کس بندوبستی علاقے دا ہے (کیہڑے حاکم دی رعیت ہے) تے ایہہ ایڈا بانکا ہوکے مجھاں کیویں چارے گا۔ ہیر نے اوس دے جواب وچ رانجھے وچ ہر گُن گنوا دتا سی۔ شاید ایس توں چوچک نوں شک پیا جو اوس دی دھی نے پوری پچھانکاری نہیں کروائی۔ اسیں پچھلے بند وچ ایہہ وی لکھ چکے ہاں جو جاگیرداری سماج وچ بندے دی اپنی ذاتی کوئی ہوند نہیں ہُندی اوہ اپنے ٹبر، قبیلے تے ذات وجہوں پچھانیا جاندا ہے۔جے رانجھیاں دی ذات گھٹیا ہے تے فیر ہر رانجھا گھٹیا ہے۔ وغیرہ وغیرہ۔ جے بندہ بھیڑا کرے تے پورے خاندان تے ذات دا ناں ڈوبدا ہے تے جے چنگا کرے تے اپنے وگ دی شان ودھاؤندا ہے۔

ایس پچھوکڑ وچ چوچک اپنے سوالاں نوں کھلار کے پچھدا۔ پہلاں تے ایہہ جو کیہڑے چوہدری دا پُتر ہے۔ چوچک اوس دے مہاندرے تے نازک ہوون توں ایہہ گویڑ تے لا ہی بیٹھا ہے جو اوہ کسے کمی کارے طبقے دا مُنڈا نہیں ۔ ہے تے اوہ کسے چوہدری دا پُتر، پر کیہڑے دا؟ فیر ایہہ جو اوہ چوہدری ہے کس ذات دا؟ کیوں جو جاگیرداری سماج وچ غلط یا صحیح ہر ذات دیاں خاصیتاں وی متھیاں ہُندیاں نیں۔ (جیویں ایہہ کہ ورک جٹ چور ہُندے نیں۔ بھانویں ایہہ ہڈوں کُوڑ ہووے) اوس دے پیو تے اوس دی ذات دا پچھنا ایس لئی ضروری ہے جو چوچک نے اوس توں وی دھیدو دیاں اچھائیاں برائیاں دا گویڑ لاؤنا ہے۔

مصرعے دے دوجے حصے وچ چوچک ایہہ پچھ کے کہ ''کیہا عقل شعور دا کوٹ ہے نی'' عام سوال وی کر رہیا ہے پر اوسدے سوال وچ اک ٹوک جیہی وی ہے۔ اوسدا اک مطلب تے ایہہ ہے جو ایہہ ایڈا ہی عقلمند سی تے اپنی تھاہر، اپنی چودھر چھڈ کے مجھاں دا چروال کیوں بن رہیا۔ فیر ایہہ وی جو ایس دی عقل چترائی ہے کنج دی کیوں جو عقلمند تے چور وی ہُندا تے ٹھگ وی۔ ایس لئی چوچک گھروڑ کے اوس دی عقل بارے سوال کر رہیا ہے ، اوہ شاید ایہہ وی کہہ رہیا ہوے جو کِتے اوہ چالاکی ورت کے اوس دی دھی دے ساہمنے عقل مند بنی بیٹھا ہووے۔ فیر سوال ایہہ وی ہے جو کیہہ ہیر نوں پتہ ہے جو [اوس سماج وچ] عقل مندی ماپی کیویں جاندی ہے؟

دوجے مصرعے وچ چُوچک اوس دے گھر بار تے بھوئیں بھانڈے نوں چھڈن بارے پُچھ رہیا ہے۔چُوچک نوں ایہہ تے پتہ ہے جو ایس بندے دے نصیب ایس ویلے کوئی ایڈے چنگے نہیں ایسے لئی اوس دے دماغ وچ سوال آؤندا ہے جو کیہڑا پِیر ایس دی رکھیا (حفاظت) کر رہیا ہے۔ جٹکے سماج وچ پِیر دا سر تے ہتھ ہوونا وی لازمی جانیا جاندا سی۔ ظاہر گل ہے جدوں بندہ فرتے دے رحم تے جیوندا ہے تے اوس نوں روحانی طاقتاں دا ساتھ لبھنا پیدا ہے۔ تے چوچک لئی رانجھے دا گھروں بے گھر ہونا اوس دے پِیر دے کرنی والے نہ ہوون دی علامت ہے، یاں فیر رانجھے نے آپ ہی پِیر نال وگاڑ پا لیا ہووے جو اوس دا ایہہ حال ہویا۔ چوچک لئی اہناں سوالاں دے جواب جاننا ضروری ہین۔

تریجے مصرعے وچ گل سیاست تیکر اُپڑ گئی ہے۔ رانجھے دے آؤن نوں مغل فوج دے کمانڈر دے دھاوا بولن نال جوڑیا گیا ہے تے نال ہی ایہہ وی جو کمانڈر نقارے تے چوٹ مار کے دھاوا کرن آیا ہے۔ ایس بارے دو پکھ ویکھن جوگ ہین۔ اک تے ایہہ جو جٹالی دا بہت پرانا نظام مغلاں دے ہتھوں مک رہیا ہے۔ مصرعے وچ ویکھو چُوچک فوجدار دے ساہمنے بے وس دِسدا ہے۔ مطلب جے فوجدار نقارے دی چوٹ تے وی دھاوا بولے تاں وی جھنگ دے سیالاں کول اوس دا توڑ نہیں۔ ایس لئی مصرعے وچ مغلاں ہتھوں ہُندی بھن تُرٹ صاف دِس رہی ہے۔

ایسے مصرعے دا دوسرا پکھ ایہہ وی ہے جو کتے رانجھا فوجدار وانگوں نقارے دی چوٹ تے دن دیہاڑے اوہناں دے نظام نوں تروڑن تے نہیں آیا۔ ہیر دا اوس نوں لے کے آؤن تے چاپلوسیاں توں چوچک نوں ایہہ وی لگ رہیا ہے جو اوہ دن دیہاڑے آن کے اوہناں دے ویہار نوں اُتے تھلے کرن لئی آیا ہے۔اوس دا ایہہ ڈر کوئی بہتا جھوٹ وی نہیں کیوں جو رانجھا آیا تے ایسے لئی ہے جو چالو ورتارے نوں عشق دے ہتھیاراں نال ڈھاہ دیوے۔

اخیری مصرعے وچ اوس دے پچھوکڑ بارے پھیر پچھیا جا رہیا ہے جو ایہہ کیہڑی ذات دا تے تے ایس نوں کس شئے دی گھاٹ ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels