Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٧٨

ہیر وارث شاہ بند ٧٨

April 23rd, 2008
تیرا آکھنا اساں منظور کیتا مہیں دے سنبھال کے ساریاں نی
خبردار رہے مجھیں وچ کھڑا، بیلے وچ مصیبتاں بھاریاں نی
رلا کرے ناہیں نال کہنڈیاں دے ایس کدے نہیں مجھیں چاریاں نی
متاں کھیڈ رُجھے کھڑ جان مجھیں ہوون پنڈ دے وچ خواریاں نی

اوکھے لفظاں دے معنے

آکھنا۔ کہیا، سفارش
مہیں۔ مجھاں
رلا کرنا۔ کسے اک پاسے بہتا جھک جانا، کسے نال سدھا ورتارا نہ کرنا
کہنڈیاں۔کہنڈے سنگاں والیاں مجھاں
رُجھے۔ مصروف ہو جائے
کھڑ جان۔ گواچ جان

سدھا مطلب

[ہیر دا پیو ہیر نوں کہندا ہے] میں تیرا کہیا یاں تری سفارش من لئی، توں ایس (رانجھے) نوں ساریاں مجھاں سنبھال کے دے۔
ایس نوں دس دے جو جنگل وچ جاکے مجھاں نال چوکس رہوے کیوں جو جنگل وچ بڑیاں بھاریاں مصیبتاں ہین۔
ایس نوں ایہہ وی دس دے جو کہنڈی نسل دیاں مجھاں نوں دوجیاں نال نہ رلاوے (مطلب کہنڈیاں دا وکھرا خیال کرے)۔ ایس کدی مجھاں نہیں چاریاں تے ایس نوں اہناں باریکیاں دا پتہ نہیں۔
ایہہ نہ ہووے جو ایہہ جنگل جاکے کسے کھیڈ وچ رُجھ جاوے تے مجھاں گواچیاں پھرن جیس نال پنڈ وچ بے عزتی ہوندی پھرے۔

کھلارواں مطلب

ایہہ بند انج سدھا ہی لگدا ہے۔ ہیر دا پیو پہلاں تے رانجھے نوں نوکری وچ رکھن دا احسان ہیر تے رکھدا ہے، مطلب ذمے واری ہیر دی ہو گئی ہے۔ مالکاں دے پورے طبقے دی ایہہ عادت ہے جو اوہ کامیاں کولوں اوکھے توں اوکھا کم وی لین گے تے نال اوہناں تے احسان وی جتوان گے جو اوہناں نوں روزی دتی۔ سرمایہ داری نظام وچ وی سرمایہ دار کدی ایہہ نہیں کہے گا جو اوہ منافعے لئی کم چلا رہیا ہے، اوہ سدا کہے گا جو اوہ لوکاں لئی روز گار پیدا کر رہیا ہے۔ سو ایہو گل ہیر دا پیو چوچک کہہ رہیا ہے۔

نال ہی دوجے مصرعے وچ ایہہ وی من رہیا ہے چوچک جو جنگل وچ بڑیاں مصیبتاں ہین تے چروال دا کم کوئی سوکھا نہیں پر نوکری احسان نال ہی دے رہیا ہے۔ ایسے طرحاں تریجے مصرعے وچ اوہ پھیر کہہ کے جو ایس کدی مجھاں نہیں چاریاں تے ایہہ کنڈہیاں تے عام مجھاں وچ رلا کر سکدا ہے۔

اخیری مصرعے وچ چوچک دی گل توں لگدا ہے جیویں اوس ہیر دے رانجھے وچ دسے گناں نوں دھیانیا ہی نہیں۔ اہ اجے وی رانجھے نوں اک بے اعتبار مُنڈا سمجھدا ہے جیہڑا بھراواں بھرجائیاں نوں چھڈ کے آگیا ہے تے کم کار وچ دھیان نہیں دینا چاہندا۔ ایسے لئی چوچک کہندا ہے جو متاں ایہہ بیلے وچ جا کے کسے کھیڈ وچ رُجھ جاوے تے مجھاں رلدیاں پھرن جیس نال سارے پنڈ وچ خواری ہووے۔

چوچک جہان ویکھیا بندہ ہے تے اوس نوں رانجھے نوں ویکھدیاں ہی پتہ ہے جو ایہہ بندہ زندگی نوں کھیڈ بنا کے جی رہیا ہے، ایہدا چوہدر چھڈ کے آون وی ایس دی اک کھیڈ سی تے اگے وی شاید ایہہ کوئی کھیڈ ہی کھیڈے۔ چوچک ایس پکھ توں سچا وی ہے جو رانجھے نے اگے عشق دی کھیڈ کھیڈی۔ پر چوچک ایہہ جاندیاں وی اک سستے کامے دی طمع دل وچوں مار نہیں سکدا۔ ایہہ ٹھیک ہے جو اوہ اپنی دھی نوں وی راضی کرنا چاہندا ہے پر وڈی گل تے ہے جو اوس دا کامیاں بنا کم چل نہیں سکدا۔ بیلے دیاں مصیبتاں تے پنڈ وچ خواریاں دے ذکر توں پتہ لگدا ہے جو ایس مشکل کم لئی کامے لبھنے سوکھے نہیں۔ ایس لئی اوس دی طمع دا غالب آجانا ویہار دے مطابق ہے۔

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels