Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند 80

ہیر وارث شاہ بند 80

April 30th, 2008

مکھن کھنڈ پراوٹھے کھا میاں مہیں چھیڑ دے رب دے آسرے تے
ہسن گھبرو رانجھیا جال میاں گذر آوسی دُدّھ دے کاسڑے تے
ہیر آکھدی رب رزاق تیرا میاں جائیں نہ لوکاں دے ہاسڑے تے
مہیں چھیڑدے جھل دے وچ میاں آپ ہو بہیں اک پاسڑے تے

مشکل لفظاں دے معنے

آسرے۔ سہارے تے
جال۔ جھلنا، برداشت کرنا، شریف صابر ہواراں ایس نوں جالنا مصد توں دسیا ہے جیس دا مطلب ہے جائیں نہ پچھے نی جانا یا محسوس نہ کرنا۔
گذر آوسی۔ گذارہ ہووے گا
کاسڑے۔ نکے کاسے تے، یعنی پیالے تے
رزاق۔ رزق دین والا، جیون لئی لوڑیندیاں شیواں دیون ہار
ہاسڑے۔ ہاسے
جھل۔ سنگھنا جنگل
پاسڑے۔ اک بنے تے، اک طرف ہو کے

سدھا مطلب

[ہیر مان پیو نال گل مکاون مگروں رانجھے نوںکہندی آ) بئی توں کھنڈ پروٹھے کھا تے مجھاں نوں رب دے سہارے تے ہک لے جا
جوان منڈے [رانجھے نال ہسدے تے مخول کردے نیں)اوہ رانجھے دا ہاسہ پا کے کہندے نیں بئی ہن جو پئی اوس نوں جھل، برداشت کر کیوں جو تیرا گذارہ اک نکے جیہے ددھ دے پیالے تے ہوونا ہے۔
ہیر کہندی ہے میاں تینوں رب کھواوے گا توں لوکاں دے ہاسے پچھے نہ جاویں مطلب لوکاں دیاں جگتاں دا اثر نہ لویں
توں مجھاں نوں جنگل وچ ہک دیویں تے آپوں اک پاسے ہو کے بہہ رہویں

کھلارواں مطلب

ہیر نوں پتہ ہے جو رانجھا آپ چوہدری دا پتر سی تے اوس لئی چاکری کرنی سوکھی نہیں۔ خاص طور تے چاکری وچ پہلا پیر دھرنا تے ہور وی بہت اوکھا کم ہے۔ ایس لئی اوہ رانجھے نوں پھیر توں یقین دواندی ہے۔۔ اوہ اوس نوں مکھن کھنڈ تے پروٹھے کھاون دا کہہ کے ایہہ یقین دوانا چاہندی ہے جو توں کوئی نوکر نہیں تے تیرا کھاجا وی نوکراں والا نہیں ہووے گا۔ سگوں توں اچیچا پروہنا ہیں کیوں جو مکھن کھنڈ تے پروٹھے اچیچیاں پروہنیاں تے جوایاں نوں کھوائے جاندے نیں۔ اک طرحاں ہیر رانجھے نوں گھر دا جوائی من رہی ہے۔

ہیر اوس نوں نوکر نہ ہوون دا یقین وی دواندی ہے تے نال ہی حوصلہ دیندی ہے جو مجھاں نوں رب دے آسرے تے چھےڑ دے۔ اوس نوں پتہ ہے جو رانجھے نے کدی مجھاں نہیں چاریاں تے اوس نوں ایہہ کم آوندا وی نہیں۔ ایس لئی اوس نوں حوصلہ دین لئی خاص طور تے رب دے آسرے دی گل کردی ہے۔ رب دے آسرے دا ایہہ وی مطلب ہے جو ہور کسے جی دا کوئی آسرا نہیں ملنا تے ایہہ کم اکلیاں ہی کرنا پینا۔

ہیر تے اوس توں تسلیاں دے رہی ہے پر پنڈ دے دوجے مُنڈے اوس تے ہسدے نیں جو ایہہ بندہ چوچک دے اڑکے چڑھ گیا تے ایس نوں روٹی ٹُک وی نہیں ملنا۔ بس دُدھ دا اک نکا جیہے پیالے تے ٹرکا دتا جایا کرے گا۔وارث شاہ مُنڈیاں دی زبان راہیں دس رہیا ہے جو سماج وچ پیداواری وسیلیاں دے مالک جنہاں کامیاں کولوں پیداوار لیندے نیں اوہناں نوں اوہناں شیواں توں ہی وانجا رکھدے نیں۔ ایس گل نوں ساحر لدھیانوی نے وی اک شعر وچ انج کہیا سی جو مِلاں ایسے لئی ریشم دے ڈھیر بنندیاں نیں کہ قوم دیاں کڑیاں تند تند نوں ترس جان۔۔ سو وارث شاہ ایہو کہ رہیا جو چاک مجھاں چارے گا پر اوس نوں مجھاں دا ددھ وی رجھ کے نہیں پین دتا جاوے گا۔وارث شاہ ایس ہاسے دے مصرعے راہیں طبقاتی سماج دے سب توں کوڑے سچ نوں ننگا کر رہیا ہے۔

لوکاں دے ہاسے دے جواب وچ ہیر پھیر اوس نوں کہندی ہے جو تینوں رزق دین والا رب ہے توں لوکاں دے ہاسے پچھے نہ جاویں۔ رب دے رزاق ہوون دے اوہلے وچ ہیر اوس ایہ وی کہہ رہی ہے جو میں تیرے نال اُنج ہی جُڑی ہوئی آں جیویں رب بندے نال ہے۔ رب تے بندے دا ساک وی ان ڈٹھا ہے تے عشق دا سانگا وی رب وانگ ہے جو ہر ساہ دے نال ہے۔ سو ہیر رانجھے دا اوس ہر ساہ ول دھیان دوا کے کہہ رہی ہے جو توں لوکاں دے ہاسے تے نہ جا کیوں جو لوک ساڈے ساک نوں نہ سمجھدیاں چاہگاں کردے ہین۔

اخیری مصرعے وچ اپنے ساک نوں ہور اگھیڑن لئی ہیر کہندے ہے جو مجھاں نوں جنگل وچ چھڈ کے تے آپ اک پاسے بیٹھا رہیا کریں۔مطلب مجھاں کھاں خصماں دا سر تینوں بہتی پرواہ کرن دی لوڑ نہیں۔ ہیر ایہہ اگھیڑنا چاہندی ہے جو توں ایہہ نہ سمجھیں میں تینوں مجھاں چارن لئی گھیریا ہے، سگوں ایہہ تے اک بہانہ ہے تینوں لاگے رکھن دا۔

مجھاں دنیاداری دی سینت وی ہے۔پشو پال وسوں وچ دولت ڈنگر ہی ہوندے نیں۔ ایسے لئی ڈنگراں لئی اجے تیکر پنجابی وچ مال دا لفظ ورتیندا ہے۔ سو مجھاں نوں جنگل وچ چھڈ کے آپ پاسے بہن دا ایہہ وی مطلب ہے جو دنیاداری تے سماج دے چالو ویہار توں وتھ پا لینا، اوس توں دور رہنا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels