Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند 81

ہیر وارث شاہ بند 81

May 1st, 2008

بیلے رب دا ناؤں لے جا وڑیا ہویا دُھپ دے نال ظہیر میاں
ا'وہدی نیک ساعت رجوع آن ہوئی، ملے راہ جاندے پنج پیر میاں
بچا کھا چوری چُو مجھ بُوری جیو وچ نہ ہو دلگیر میاں
کائی نڈھڑی سوہنی کرو بخشش پورے رب دے ہو تسیں پیر میاں
بخشی ہیر درگاہ تھیں تدھ تائیں یاد کریں سانوں پوے بھیڑ میاں

مشکل لفظاں دے معنے

بیلے۔جنگل
ظہیر۔ کمزور، پریشان
نیک ساعت رجوع ہوئی۔ مبارک گھڑی آن پہنچی، چنگی قسمت دا ویلا آگیا
دلگیر۔ پریشان
نڈھڑی۔ جوان کُڑی
پورے۔ مکمل، رب نوں پہنچے ہوئے
درگاہ۔ رب دے تھاں توں، رب دے حکم نال
بھیڑ۔ مصیبت ، بپتا

سدھا مطلب

رانجھا رب دا ناں لے کے جنگل وچ جا وڑیا پر اوتھے دھپ نے اوس نوں بے حال کر دتا
پر اوس دی قسمت دی چنگی گھڑی وی پہنگ گئی، کیوں جو اوس نوں راہ جاندیاں پنج پیر مل گئے
[پیراں کہیا] بچیا چوریاں کھا، بوری مجھ دا ددھ پی تے دل وچ غم نہ کریا کر
[رانجھے نے پیراں نوںسوال پایا] جو تسیں رب دے رضا نال کامل پیر ہو تسیں مینوں اک سوہنی کُڑی بخش دیو
پیراں کہیا] تینوں تے رب ولوں ہیر بخش دتی گئی ہے تے جے تینوں کوئی اوکھت آوے تے سانوں یاد کریں۔

کھلارواں مطلب

ایہہ بند بڑا پیچ دار تے سینتاں نال بھریا ہویا ہے۔ ایس وچ رانجھے نوں پنج پیر پہلی واری ملدے نیں تے پھیر جد اوس تے بہتا بھارا ویلا آوندا ہے اوہ ظاہر ہوندے نیں۔ کیہہ رانجھے نوں سچی مچی پنج پیر ملے سن؟ پنجاں پیراں یا خواجہ خضر دا بھٹکیاں مصیبت وچ پیاں راہیاں نوں ملن دا ہور قصیاں وچ ذکر آیا ہے۔ پنج دے ہندسے دا وی ریت وچ مطلب ہے جیویں پنجتن، پنج حواس، پنج انگ وغیرہ۔

پیر دا راہ جاندیاں یا اجاڑ وچ کسے نوں مل جاون دے بارے وچ بابا فرید دے بھرا تے اوہناں دے مرید نے اک واری پچھیا سی۔ جو کیہہ اوہ اک ہی ویلے دو تھاواں تے ہو سکدے ہین۔ مطلب اوہ بیٹھے پاکپتن وچ ہین تے کسے نوں جھانسی شہر وچ وی مل رہے ہوون۔ بابا فرید نے سینت وچ جواب دتا سی جو انج ہوندا نہیں ایہہ صرف اعتقاد دی گل ہے۔

سوال ایہہ ہے جو ایس موقعے تے رانجھے نوں پنج پیر کیوں ملے تے ایس گل دا تت ہے کیہہ ہے؟ ایس توں پہلاں کیوں نہ ملے تے ایہہ قسمت والی گھڑی مجھاں دا چھیڑو (چروال) بن کے پہلے دن اوس ویلے ہی کیوں آئی جد رانجھا پہلی واری مجھاں چارن جنگل وچ گیا تے دُھپ نال اوسدا بُرا حال ہو گیا؟

جے ویکھو تے ہن تیکر رانجھا اک پینڈے پیا ہویا سی۔ اوہ تخت ہزارے اپنا بھوئیں بھانڈا چھڈ کے چالو ورتارے تے لت مار کے نکل تریا سی۔ اوس ملاں نال جھیڑا کیتا پھیر ملاح نال نبڑیا تے اخیر ہیر نال معاملہ طے کیتا تے اوسدے پیو دیاں مجھاں چارن دی چاکری کر لئی۔

ایتھوں تیکر وارث شاہ نے رانجھے راہیں سماج دے چار وڈھے اداریاں نال ٹکرا نوں اگھیڑیا سی۔ پہلاں تے جائیداد دے ادارے وچ کیویں بجھے لوک کیویں لالچی تے ظالم ہوندے نیں تے دوجے حکومت تے انصاف دا ادارے وچ کیویں ٹھگی تے وڈھی چیرا چلدا ہے۔ جائیداد دے ادارے دا گند وارث شاہ بھائیاں بھرجائیاں راہیں وکھایا تے انصاف دے پھوکے ہوون دا قاضی تے پینچاں راہیں جیہڑے رشوت لے کے رانجھے دے خلاف فیصلہ دیندے ہین۔ رانجھا اوس سماج نال اپنے بھراواں وانگ بن کے ٹھگی ٹھوری سکھ کے جی سکدا ہے پر اوہ اوس توں منکر ہو کے اوس نوں چھڈ تردا ہے۔

ملاں دے نال وارث شاہ نے ڈائیلاگ وچ چالو مذہب تے ملاں شاہی نوں ننگا کیتا تے اوس دی نکھیدی کیتی۔ وارث ژاہ وکھایا جو ملاں شاہی دا مذہب وی جائیداد تے انصاف دے ادارے وانگ بندے دا ویری ہے تے لوکاں نوں جھوٹیاں جکڑبندیاں وچ جوڑ کے اوسے طرحاں دا بندہ بناوندا ہے جیس طرحاں دے اوس دے بھرا تے قاضی پینچ سن۔

پھیر وارث شاہ نے رانجھے تے ملاح دے ٹکرا وچ کاروباری طبقے دے لالچ تے اوہناں دی انسان دشمنی دی نفی کروائی۔ ملاح کہندا ہے تے ایہہ ہے جو ''ایس رب کیہہ جانئیے بھین پاڑا'' جیہڑا ملاں دے باالکل الٹ ہے پر وارث شاہ وکھا رہیا ہے جو ویکھو اک دوجے دے الٹ ہوندیاں وی ملاں تے ملاح کیویں اکدوجے دے سکے بھرا لگدے نیں۔ ملاں کہندا ''کتا اتے فقیر پلیت ہووے دوروں کتیاں وانگ درکارئیے اوئے'' تے ملاح کہندا ہے ''ڈوماں اتے فقیراں تے مفت خوراں دوروں کتیاں وانگ دھرکارنا ہاں''

پر گوہ نال ویکھو تے ہن تیکر رانجھا وکھ وکھ اداریاں دی نفی کرن دے عمل وچ سی۔ پر ہیر نال عشق دی سانجھ چالو ویار دی نفی تے ہے پر نال اک بندے نال جٹر وی ہے ، سو ایس لئی ہن اثبات دی گھڑی ہے۔ ایس اثبات دی گھڑی وچ اوہنوں پہلی وار اپنا حیاتی ڈھنگ مڈھوں بدلنا ہے۔ ایسے لئی پچھلے بنداں وچ ہیر اوس نوں ہلا شیری دے رہی سی جو توں حوصلہ کرکے پیر پٹ لے۔ تے رانجھے نے پیر پُٹ لیا، مجھاں لے کے جنگل وچ وڑ گیا۔

جنگل دی اپنی ہیبت، اکلاپا تے دُھپ نا ہوئی بدحالی نے رانجھے نوں اک واری جھنجوڑیا ضرور ہووے گا۔ اوس وی سوچیا ہوے گا جو میں کیہڑے وخت وچ اپنے آپ نوں پا لیا ہے، ایس لئی اوہنوں اپنے اندر اوس طاقت دی لوڑ ہے جیہڑی اوکھتاں جر کے اپنی راہ تے کھلوتے رہن والیاں دی یاد ہی دے سکدی ہے۔ تے رانجھے دے سماج وچ اوہ ہستیاں وڈے پیراں دیاں ہی ہین۔ ایس لئی اوس فیصلے دی گھڑی جد اوہ تھڑک سکدا اوس دا اندر اک نویںحیاتی دی سرجنا لئی تیار ہوندا ہے۔ پیراں دا دسنا ایسے جذبے دی سینت ہے۔ اوہ پیر اوس دے اندر جاگے ہین تے اوہناں نے کہیا ہے جو کھا پی تے ہیر تیری ہے۔ مطلب اوس دا اوس گھڑی ہیر نال عشق دی پکیائی تے یقین بجھ گیا ہے۔

ایس پکھ تے بہت کجھ لکھیا گیا ہے پچھلے دناں اک فلم فلم وی بنی سی ''لگے رہو منا بھائی'' جیس وچ ہیرو گاندھی واد نوں اینا اپنے اندر سمو لیندا ہے جو اوس نوں پر اوکھے ویلے گاندھی نظر آوندا ہے۔ پر جد اک وکیل اوس کولوں گاندھی بارے اوہ سوال پچھدا ہے جیس دا اوس نوں پتہ نہیں تے اوسدی مشکل حل کرن لئی گاندھی وی نظر نہیں آوندا۔ مطلب اوس نوں گاندھی ایس لئی نظر آوندا سی جو اوس گاندھی واد نوں اپنے تن بدن وچ سمو لیا سی۔ ایسے طرحاں رانجھا وی عشق وچ تے روح دی صفائی وچ اینا سم چکیا جو اوس نوں پنج پیر نظر آوندے ہین۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels