Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند ٨٣

ہیر وارث شاہ: بند ٨٣

May 24th, 2008
5 / 5 (1 Votes)

ہیر چا بھتا کھنڈ کھیر مکھن مئیں رانجھے دے پاس لے دھاوندی ہے
تیرے واسطے جُوہ میں بھال تھکی رو رو اپنا حال وکھاوندی ہے
کیدو ڈھونڈدا کھوج نوں پھرے بھوندا باس چوری دی بیلیوں آوندی ہے
وارث شاہ میاں ویکھو ٹنگ لنگی شیطان دی کلا جگاوندی ہے


اوکھے لفظاں دے معنے

بھتا۔باہر کم کرن والیاں دا کھاجا
دھاوندی۔ پورا زور لا کے کتے پُجنا، شاید دھاوا وی ایس توں ہی بنیا ہے
جُوہ۔ علاقہ، ویران تے لمی چوڑی تھاں
بھال۔لبھنا، تلاشنا
باس۔ بو، خوشبو
بیلیوں۔ جنگل وچوں
کلا۔ لڑائی، جھگڑا، فساد۔۔۔کلا دا مطلب کاریگری وی ہے
شیطان دی کلا۔ شیطان دی کاریگری، یعنی فساد تے پٹھے راہ تے ٹورن دا ہنر

سدھا مطلب

ہیر کھاون دا سامان جیس وچ کھنڈ کھیر تے مکھن وی سی، رانجھے کول چھیتی توں چھیتی لے کے گئی
ہیر رانجھے نوں رو رو کے اپنا حال دسدی ہے جو اوہ کیویں اوس نوں جنگل وچ ڈھونڈ ڈھونڈ کے تھک گئی اے
کیدو ڈھونڈدا پھر رہیا ہے جو اوس نوں جنگل وچوں چُوری دی خوشبو آ رہی ہے۔ مطلب اوس نوں شک ہے جو ہیر رانجھے لئی چُوری لے کے ضرور گئی ہووے گی۔
(وارث شاہ ہوریں ڈرامے دے سین تے اپنی کومنٹری کردے کہندے نیں) کہ ہن ویکھو لنگی ٹنگ کیویں شیطانی کم کر کے فساد پیدا کرے گی۔

کھلارواں مطلب

پہلیاں دو مصرعیاں وچ تے سانوں پتہ لگدا ہے جو ہیر نے جو رانجھے نال قول اقرار کیتا سی اوہ اوس نوں نباہ رہی ہے۔ پہلے مصرعے تے اخیر وچ ''دھاوندی'' توں لشکارا پیندا ہے جو ہیر نوں رانجھے نوں سب توں چنگیاں شیواں کھوالن دی کنی کاہلی تے کنا چاء ہے۔ مطلب اوسدا وس نہیں چلدا نہیں تے اوہ اُڈکے رانجھے کول پُج جاوے۔

''دھاوندی'' توں سانوں ایہہ وی دِسدا ہے جو ہیر اپنے سماج تے دھاوا وی بول رہی ہے۔ ایس لفظ دی پچھوکڑ وچ وارث شاہ تے اوس ویلے ہر پاسے جٹالی دے مغلاں دے خلاف دھاویاں دا اثر وی ظاہر ہوندا ہے۔ تے ہیر جٹالی دے پرانے قبائلی پچھو پال راٹھا چاری دے مُڈھ تے دھاوا بول رہی ہے۔

پہلے تے خاص کرکے دوجے مصرعے وچ ہیر دے تیاگ دی شروعات دا وی اعلان ہے۔ جد ساڈا پہلی واری ہیر نال ٹاکرا ہویا سی تے اوہ اک اتھری تے آپ مہار کڑی سی جیہڑی سمجھدی سی جو اوس دا ہر پاسے راج ہے۔ اوہ جیس پاسیوں لنگھدی سی مست ہاتھی وانگ جاندی سی۔ پر ایتھے ویکھو اوہ عشق وچ اپنی میں تے ہنکار نوں تیاگ کے اک مجھاں دے کامے نوں روٹی کھواون لئی جنگل وچ خوار ہو رہی ہے۔ اوہ رانجھے نوں اپنا بھیڑا حال دس کے لاڈ وی منگ رہی ہے تے ایہہ وی دس رہی ہے جو اوہ صرف گلاں ہی نہیں سی کردی اوس نے عمل وچ وی اپنے طبقے دے سکھ نوں تیاگ دتا ہے۔

تِیجے مصرعے وچ وارث شاہ ہوشیاری نال کہانی نوں اگے ودھاون لئی جھبدے کیدو نوں لے آوندا ہے۔ وارث شاہ دی کلا ہی ایہہ ہے جو ایدھر اودھر نکیاں نکیاں گلاں تے ویلا نہیں گواؤندا تے اک پل وچ کہانی دے مڈھلے پاڑ ول لے آوندا ہے۔ اوہ ایس سین نوں لمکا وی سکدا سی تے ایس بند وچ صرف ہیر رانجھے دے لاڈ لڈا سکدا سی۔ پر اوہ ایہہ سب کجھ دو مصرعیاں وچ ولھیٹ کے اوس پاڑ ول آجاندا ہے جیس ایس کہانی دا مُڈھ بننا ہے تے جیس تے کہانی نے اگے ودھنا ہے۔ کیدو اوس پاڑ دا موہری بندا ہے۔

کیدو شیطانی مت ہے جو گلاں نوں دوروں سُنگھ لیندی ہے۔ جیویں شیطان نوں رب نے اپنے دربار وچوں دیس نکالا دے کے کڈھ چھڈیا سی انج ہی کیدو نوں وی پنڈ والیاں دھتکار کے پنڈوں باہر کلی وچ سٹیا ہویا ہے۔ اوہ ہِینا ہے تے پشو پال سماج یا واہی بیجی سماج دے اندر کسے کم نہیں آسکدا ۔۔ اوہ نہ مجھاں چار سکدا ہے تے نہ ہی واہی بیجی کرسکدا ہے ایس لئی اوس دی سماج دے اندر تھاں نہیں ہے، اوس نوں سماج نے کڈھ کے اک پاسے لا چھڈیا ہے۔ ایسے کرکے کیدو نوں وی سماج نال مڈھلی کَیڑ تے دشمنی ہے اوہ وی اوہناں دیاں مُڈھلیاں تھوڑاں تے اکھ رکھدا ہے تے سماج والیاں نوں گندہ کرن وچ ڈھل نہیں لاوندا۔

اوہنوں پتہ ہے جو چوچک نے جیس منڈے نوں لالچ وچ مجھاں چارن تے رکھیا ہے اوس دی ڈیل ڈول تے انگ نین چاکراں والے نہیں اوہ کسے ہور مار تے آیا ہویا اے۔ تے کیدو اوس گل دی کھوج وچ پھردا رہیا ہے جو رانجھے دی اصل نوں ننگا کرکے اپنے بھراواں نوں تھلے لا سکے۔ ایہہ دس سکے جو سماج دے رکھوالے اپنے لالچ لئی کیویں اکھاں بند کر لیندے نیں تے اپنیاں مڈھلیاں رِیتاں نوں کیویں النگھدے نیں۔

اوس نوں شک ہے جو ہیر رانجھے لئی چوری لے کے جاوے گی تے اوہ ایس تاڑ وچ بھوندا پھر رہیا ہے۔ اوس دی شیطانی حس چُوری نوں سُنگھ رہی ہے۔

اخیری مصرعے وچ وارث شاہ جاگیرداری سماج وچ ہِینے بندیاں دے خلاف مشہور محاورے نوں ورتدا ہے۔ پرانے سماج وچ ہِینے بندے دے بارے وچ کہیا جاندا سی جو اوہناں دی اک رگ ودھ ہوندی ہے۔ مطلب اوہناں وچ شرارت تے بھیڑے کم کرن دی یوگتا ودھیرے ہوندی ہے۔ہِینے بندے پیدواری عمل وچ تے حصہ لے نہیں سن سکدے ایس لئی اوہ اپنے دماغ ورتدے ہوون گے۔ سو ایس وچ سماج دا ہِینے بندیاں نال پیداواری عمل وچ حصہ نہ پاون پاروں کرودھ وی سی تے ہِینے بندیاں دا اوس دے جواب وچ اپنے ہنر چلاون دے داء دپھے وی سن۔ ایہو پچھوکڑ ہے وارث دے ایس بند دے اخیری مصرعے دا جیس وچ لدگا ہے جیویں لنگی ٹنگ آپ اک ہتھیار ہے فساداں نوں جگاون دی!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels