Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند ٨٥

ہیر وارث شاہ: بند ٨٥

May 29th, 2008

ہیر آکھیا رانجھنا بُرا کِیتو ساڈا کم ہے نال ویرائیاں دے
ساڈے کھوج نوں تک کے کرے چغلی دینہہ رات ہے وچ بُرئیایاں دے
مِلے دلاں نوں ایہہ وچھوڑ دیندا بھنگ گھتدا وچ کُڑمائیاں دے
بابل امڑی تھے جاء ٹھٹھ کرسی جا آکھسی پاس بھرجائیاں دے


اوکھے لفظاں دے معنے


ویرائیاں۔ پرانی دشمنی، پرانا ویر
بھنگ گھتنا۔ بنیا بنایا کم وگاڑ دینا، فتور پا دینا
کُڑمائیاں۔ کُڑی منڈے دے سوہرے اک دوجے دے کُڑم ہوندے نیں۔ کُڑمائی دا مطلب ہے دو ٹبراں دا کُڑی مُنڈے دا رشتہ جوڑنا۔ مطلب کیدو وسدے ٹبراں نوں پاڑ دیندا ہے تے کُڑماں نوں اکدوجے دے خلاف کرکے رشتے تُڑوا دیندا ہے۔ مطلب چنگے بھلے ہوندے رشتے وچ بھنگ پا دیندا۔
بال۔ پیو
امڑی۔ ماں
ٹھٹھ۔ مذاق، بے عزتی،

سدھا مطلب

ہیر رانجھے نوں کہندی ہے جو توں [چوری دے کے] برا کیتا ہے کیوں جو ساڈا ویریاں نال واہ پیا ہویا اے۔
[کیدو] ساڈا کھوج کڈھ کے جاکے چغلی کرے گا کیوں جو ایہہ دن رات کسے نہ کسے بھیڑے کم وچ وچ لگا رہندا ہے۔
ایہہ چنگے بھلے پیار نال رہندے لوکاں نوں اکدوجے نالوں وکھ کر دیندا ہے ، تے لوکاں دیاں رشتے داریاں وچ فساد پا دیندا ہے۔
ایہہ جا کے میرے پیو تے ماں اگے میرا مذاق اڈائے گا تے بھرجائیاں نوں جا کے دسے گا۔

کھلارواں مطلب

پہلے مصرعے وچ ہیر رانجھے نوں اوسدی غلطی دس کے کہندی ہے پر ''رانجھنا'' کہن وچ اوس دا پیار بوہتا ہے تے رانجھے نوں بُرا بناونا گھٹ۔ مصرعے دے دوسرے حصے وچ اوہ ویرائیاں دا ذکر کے اک نہیں سگوں کئی طرح ویراں ول دھیان دوا رہی ہے۔ اوس نوں پتہ ہے جو اوس نے اک چاک نال عشق کرکے جو کیتا ہے اوس نال سماج دے ہر پکھ نال ویر سہیڑ لیا ہے۔ اوس نال پہلاں دے پیارے تے نیڑے دے لوک وی ویری ہو جانے آ۔ اوہ اپنے عشق تے نکلن والے نتیجے ویکھ رہی ہے تے کہہ رہی ہے جو رانجھے نوں اجے شاید اوہناں دی پوری سار نہیں ہوئی۔ اوہ زنانی ہے اوس نوں پتہ ہے جو سماج اوس دے عشق نوں معاف نہیں کرے گا ایس لئی اوہ آون والے خطرے وی سُنگھ رہی ہے۔ رانجھا مرد ہے اوس تے سماج دا بھار گھٹ رہیا ہے ایس لئی اوس نوں آون والیاں خطریاں دی پہلاں توں اُگھ سُگھ وی نہیں ہے۔ ایس لئی ایس نکے جیہے مصرعے وچ زنانی تے مرد دا سماج دے دُھر اندر ویکھن ڈھنگ وچ فرق وی صاف دسدا ہے۔

دوسرے مصرعے وچ اوہ دسدی ہے کہ کیدو ساڈا کُھرا نپ کے یا ساڈے ملاپ دیاں نشانیاں لے کے پنڈ وچ چغلی کرے گا کیوں جو ایہہ دن رات سوائے بھیڑے کماں دے ہور کجھ سوچدا ی نہیں ہے۔ مطلب ایس دی خصلت ہے جو کسے نہ کسے بھیڑے کم وچ پیا رہندا ہے۔ مطلب ایہہ صرف ساڈے پچھے ہی نہیں پیا ہویا ایہہ فساد لبھدا رہندا ہے۔

پھیر اوہ کیدو دیاں بھیڑاں نوں کھول کے دسدیاں کہندی ہے جو ایہہ چنگے بھلے وسدے رسدے پیار محبت نال رہندے لوکاں نوں اکدوجے نالوں وکھرا کر دیندا ہے۔ ایہہ لوکاں دیاں رشتیاں نوں خراب کر دیندا ہے۔ کُڑمائی وچ عام طور تے کُڑی مُنڈے والے کجھ چر تیکر اکدوجے نوں جانچدے پرکھدے نیں تے پھیر رشتے پکے کر دے نیں۔ ایس وچ چغل خور بندے بڑی سوکھ نال لت مار دیندے نیں۔ اوہ کُڑی والیاں نوں مُنڈے تے اوہدے ٹبر دیاں برائیاں دسن گے تے مُنڈے والیاں نوں کُڑی بارے۔ایس طرحاں کُڑمائی وچ بھنگ پے جاندی ہے۔

ہیر کہہ ایہہ رہی ہے جو کیدو دی خاصیت ایہہ ہے جو اوہ بندیاں نوں اکدوجے نال خوشی نال رہندیاں نہیں ویکھ سکدا۔ اوہ نویں جوڑاں دا ویری ہے۔ ایس لئی جد اوہ چالو ویہار وچ لوکاں دیاں رشتیاں دی توڑ بھن کردیندا ہے تے ایتھے تے پورا رشتہ ہی سماج دے ورودھ وچ بنیا ہے۔ ایہہ کم تے کیدو لئی بہتا ہی سوکھا ہووے گا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels