Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> بھگت کبیر >> اشلوک بھگت کبیر جیو کے 1

اشلوک بھگت کبیر جیو کے 1

August 21st, 2007
5 / 5 (4 Votes)

کِبیر جَیسی اُپجی پیڈ تے ، جؤ تَیسی نِبہے اوڑ
ہِیرا کس کا باپُرا ، پُجے نہ رَتن کروڑ

ا وکھے اکھراں دے معنے۔

اُپجی۔پیدا ہوئی
پیڈ۔پیڑ، نواں بُوٹا، مُڈھ
تے۔ اُتے
باپُرا۔وِچارا، ماڑا
جوئ۔ جے
نِبہے۔نِبھے، رہے
پُجے۔پہنچے، برابر ہووے
اوڑ۔اخیر ، اوڑک
رتن۔لعل ، جواہر ، انملی نایاب

کبیر جیسی ، جس طرحاں دی پیدا ہوئی اے پیڑ اُتے ۔نواں نواں بُوٹا وی پیڑ اے تے اوہ پُھلدا اے تے ودھدا اے تے ساڈی حیاتی اخیر تیک ایسی حالت وچ ای رہے ۔ جیویں پیڑ اُتے لنگھدی اے اویں میری ہووے اویوں ای میری چلے۔اُنج ای میری گزرے ، نِبھے۔ ہیرے میرے کس کم دے نیں؟ ہیرے کس گنتی وچ نیں۔ کئی کروڑ ہیرے اوہ مُل نہیں تار سکدے۔ ایس دا کوئی بدل نہیں۔ بُہت ای انمول ہیرا وی ایس برابر نہیں اے۔ ہیرا وچارا کس جوگا اے تے پیڑ اُتے حیاتی دا جو مُل اے اوس دا جوڑ تاں کروڑاں رتن تے لعل وی نہیں نیں۔

ایہہ تاں ہوئیا ایس دا سدھا ساہواں مطلب۔ پر سوال اے ایہہ پیڑ اُتے یاں جیویں پیڑ اُتے پُھل اُگدا اے اوس اُتے پیداوار اُپجدی اے بھلا اُنج دا بتاون کیہ ہوئیا؟ پیڑ نال نباوہن کیہ ہوئیا؟

کبیر دا ایہہ اشلوک پڑھدیاں سبھ توں پہلاں تاں بابا فرید دے دوہڑے چیتے آئے جیہناں وچ رُکھاں دی وڈیائی دی گل اے تے بندیاں نوں ہنگارا اے بئی اوہ وی اِنج دا جیون جالن۔

فریدا صاحب دی چاکری ، دل دی لاہ بھراند
درویشاں نوں لوڑِئیے، رُکھّاں دی جراند

بھراند۔شک، شُبہ، بھرم ، بھرانت
جیراند۔ جیرا ، جگرا ، حوصلہ

رُکھاں نال جیون نِبھاون دی گل وچ کئی گلاں نیں۔ ساڈی وسوں وچ رُکھ عام نیں اینے عام پئی اوہ ساڈے چت چیتے دا حصہ نیں کئی اکھان اوہناں نال جڑے نیں ہزراں گلاں تے متھاس(متھالوجی) اوہناں نال جُڑی ہوئی اے جیویں بوڑھ بارے کئی گلاں نیں۔ جیویں خلقت عام اے ایویں رُکھ وی عام نیں۔ ایتھے کتھے خلقت دی گل تاں نہیں ہوندی پئی اے۔ عام جیونے دی لوکاں نال دُکھ سکھ سانجھے کرن دی ۔ سانجھ دی ، کُل دی۔

دوجی گل پئی رُکھ لیندا کجھ نہیں دنیدا اے۔ آپنی چھاں پھل۔ زہریلی کاربن ڈائی اکسائیڈ چوس کے نرول ہوا دیندا اے۔ رُتاں سوہانیاں وی جالدا اے تے سیال ہنال وی جردا اے۔ہوواں مان دا وی اے تے ہنیریاں سہندا وی اے۔

تیجی گل پیڑ قدرت دی دات اے ،اوہدا انگ اے ،اوہدا ہوون اے اوہ آپے قدرت دی دین دا نشان اے۔
جس نوں بابا نانک سہج سبھا دا جیون آکھدا اے ۔ جس دا مطلب اے قدرت دے حساب وچ رہنا۔ قدرت دا حساب کیہ اے۔ قدرت سانجھی اے ایس وچ مِل نہیں۔ دھکے زوری نہیں، دھگان نہیں ، وتکرا نہیں ، اُچ نچ نہیں ، چنگ مند نہیں۔ جیویں دریا دا پانی ، جیویں ہوا۔

تے میرا جیون جویں پیڑ اُتے پھل ہوندا اویں نبھے وچ ایہہ مطلب وی لُکیا ہوئیا اے پئی میں نہ نرا رُکھ ورگا ہوواں سگوں میں اُنج دا ہوواں جیویں پھل پیڑ نال ہوندا اے ایتھے بندے دے اُپجکار ہوون دی وی گل کیتی گئی اے۔ جیویں پیڑ پھل دار ہوندے نیں بندہ وی دوجیاں لئی پھل بنے اُپجن ہار ہووے۔ تے ہیرا کیہ ہووے۔ ہیرا وی قدرت پیدا کردی اے جس اُتے کجھ مَل مار لیندے نیں ایہہ اوہ تاں نہیں جیہڑے آپے پیدا نہیں کر سکدے جیہڑے اُپجن ہار نہیں نیں۔ پر کبیر ایس جیون نوں نندا اے رد کر دا اے سگوں ہیرے والیاں جیون نوں وچارا کر کے دسدا اے۔ وسیب وچ ہیرے والیاں دا جیون اُتانہہ اے تے رُکھاں والیاں دا ہیٹھاں پر کبیر آپنی شاعری دے جادو نال آپنی قدرت دی طاقت نال پیڑاں نوں اُتانہہ تے ہیریاں نوں تے رتن کروڑا نوں ٹکے ٹوکری کر چھڈا اے۔

ہیرے والیاں وچ اُچ میل دی گل وی اے پئ اُچ میل والے قدرت دے سہج سبھا توں باہرے نیں ۔ اوہ وگاڑ نیں قدرت دے ویہن توں باہرا ہوون ان ہوند وچ ہوون اے وجوگ وچ ہوون اے وکھرا ہوون اے جس نوں کبیر تجدا اے۔

رُکھاں پکھیرواں دی گل ساڈے جیون دی گل اے تے بابے فرید توں ٹردی ایہہ ساڈی اجوکی شاعری تیک آئی تے نجم حسین سید دے اک گاون اُتے گل مکائے بناں ساڈی گل پوری نہیں ہونی۔

جے رہیے تاں رہیے رُکھاں دے نال
بِن گنِیاں بِِِن پُنیاں ساڈا
زہر کُوڑ دا چاڑھ کے امرت کردے نیں
جے رہیے تاں رہیے رُکھاں دے نال
بِن پُچھیاں بِن دسیاں ویکھو
ہریل دیوے بال کے اکھیں دھردے نیں

معنے
ہریل۔ ہرے رنگ دے

اگلی لڑی وچ اسیں کبیر دی حیاتی دا وی کجھ ویروا داں گے۔ کبیر دا ویلا پندرہویں صدی دا اے جد اک پاسے مسلمان دِلّی وچ آپنی بادشاہی پکی کرن دے چکر وچ سن تے دوجے بنّے ہینیاں تے نمانیاں دی واج نوں کنیں پاوندی بھگتی لہر ہن ہندوستان وچ کھلردی پئی سی۔ ایس لہر دے سارے ای شاعر ماتڑ سن تے دست کار سن۔ کبیر آپے وی جلاہے سن تے نیچ جاتی سن تے شودراں دی پدھر تے سن۔ آپ دے جیون بارے کئی کرامات جڑئیاں ہوئیاں نیں تے پچھے آپ اُتے بڑا کم وی ہوئیا جیہڑا اسیں نالو نال سانجھا کردے رہواں گے۔

بھگت کبیر دے ایس اشلوک دے معنے سنگت دے کیتے ہوئے نیں تے اشلوکاں دی ایہ چون گُرو گرنتھ وچوں لئی گئی اے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels