Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> بھگت کبیر >> اشلوک بھگت کبیر جیو کے 2

اشلوک بھگت کبیر جیو کے 2

September 2nd, 2007
5 / 5 (1 Votes)

کبیر جِہہ مارَگ پَنڈت گئے پاچھے پَری بَہیر
اِک اَوگھٹ گھاٹی رام کی تہہ چڑھ رَہیو کِبیر

اوکھے اکھراں دے معنے

جہہ۔ جس
مارگ ۔ راہ ، رستہ
پاچھے۔پچھے ، مگر
پری ۔ پئی، (پڑی)
بہیر۔ لمی قطار، قافلہ، مگر لگن والے، بھیڑ
اوگھٹ۔ اوکھی ، مشکل
گھاٹی۔چڑھائی
رام۔ رب
تہہ۔اوہ
رہیو۔رہا

جس رستے اُتے پنڈت جاندا اے، چلدا اے، تردا اے۔ جیہڑا پنڈت دا راہ اے اوسے راہ اُتے لوک مگر مگر تر پیندے نیں۔ اوہدے پچھے لمی قطار، لام ڈوری لگی آوندی اے۔ جس راہ اُتے پنڈت تردا اے اوہ اک ریت اے ، رسم اے، جس پچھے پچھے لوک ترے آوندے نیں۔

کبیر دا ماملہ پنڈت دے ماملے توں اُکا اُلٹ اے، وکھرا اے۔اوہ اک اوکھی گھاٹی اے جس اُتے کبیر چڑھدا پیا اے ۔ رب دا راہ پنڈت دے راہ توں وکھ اے؟

کبیر وچ کئی دھارے چلدے نیں، کئی ملدے نیں تے وکھ وی ہوندے نیں۔ کبیر نے دھرم پکھوں نری مسلمانی تے ہندوانی دواں دھرماں دے اُتلے اُچھاڑ نوں نندیا اے، اوہدا کوجھ، اوہدے اک پاسڑی ہوون نوں چگھیا اے۔ پنڈت اک خاص ریت دا نشان اے تے اوہدا راہ یاں جیہڑا راہ اوہ دسدا اے اوہی اصلوں ساریاں دا راہ اے، مارگ اے۔ پر کیہہ اوہ رب دا راہ اے؟ رام دا مارگ دا اے؟

نہیں ایہہ بھلیکھا اے اصل راہ تاں رب دا ہور اے۔ پنڈت تاں بنے بنائے ٫ گھڑے گھڑائے ٫ صدیاں توں ترے آؤندے، چلے آؤندے راہ اُتے تری آؤندا اے۔

اصلوں رب اُتے پنڈتاں مَل ماریا ہوئیا اے۔ پئی اسیں رب دے نائب آں اسیں جو آکھنے آں اوہ رب دا آکھیا اے جو کرنے آں اوہ رام موجب اے۔ پر ایس اشلوک وچ کبیر نے اک تاں پنڈت کولوں اوہدی رام دی مالکی کھوہ لئی اے تے نال ای آپنے آپ نوں رام نال جوڑ کے آپنے راہ نوں وکھ کر کے، پنڈت نوں بے ہتھل کر دتا اے۔ اصلوں جیہڑا مارگ پنڈت بنائی بیٹھا اے اوہ رب دا راہ نہیں اے اوہ راہ اے لوکاں نوں کراہے پا کے مالکی تے ذات پات وچ جوڑنا جیہڑا کدی وی رب دا راہ نہیں رہیا ۔

ہن اسیں کجھ گلاں کبیر بارے سانجھیاں کرنے آں پئ کبیر دا ویلا کیہڑا سی تے اوس دے بولاں پچھے ویلے دا کیہڑا لا ٹکرا سی ۔ تے کجھ گلاں کبیر دے وچاراں بارے کراں گے۔

کبیر اُبھے(شمالی) ہندوستان دا پہلا وڈا شاعر اے جو مسلماناں دے دو سو سال دے راج مگروں ساہمنے آؤندا اے۔ ایہہ نہیں پئ کبیر وچ ایتھوں دی وچار دھارا نہیں سی سگوں اوس وچار دھارا نوں تڑکا لاون وچ مسلمان فقیراں دا وی اثر سی جویں اسیں ویکھنے آں پئی کبیر اُتے چوکھا اثر بابا فرید دا وی سی تے کِتے کِتے اِنج لگدا اے پئ ایہناں لوکائی دے شاعراں وچکار وچار وٹاندرا وی چلدا پیا سی۔

قطب الدین ایبک جس محمد غوری نوں مار کے 1206 راج گدی سانبھی مسلماناں دا پہلا آزاد حاکم سی تے مڑ اوسے نے دہلی دی سلطانی قائم کیتی سی۔ پر ایہہ التمش سی جس نے اک آزاد ریاست دا کم پورا کیتا۔ جد افغانستان توں آئے ترک خلجیاں نے تیرہویں صدی دے اخیر وچ غلاماں دی راج گدی نوں لانبھے کیتا تے اوس ویلے مسلمان حاکماں دے مقامی آبادی وچ رلن تے سمان دا کم چھوہ پیا ہویا سی۔ خلجی راج ویلے مسلماناں دا راج مرکزی تے لمے (جنوبی) ہندوستان تیک اپڑ پیا سی تے راج آپنا ہتھ دُراڈے صوبیاں تیک پائی بیٹھا سی تے دہلی مسلمان راج دا اک وڈا رہتل مرکز بندا پیا سی۔

سنگیت تے سلیکھ وچ باہروں آئیاں تے ایتھاویاں دے کئی جوڑ بن دے پئے سن۔ اشراف وچوں ایس دی سبھ توں وڈی ونگی امیر خسرو(1254-1324) اے۔

دہلی دی سلطانی 1398وچ محمد تغلق ویلے ٹٹ گئی تے ایس نال ای تیمور دے ہندوستان اُتے دھاڑویاں دا دُکھانت وی واپریا۔ دہلی دی سلطانی مُکن مگروں بے سُکونی تے آپودھاپی دا ویلا آئیا تے جس پہلاں تاں سیدّاں دا راج لنگھایا تے مُڑ لودھیاں دا راج آ ڈُھکیا۔ دہلی سلطنت دے پھیتی پھیتی ہون دے نالوں نال مسلماناں دیاں آزاد ریاستاں وی جم پیاں جیہڑیاں خاص کر اودھ ، بہار تے بنگال وچ سن تے کجھ دکن وچ وی۔

چڑھدے تے لمے دیاں چودھویں تے پندرہویں صدی دیاں مسلمان ریاستاں نے اسلام نوں چوکھا کھلاریا تے نویں مسلمانی تے دھرت واسیاں دی سانجھی رہتل دی دس پین لگی۔ چڑھدے دیاں ریاستاں وچ جیہناں وچ جون پور، اودھ تے یوپی وی آندے سن دہلی دی راج توں 1393-1470 تیک شرقی سلطنت ہیٹھ آزاد رہیاں تے پھیر حسین شاہ نوں بھلول لودھی نے بھاج دتی۔

جون پور دی ریاست وچ لہندے ول کنوج سی تے اُبھے ول ایودھےا تے چڑھدے ول کاشی(بنارس) جیہڑا دریا گومٹی اُتے اُسریا کھلا سی۔ تیمور دی بھاج مگروں جون پور مسلماناں دا وڈا رہتلی مرکز بنیا تے ایس نوں ہندوستان دا شیراز وی آکھیا جاندا سی۔

کبیر ایہناں تھاواں دا ای رہن والا سی تے اسیں کبیر دے ویلے دیاں کجھ ہور گلاں نوں اگلی واری جوڑاں گے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels