بھگت کبیر جیو دی حیاتی بارے کوئی وی گل پکی تھتی نہیں کیتی جاسکدی تے نہ ای اوہناں دے جمن تے گزرن بارے کوئی پکیاں تاریخاں لبھدیاں نیں۔ جو وی گل اے اوہ نرا ٹیوا ای اے۔ کبیر نوں ریت وچ کئی ناواں توں سدیا گیا اے جیویں'ْکبیر شاہ ٫ بابا جی کبیر٫ تے کبیر داس'۔ کبیر بارے صیح سومیاں وچ آدی گرنتھ تے بھگت مالا شامل نیں۔ آدی گرنتھ 1604وچ پنجویں گرو ارجن دیو جی نے جوڑیا سی۔ آدی گرنتھ وچ پہلے پنج گرواں دے کلام دے نال نال بھگتاں دا کلام وی شامل اے تے اسیں جیہڑی چون بھگت کبیر دی ورتانے پئے آں اوہ گرو گرنتھ صاحب وچوں ای لئ گئ اے۔ ایہ بھگت گرو نانک توں پہلوں دے نیں تے ایس وچ نام دیو٫ روی داس چمار تے بابا فرید وی شامل نیں۔
نانک جو پہلے گرو نیں اوہناں گرنتھ وچ کبیر دا کتے ذکر نہیں کیتا پر سکھاں وچ کبیر دی بڑی مانتا اے تے جنم ساکھیاں وچ کئ وار کبیر تے نانک دی ملنی دی دس وی پیندی اے۔ تیجے گرو امر داس1479-1574 جیہڑے اکبر باتشاہ دے ویلے وچ ہو گزرے نیں کبیر دا ذکر کردے نیں۔
بھگت مالا وچ جو نابھا جی دی جوڑی کتاب اے تے جو آپوں اک وشنومت دی شاعر ہو گزرے نیں کبیر بارے آکھدے نیں۔
''کبیر نے جات پات تے ہندو فلسفے دی چھ سکولاں نوں منن توں نہ کر دتی سی تے نہ ای اوہ برہمن دیاں بنائیاں حیاتی آشرم دیاں چار ونڈاں نوں منندا سی۔ اوہ کہندے سن بھگت (لگن) بناں کوئی دھرم نہیں اے تے دُنیا تیاگن٫ فاقے کرن تے بھیکھ منگن نال کجھ نہیں ہوندا جد تیک جد تیک ایس وچ بھجنا(اپنائیت) نہ ہووئے۔'' کبیر دی حیاتی بارے سانوں بوہتا نہیں لبھدا سوائے ایس دے پئ اوہ دویں دھرماں اسلام تے ہندو مت نوں اکو طراں نتاردے سن تے ذاتاں دے ورودھی سن۔
کبیر پنتھی موجب کبیر جی 1205وچ جمے تے 1505وچ ساہ پورے کر گئے پر انج اوہناں دی عمر 300 ورھے بندی اے جو نہ منن جوگ اے۔ موہن سنگھ گرو گرنتھ وچ دوجے بھگتاں دیاں دے ذکر توں ایہ گویڑ لاوندا اے پئ کبیر جی 1450تیک چلانا کر گئے ہوئے سن تے ایس حساب اوہ1340دے نیڑے تیڑے کتے پیدا ہوئے سن۔
کبیر جی ذات دے جولائے سن تے اک گنتری موجب ایہ راجپوتانہ توں چڑھدے بنگال تیک تے کشمیر توں مدھیا پردیش تے گجرات تیک کھلرے ہوئے سن۔ اُچیچے پکھوں ایہ گورکھ پور ٫ بنارس ٫ جون پور تے چڑھدے اُتر پردیش وچ چوکھے سن۔ ایہ شودر ای سن تے ایہناں وچوں چوکھے بارویں تے پندرویں صدی وچ مسلمان ہو گئے سن پر ایس نال نہ ایہناں دا جیون بدلیا تے نہ ذات پات پاروں ایہناں نوں کوئی فرق پیا۔ ہندوستان وچ جولاہیاں دیاں کئ ذاتاں نیں جیہناں دا درجہ بہوں نیواں اے تے جو غیر آریائی ڈھانیاں جویں ڈوم ٫ کول تے دراوڑاں نال وی جڑیاں ہوئیاں نیں۔ فارسی اکھر جولاہے ساواں ہندوستانی اکھر 'کوری' اے پر دواں وچ کوئی بوہتا فرق نہیں۔ جویں کہ ہندوستان وچ دھرم بدلن نال تہاڈی ذات نہیں بدلدی تے نہ ای سماجی پکھوں تہاڈا رتبہ اُچا ہوندا اے۔ مسلمانی تاں غیر مسلمانی جولاہیاں دا ہیٹھلا درجہ وسیب وچ سدا قائم اے بھاویں اوہناں دا کم اوہناں نوں 'گندی' ذات نہیں بناندا۔
جولاہیاں دا ریتی کہانیاں وچ مخول اُڈایا جاندا اے تے اوہناں نوں 'بند دماغ' دے آکھیا جاندا اے ۔ کبیر نے ایہو آکھ کے آپنے جولاہے ہوون دی گل اِنج کیتی اے۔
