Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> بھگت کبیر >> اشلوک کبیر جیو کے 3

اشلوک کبیر جیو کے 3

October 4th, 2007
5 / 5 (1 Votes)

کِبیر دعوے داجھن ہوت ہے نِر دعوے رَہے نِسَنک
جو جَن نِر دعوے رَہے سو گنَے اِندر سو رَنک

اوکھے اکھراں دے معنے

دعویٰ۔ مالکی دا کلیم
داجھن۔ سڑن
ہوت۔ ہوندا اے
نِر۔ بغیر ' بِِن
نسنک۔بے فکر' نچنت' بے شک
جَن۔ بندے' لوک
سو۔ اوہ
گنے۔ گنے' گندے نیں
اندر۔ دیوتا
رنک۔ کنگال ' عاجز ' بہت غریب

کبیر دعویٰ سڑن تے جلن اے تے جو دعوے دے بِنا نیں دعوے دے بغیر نیں اوہ بے فکر تے نچنت نیں ۔ تے جیہڑے کنگال نیں ' بے دعویٰ نیں اوہ اندر دیوتا نال ہی گنے جان گے اوہ اندر دے برابر نیں۔

دعویٰ سڑن دے برابر اے تے اگ لان دا انتظام کردا اے۔دعویٰ اگ اے تے نِر دعویٰ نِسَنک نیں۔ اندر دیوتا دوالے ساریاں سوہنیاں سوانیاں نیں تے رَنک اندر دے برابر نیں جو کنگال نیں اوہ وی اوہدے ساویں نیں۔ سبھ توں اُتلی پوڑھی تے اندر اے تے سبھ توں ہیٹھلی اُتے رَنک نیں پر دویں برابر کیوں ہو گئے؟

سڑن اک حالت اے مالکی دی یاں مایا دی۔ پئ دعوے داراں نوں اوہناں دی مالکی پاروں، اوہناں دی دُنیا داری پاروں تے گھٹ ودھ دی راکھی پاروں سڑن اے اوہ سڑن، جلن دی حالت وچ نیں جو دوزخ وی اے نرگ وی اے ۔سڑن وجوگی حالت وی اے وچھڑن وی اے چنتا وی اے، فکر وی اے۔ سڑن اک ذہنی حالت وی تے سریرک وی پر نِسنک بوہتی ذہنی حالت اے۔ سڑن دا عمل ہوندا پیا اے پر نچنت اوہ حالت اے جو حاصل ہو چکی اے۔ ایہہ دا ہویئی دُنیا دی حالت جو دھرمی حالت اے اوس وچ وی اوہ جو کنگال نیں اوہ تے اندر دیوتا دے ساویں نیں۔

ایس شلوک وچ کبیر مالکی نوں اگ کہہ کے نندا ا ے تے بے دعویاں نوں وڈیاندا اے۔ اِنج ای اوہ کنگال نوں اندر دے نال بٹھا دیندا اے۔ تے جیہڑے جہان نوں مَلن دا دعویٰ اُچ میل کری بیٹھے نیں کبیر اوہناں دا دعوای جھوٹا کر دیندا ا ے تے جھوٹیاں نوں سچا کر دیندا اے۔

کِبیر جِیء جو مارے جور کر کہتے ہے جو حلال
دفتر دیئی جَب کاڈھ ہے ہوئےگا کَون حوال

جیئ۔ جی نوں' جاندار نوں
جور۔ زور
دیئی۔ دیوے گا
کاڈھ۔کڈھ کے
دفتر۔رجسڑ' حساب' لیکھا
حوال۔نزدیک' نال' آلے دوالے

جو، جیہڑے جیاں نوں زندہ ماردے نیں تے کہندے نیں ایہہ مارنا حلال اے جد رب اوہناں دا لیکھا کرے گا یاں حساب کرے گا تے اوہناں دی کون حمایت کرے گا۔

کِبیر جور کِیا سو جُلم ہے لے اِی جَباب خدا ِئ
دَفتر لیکھا نِیکسے مار مُوہے مُوہ کھا ِئ
سو۔اوہ
جلم۔ظلم
لے اِی۔لَیسی' لوے گا
حباب۔ جواب
لیکھا۔حساب
نیکسے۔نِکلے گا
موہے موہ۔مونہو مونہہ ' پُوری ' مونہہ تک

جس نے وی زبردستی کیتی' ظلم کیتا اوہدا جواب خدا لئے گا۔جس ویلے حساب نکلے گا اوس ویلے مُوہے مُوہ مار پئے گی۔
جے پہلے شلوک وچ ہندو دھرم نال گل کیتی لگدی سی تے ایہناں دواں وچ مسلماناں نال کیتی لگدی اے۔ ایہناں دواں شلوکاں وچ ظلم دے خلاف تے دھروہ تے دھنگان نوں نندن دی گل اے تے لیکھے تے حساب دی گل اے۔ ویکھو کیویں نرول فارسی، عربی دے اکھر لوک بولی وچ پھسے ہوئے نیں۔

دفتر سرکاری لفظ اے تے مسلماناں دے راج نال آئیا اے تے ایہہ ورتیا وی سرکاری کھاتیاں لئی جاندا اے دَفتر لیکھا نِیکسے، جد سرکاری کھاتیاں دا حساب نکلے گا۔ مطلب جد راج گدیاں دا حساب ہووے گا۔ نکلے توں اِنج وی لگدا اے جد کوئی حساب کرائے گا یاں کوئی حساب کرے گا یاں کڈھے گا۔ ایتھے اِنج وی لگدا اے پئ کوئی طاقت اے جو لیکھا کرے گی۔ لیکھا نرا مرن پچھوں نہیں ہونا ایتھے وی ہر روز لیکھا ہوندا پیا اے۔روز تخت اُلٹے جاندے نیں ہیٹھلی اُتانہہ تے اُتانہہ ہیٹھلے ہوندے رہندے نیں۔ لیکھا نالو نال وی ہوندا ا ے تے وار وی لیکھا کردی رہندی اے۔

ایتھے حساب تے لیکھے دی تے ظلم دا جواب دین دی گل کرکے مڑ کبیر ہینیاں نمانیاں نوں ساہ دیندا پیا اے مڑ لوکاں نوں نونگاردا پیا اے تسیں وی حساب کرسکدے اوہ۔ تسیں وی لیکھا کرسکدے او۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels