Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> امر جلیل >> خیالی کتھا

خیالی کتھا

امر جلیل
December 1st, 2006
5 / 5 (2 Votes)
یونانی دیوتا، یونانی قصیاں دا ساڈی حقیقت نال مقابلہ کر رہیا سی، تے حیران ہو رہیا سی۔
یونانی دیوتا نے آکھیا،'' حقیقت تے کہانی وچ وڈافرق اے، پرساڈیاں حقیقتاں نے یونانی کہانیاں دے دندکھٹے کر دتے نیں''۔
اوہنے آکھیا،'' ساڈے کول وڈے وڈے بہروپیئے اژدھا نیں جیہڑے یونانی دیوتاواں نوں قصّیاں نال زندہ نگل لین گے''۔
یونانی دیوتا نے آ کھیا،'' باقی اک قصہ رہ گیا اے، جیہڑا میں تہانوں دسیا نہیں۔''
''سناؤ''، اوس قصّے دے مقابلے وچ ساڈے کول وی کوئی نہ کوئی حقیقت ضرور موجود ہووے گی۔
''بالکل نا ممکن''، یونانی دیوتا نے آکھیا کہ ایس قصے دے مقابلے وچ بیان کرن واسطے تہاڈے کول کوئی وی حقیقت موجود نہیں ہو وے گی۔
میں آ کھیا'' توں دس تے سہی''
دیوتا نے آ کھیا،'' تیرا آخری قصّہ وی ساڈی حقیقت کولوں ضرورمات کھاوے گا۔''
یونانی دیوتا میرے ول ویکھ کے ہسیا، فیر اوس نے کہانی سناؤنی شروع کیتی، ''یونان وچ فونیکس دا پرندہ ہوندا سی، ہنس توں وڈا پر بہت سوہنا سی۔کِسے گل توں یونانی دیوتا فونیکس توں ناراض ہو گےا تے اوہنوں سدا عذاب وچ پھسے رہن دی سزا تے بد دعا دتی، فیر ہویا ایہہ کہ جدوں وی فونیکس اُڈن دی کوشش کر دا سی تے اڈاری دی آواز اوہنوں اگ لا دیندی تے اوہ پلک جھپکدے وچ ای سڑ جاندا سی۔ اوس بددعا دے سبب اوہ فونیکس آپنی سواہ وچوں دوبارہ جنم لیندا سی۔
نواں جنم لین تو مگروں فیر جدوں وی اوہ اڈاری دی آواز توں اگ وچ سڑ کے سواہ ہو جاندا سی تے فیر اپنی سواہ وچوں جنم لیندا سی۔ اپنے خوبصورت پر کھول کے فضا وچ اُڈن تے فیر جنم لین دا ایہہ عذاب فونیکس واسطے صدیاں تک چلدا رہیا''۔
قصّہ سناؤن مگروں یونانی دیوتا بڑے فخر نال میرے ول ویکھن لگا۔
میرے بُلھاں تے مسکراہٹ ویکھ کے اوہنے پچھیا،'' توں کیوں ہسیا ایں؟ جواب دے،''
میں آ کھیا'' جواب دے بدلے میں تینوں اک ایسا منظر دکھاواں گا جیہدے اگے تینوں فونیکس دا قصّہ کچھ وی نہ لگے گا۔'' فیر اوہنوں اوہ منظر وکھایا۔
اِک نوجوان دے ہتھ زنجیراں وچ جکڑے ہوئے سن، تے زنجیر بوہڑ دے نال بنھی ہوئی سی، نوجوان دا منہ سیتا ہویا سی، کناں تے دو چمڑے دے چوکور ٹکٹرے بنھے ہوئے سن، اوہدیاں دونویں اکھاں نکلیاں ہویاں سن تے جیبھ چوں خون وگ رہیا سی۔
نوجوان دیاں اکھاں وچوں نکلن والے خون نے جدوں زمین چھوہی تے اوہدیاں بے نور آ کھاں وچ روشنی آ گئی اوہ حال توں مستقبل وچ ویکھن لگا، تے اچانک بوہڑ دے پچھوں اک بونا ہسدا ہویا ظاہر ہویا تے خنجر دی نوک نال نوجوان دیاں اکھاں فیر کڈھ دتیاں ،فیر اوہ بوہڑ دے پچھے لُک گیا۔
نوجوان دیاں اکھاں وچوں فیر خون وگن لگا۔ وگدے خون نے جدوں دھرتی نوں چُمیا تے نوجوان دیاں بے نور اکھاں وچ فیر نور آگیا فیر اوہ حال نوں مستقبل وچ ویکھن لگاتے اچانک اوہی بونا ہسدا فیر بوہڑ دے پچھیوں نکلیا،اوہدیاں اکھاں کڈھیاں تے فیر لُک گیا۔
یونانی دیوتا بڑے چر تائیں حیرانی نال ایہہ خوفناک منظر ویکھدا رہیا۔اوس نے دہشت کھا کے میرے کولوں پچھیا،
'' ایہہ نوجوان کون اے؟ تے ایہدا گناہ کیہ اے؟''
میں جواب دتا، ایہہ نوجوان اس دھرتی دا پُتر اے تے اوہنوں اپنی ماں نال پیار اے تے ایہو ایہدا جرم اے۔ تے بونا؟ بونے دے ہتھ وقت دی لگام اے۔''
میرا جواب سُن کے یونانی دیوتا نے اپنا سِر سُٹیا تے یونان واپس چلا گیا۔

Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels