''سندھو '' ''کہندے نیں کہ میں تیرا ذکر نہ کراں، تے نہ ای تیرے بارے وچ کجھ وی بولاں'' '' فیر کیہ سوچیا اے'' '' کجھ وی سمجھ وچ نہیں آ رہیا اے'' '' کیوں '' ''کیوں جے جد میں ویتنام دا ذکر کرناں تے کوئی وی اعتراض نہیں کردا، پر جدوں تیرا ذکر کرناں تے الزاماں دی پھنڈ پئے جاندی ہے'' ''فیر میرا ذکر کرنا چھڈ کیوں نہیں دیندے او؟'' ''اپنی ادبی زندگی توں تیرا ذکر وکھرا کر دیاں تے اخیر وچ مینوں کجھ نہیں ملے گا'' ''ہُن کیہ ملیا اے؟'' ''درد دی میراث'' ''تسیں شاعری کیوں نہیں کر دے؟ '' ''مقدر وچ نہیں '' '' تقدیر دے قائل او؟ '' ''جدوں تیکر تیرے توں وکھ نہیں ہویا سی '' '' پہلے '' '' ارادے دے ساہمنے کسے وی شے نوں ناپ تول وچ نہیں لیایا سی '' '' اوہنوں تقدیر دے لکھے دے بدلے سزا کیوں نہیں سمجھدے او '' '' کیہڑی سزا '' ''محبت دی سزا '' ''اسیں محبت وچ اپنی سزا آپ مقرر کرنے آں، ہور کون سانوں سزا دے سکدا اے! '' ''مینوں پتا اے کہ تُسیں محبت دے وچ جان دین دے قائل او۔'' ''میں تیرے واسطے ہر دور وچ مردا رہیا واں سندھو '' ''میرے کول بہہ کیوں نہےں جاندے او؟ '' '' نہیں، میں تیرے کول نہیں، میں تیرے ساہمنے بیٹھاں گا۔'' ''کیوں '' ''اسیں عبادت گاہاں ول کنڈ کر کے نہیں بیہندے آں۔ '' ''حق تے لوک تینوں کافر سمجھدے نیں'' '' میں مومن کدوں آں '' ''پر فیر وی لوکاں دا خیال کرنا اے '' ''میں منافق نہیں آں، تہاڈے نال محبت کیتی اے۔'' ''محبت دے میدان وچ مرن والے فاقیاں وچ میں شامل آں۔'' '' پر توں تے جیوندا ایں۔'' ''ایہہ میرا نواں جنم اے، میں تیری محبت وچ فیر مراں گا تے فیر جنم لے کے آواں گا، تے تیرے لئی میرا مرن تے جیون دا ایہہ سلسلہ قیامت تیکر چلدا رہوے گا۔''
