ڈاکٹر منظور دی کتاب وچ فیض دی شاعری توں جمہوریت دی تحریک تیکر سب کجھ ملے گا

ساڈے ملک دا مسئلہ ایہہ ہے پئی جیہڑی جماعت وی اقتدار وچ آؤندی ہے جدوں اوہ اپوزیشن وچ ہوندی ہے تے اپوزیشن وچ رہندیاں ہوئیاں منگاں تے منشور توں مکر جاندی ہے۔ ایہہ وچار وٹاندرا اُگھڑدے ہوئے سندھی سوجھوان ذوالفقار ہالیپوتہ نے وڈے سوجھوان تے کالمسٹ ڈاکٹر منظور اعجاز دی کتاب 'مائی پیپلز مائی تھاٹس' دی مکھ وکھالی دے اکٹھ دے موقعے تے نمائندہ پاکستان پوسٹ نال گل بات کردیاں ہوئیاں کیتا۔

اوہناں کہیا ڈاکٹر منظور اعجاز نے جیہڑے انگریزی کالم ڈیلی ٹائمز وچ لکھے اوہ مشرف دے دور وچ لکھے جدوں مشرف چلے گئے تے میں وچاریا پئی ڈاکٹر ہوراں دے ایہہ کالم پاکستان لئی اثاثہ ثابت ہو سکدے نیں تے ایہناں ڈھائی تن سو کالماں نوں کتاب دی شکل دتی ایس کتاب وچ فیض دی شاعری توں پنجاب دے کلچر تیکر تے جمہوریت دی بحالی لئی تحریک دی کامیابی وی رلتی ہے۔ ایہناں کالماں وچ پاکستان دے سارے مسئلیاں دی دس پائی گئی ہے جیہڑے لوک جمہوریت تے پاکستان دے استحکام تے پاکستان دے اگے ودھن تے یقین رکھدے نیں اوہناں لئی ایہہ کتاب وڈی سوغات ہے اوہ پڑھن تے تجزیہ کرن پئی مشرف دے دور وچ جمہوریت نوں بچاؤن والی تحریک کنی کامیاب ہوئی ایس کتاب توں ثابت ہو جاوے گا ایہہ کتاب اگلیاں نسلیاں لئی راہ وی ہے پئی آؤن والے ویلیاں وچ ملکی ترقی وچ کیویں کم کر سکدے نیں۔

ڈاکٹر منظور اعجاز نے پاکستان تے جنیاں وی گلاں لکھیاں نیں بڑیاں اہم نیں پاکستان وچ نو گیاراں توں مگروں امریکہ دے پاکستان وچ کردار تے کئی کالماں وچ دسیا گیا ہے پئی ایتھے امریکہ وچ اوہ لوک جیہناں دے پاکستان دی سیاست وچ لابھ تے جیہڑے لوک دکھنی ایشیا دے امن نال رہن دے حوالے نال فکر مند نیں ایس لئی ایہہ کتاب گائیڈ لائن ہے پاکستان کمیونٹی جیہڑی ایتھے امریکہ رہندی ہے اوہدا اپنے ملک نوں پاکستان دے حالات دا جائزہ لین لئی ایہہ کتاب اک شیشے جہی ہے۔ پیپلز پارٹی جدوں اپوزیشن وچ سی تے انج دے سوجھواناں دی ہاں وچ ہاں ملاؤندی ہے پر جدوں حکومت لبھ گئی اسٹیبلشمنٹ دے رحم کرم تے ہو گئی بینظیر دی اپوزیشن دا دور تہاڈے ساہمنے ہے ایہہ لوک سمجھدے ضرور نیں پر اوہناں دیاں ترجیحاں بدل جاندیاں نیں تے اوہناں گلاں توں سبق نہیں سکھدے اوہناں دیاں ناکامیاں دا کارن ایہہ وی ہے پئی حکومت وچ رہندیاں ہوئیاں سوجھواناں دی بے لوث سپورٹ تے عمل کردے نیں۔ پاکستان دی ریاست دے وچ جیہڑے مسئلے نیں اوہدے وچ بلوچستان دا مسئلہ، پنجاب وچ جیہڑی ات واد ودھ رہی ہے اوہدا مسئلہ، ات وادی ساڈی عسکری طاقتاں دے مقابلے وچ آرہے نیں ، سندھ دا جھیڑا، ایم کیو ایم دا جھیڑا صوبائی خود مختاری دا جھیڑا بڑا گنجھل دار مسئلے نیں ضرورری سی پئی سندھ دے جواناں نوں دسیا جاوے جیہڑے پنجاب دے نال روایتی دشمنی سکھائی گئی ہے اصل وچ پنجاب تے سندھ دی آپو وچ دوستی تے بھرا بندی ہی پاکستان دی سیاست لئی ضروری ہے۔

ایس کتاب نوں اکٹھا کرن دا میرا مقصد ایہہ سی پئی دسیا جاوے پئی کیویں پنجابی چاہندا ہے سندھ تے پنجاب اگے ودھن وچ ایہہ اتحاد ہی پاکستان دی فیڈریشن بچا سکدا ہے جیہڑے لوک کسے قوم دا حصہ نیں جیہدے کول بولی ہے کلچر ہے اوہ لوک کدی وی دوجی قوم دے غلام بننا پسند نہیں کرن گے۔ پنجاب کدی وی نہیں چاہندا سندھ غلام ہووے اک اُچیچا میل ملک تے قبضہ کرن لئی پاڑ پاؤندا ہے۔ تاریخی بیک گراؤنڈ وچ ویکھیا جاوے تے بابا بلھے شاہ سلطان باہو تے بابا فرید توں لے کے اج تیکر دے سوجھواناں تیکر میرے خیال وچ بڑا چنگا سنیہا ہے پنجاب دے لوکاں وچ کتاب پڑھن دا رواج گھٹ ہے میری پنجاب جواناں نوں بیتنی ہے پئی کتاباں پڑھن تے ویکھن پاکستان دے ساہمنے کیہڑے چیلنج نیں ایہہ دہویں قوماں پنجابی تے سندھی حقیقی قوماں نیں جیہڑیاں ہزاراں سالاں توں وس رہیان نیں اوہ کیویں رل کے پاکستان نوں اک آئیڈیل ریاست بنا سکدیاں نیں۔

ڈاکٹر منظور اعجاز نے ایس موقعے تے کہیا پئی میں جدوں وی کالم لکھدا ہوواں پہلے وچارنا پئی کیہڑا انج دا ایشو ہے جیہڑا پڑھن والیاں نوں پتہ نہیں کیوں جو جیہڑی گل ہر بندہ میڈیا وچ کر رہیا ہے اوہدے تے لکھن دا کوئی فیدا نہیں لکھدے ویلے تاریخی سیاسی سماجی کارناں نوں نظر وچ رکھناں تے سیاق و سباق وچ ہوون والیاں واپریاں دی تفسیر کرناں اوہناں تے اُکا کمنٹری نہیں کردا۔ ایہہ کتاب اوہناں کالماں دا ذخیرہ ہے جیہڑے دو ہزار پنج توں نو تیکر ڈیلی ٹائمز وچ لکھے ۔ یاراں دی منگ سی پئی ایہہ چار سال پاکستان وچ بدلیاں دے سال نیں ایس لئی اہناں کالماں نوں کتابی شکل وچ آؤنا چاہیدا ایہہ جتن ساڈے سندھی سوجھوان بہت ہی پیارے سنگی ذوالفقار ہالیپوتہ دا ہے اوہناں نے بڑی ہی لگن نال اہناں کالماں نوں اکٹھا کر کے کتابی صورت دتی۔

فیر موضوع ول آواں جیہڑے لوک پاکستان دی نکھیدی کردے نیں اوہناں نوں تاریخ ضرور پڑھی چاہیدی ہے پئی پاکستان نے اُنی سو سنتالی وچ ہن تیکر گھٹ ترقی نہیں کیتی امریکہ تے انڈیا نال مقابلہ ٹھیک نہیں کیوں جو جدوں پاکستان بنیا سندھ توں تے پنجاب توں پڑھیا لکھیا تے کاروباری ہندو تے سکھ طبقہ ہجرت کر کے انڈیا ٹر گیا تے فیر خلا پیدا ہو گیا تے ایہناں لوکاں دی ہجرت نال ہندوستان نوں فیدا ہویا تے یوپی ویران صوبہ سی ایہناں لوکاں پاکستان توں ہجرت کر کے یوپی آباد کر دتا تے پاکستان اُکا زیرو ہو گیا تے فیر زیرو توں شروع کرنا پیا پاکستان کساناں جاگیرداراں تے مزدوراں دا ہی رہ گیا ایہہ کاروباری تے پڑھیا لکھیا میل مک گیا سیاسی سماجی طور تے زیرو ہو گیا جیہڑے لوک پاکستان دی نکھیدی کردے نیں اوہناں نوں سوچنا چاہیدا پئی اُنی سو سنتالی وچ زیرو توں شروع ہو کے دنیا وچ اپنا تھاں بنایا تے جیہڑے لوک امریکہ تے انڈیا نال مقابلہ کردے نیں ایہہ گل نہ بھلن پئی ہر شعبے وچ پاکستان نے ترقی کیتی ہے تے میرا لکھن دا مقصد وی ایہو ہے مسئلیاںدا صحیح پاسے حل تے سوچ نوں پیدا کیتا جاوے۔