Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کتاباں >> سدھراں دا خون

سدھراں دا خون

نائلہ صدف
December 19th, 2014
5 / 5 (1 Votes)

لندن توں جد ساڈا چاچا گوری میم ویاہ کے لیایاتے اپنے پنڈ وچ کیہ لاگے دے پنڈاں وچ وی دُھم پے گئی۔۔۔۔۔۔سارے پنڈ دیاں سوانیاں ہم ہما کے گوری میم ویکھن ساڈے گھر آوڑیاں، اوہ اُوہناں دا مونہہ حیرانی نال تکدی تے اوہ اوہدا مونہہ تکدیاں فیر آنے گھما گھما کے اِک دوجی ول تکدیاں۔۔۔۔۔۔ساڈی دادی مٹھائی دا تھال پھڑی ہر کِسے دا مونہہ مٹھا کراندی تے اوہ دادی کولوں پچھدیاں،
’’وڈی بے بے گوری میم تہاڈے نال بولدی اے‘‘
وڈی بے بے اکڑ کے جواب دیندی،
’’تے ہور نہیں بولدی‘‘
’’ایہدی بولی تہاڈی سمجھ وچ آجاندی اے‘‘
’’نہیں آوندی تے آپے آجائے گی‘‘۔۔۔بے بے سوانیاں دے جواب دے دے کے تھک گئی تے اخیر بولی،
’’جاؤ اپنے اپنے گھر۔۔۔۔۔۔پر کل ولیمہ جے ضرور آنا بال بچے سمیت‘‘۔
وڈی بے بے نے میم لئی شہروں لال رنگ دا سلمے ستارے والا جوڑا منگوایا۔ اپنے سارے گہنے میم نوں مونہہ وکھالی دے دِتے۔ میری ماں تے وڈی تائی نے میم نوں تیار کیتا۔۔۔رات نوں ولیمہ سی، سارا پنڈ، کیہ مرد تے کیہ سوانیاں، ولیمہ کھان گھٹ تے میم نوں ویکھن بوہتا آئے سن، میم ووہٹی دے روپ وچ چن زمین تے اُتر آیا سی۔
تھوڑی دیر بعد میم پنڈال وچ آکے ساریاں دے وچکار بہہ گئی۔ رسماں شروع ہون توں پہلاں ساڈی وڈی مسیت دے مولوی صاحب آئے، میم نوں کجھ آکھیا پر اوہ چپ رہی۔ کول بیٹھے چاچے نے جد اوہدے کن وچ کجھ آکھیا تے اوہ مسکرا پئی۔ مولوی صاحب دی سمجھ وچ حالے وی کجھ نہ آیا۔۔۔پر چاچے نے مشکل آسان کر دِتی ۔
’’مولوی صاحب کلمہ پڑھاؤ،گلوریا بغیر کِسے دباؤ توں اسلام قبول کرن لئی تیار اے‘‘
مولوی صاحب نے کلمہ پڑھایا۔۔۔۔۔۔اوہدا اسلامی ناں سِدرہ چوہدری رکھیا۔۔۔تے پورے پنڈ وچ اوہدے مسلمان ہون دا اعلان کر دِتا۔
فیر رسماں شروع ہوئیاں،سب نے سِدرہ نوں سلامی دِتی،تے وڈی بے بے نے دو بیگھے زمین مونہہ وکھالی دِتی۔
ماہیئے، گدّے ، ٹپّے۔ پنڈ دیاں سوانیاں نے گائے ڈوم مراسیاں نے جگت بازی شروع کر دِتی،رات گئے ایہہ محفل ختم ہوئی ، سارے اپنے اپنے گھراں نوں پرت گئے۔ گلوریا توں سِدرہ بن کے بڑی خوش سی۔ فیر پنڈ دے لوکاں دا پیار تے اوہدا سواگت، اوہ کدی سوچ وی نہیں سی سکدی کہ پنڈ دے لوک اوہنوں ایناں پیار دیون گے۔
میں ایہناں لئی ضرور کجھ کراں گی اوس دل وچ ارادہ کر لیا۔
سب توں پہلاں اوس ماں بولی سِکھی فیر اوس پنڈ دے مسئلے مسائل تے غور کرنا شروع کر دِتا۔۔۔جہالت تے غربت دے خاتمے لئی ضروری سی کہ پنڈ دے منڈے کڑیاں نوں تعلیم دِتی جاوے، دوجا وڈا مسئلہ پنڈ دے جوان منڈیاں نوں ہیرؤن ، چرس، شراب، تے دوجیاں نشہ آور چیزاں توں روکنا سی۔
جیویں جیویں ویلا لنگھدا گیا سدرہ دے دل دی سِدھر زور پھڑدی گئی۔ اوس سوچیا جیہڑی دو بیگھے زمین وڈی بے بے نے مونہہ وکھالی دِتی سی تے گہنے، اوہ سب ویچ کے اوس زمین تے اوہ اِک سکول تے ہسپتال بناوے گی جتھے پنڈ دے بال مفت تعلیم حاصل کرن گے تے ہسپتال وچ منشیات استعمال کرن والے مریضاں دا علاج مفت ہووے گا، نالے ایس زہر توں بچن لئی جانکاری دتی جاوے گی۔
چاچے دی ہلا شیری تے پنڈ دے لوکاں دے تعاون نال سکول تے ہسپتال تیار ہوگئے۔سکول وچ بال مفت تعلیم حاصل کردے تے ہسپتال وچ ہیرؤن، چرس تے افیون استعمال کرن والے مریضاں دا علان مفت ہوندا،اوہدے علاج تے توجہ نال مریض نہ صرف صحت مند ہوکے نشہ چھڈ دیندے بلکہ کم دھندے وچ لگ جاندے۔
اک دن اوہ اپنے کمرے وچ بیٹھی مریضاں نوں ویکھ رہی سی کہ چند بندے اندر داخل ہوئے تے اوہدی اجازت توں بنا کرسیاں تے بہہ گئے۔
مریضاں توں فارغ ہوکے اوس اوہناں تُوں پچھیا۔
’’کس کم آئے جے‘ کوئی تہاڈا مریض ہسپتال وچ داخل اے‘‘۔
’’نہیں بی بی مریض نہیں۔۔۔۔۔۔ پر وڈے سائیں دے حکم مطابق آئے آں۔گل گھما پھرا کے نہیں، سِدھی طرح کرن آئے آں، اوہناں وچوں اِک بندہ مچھاں نوں تاء دے کے بولیا۔
’’کیہ گل‘‘ اوہ گھبرا گئی۔
’’اپنا ایہہ سکول تے ہسپتال بند کر‘‘
’’پر کیوں؟‘‘
’’وڈے سائیں دا حکم اے،اساں ایہہ دھندا نہیں چلن دینا‘‘۔
’’کوئی وجہ‘‘؟
’’کیوں جے تیرے دھندے دی وجہ نال ساڈا دھندا ٹھپ ہوندا اے، ایہہ سانوں منطور نہیں‘‘۔
’’پر میں اِس پنڈا دا حصہ آں۔ میں تہانوں کس طرح لوکاں دیاں جاناں نال کھیڈن دیاں، کس طرح لوکاں نوں اَج دے دور وچ تعلیم توں محروم رہن دیاں‘‘۔۔۔اوہ غصے نال لال پیلی ہوگئی۔
’’ایناں دیاں گے کہ گھر بہہ کے کھا‘‘،اوہناں وچوں اِک نے پستول کڈھ کے گل کیتی۔
’’میں گھر بہہ کے لوکاں دا خون چوساں، ایہہ مینوں منظور نہیں‘‘۔
’’ویکھ لے‘‘
ویکھ لیا اے۔۔۔جاؤ اپنا کم کرو۔۔۔اوہ گجی۔
پر اوہناں دے جان توں بعد اوہ پریشان ہوگئی۔
پر اوس کم جاری رکھیا۔
اِک سویر اوہ ہسپتال جان لئی گھروں نکلی۔۔۔راہ وچ ای سی، کہ دو موٹر سائیکل سوار مُنڈیاں نے اوہدے تے گولی چلا دِتی۔
پولیس آئی۔۔۔کیس چلیا۔۔۔ گواہ کوئی نہیں سی،بس اِک خبر ہر پاسے پڑھی تے سنی جا رہی سی۔
’’ایک انگریز عورت سکول اور ہسپتال کی آڑ میں منشیات کا دھندا کرتی ہوئی ماری گئی‘‘۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels