جگت جانو ناول لکھاری امیتاو گھوش دا نواں ناول 'سی آف پوپیز' مطلب 'پوست دا سمندر' ہندوستان تے برطانیہ وچ اکویلے جاری کر دتا گیا۔ امیتاو گھوش ہندوستان دے انگریزی وچ ناول لکھن والے چنگے لکھاریاں وچ گنے جاندے ہین۔ ایس توں پہلوں اوہناں دا ناول 'دی گلاس پیلس' مطلب 'شیشے دا محل' جگ دیاں سب توں ودھ وکن والیاں کتاباں وچ رلتی رہیا ہے اتے اہنوں دو ہزار اک وچ ای بُک انعام وی دتا گیا ہے۔
ناول 'سی آف پوپیز' یاں پوست دا سمندر نوں امیتاو گھوش دی ہن تک لکھی جاون والی سبھ توں ودھیا لکھت آکھیا جا رہیا ہے۔ ایہہ ناول اوہناں ولوں لکھے جاون والے تن سلسلہ وار ناولاں دی پہلی گھنڈی ہے تے ایہہ اٹھاراں سو ستونجا توں پہلوں اُنی ویں صدی دے پہلے ادھ بارے ہے۔
گنگا دے میدانی علاقیاں دے پوست دے کھیتاں توں لے کے کلکتہ وچ ایسٹ انڈیا کمپنی دے نواباں دے محلاں توں ہوندا ہویا ایہہ ناول سمندر راہیں دور دُراڈے دے علاقیاں دی من کھچویں سیر ہے۔ ایہدے وچ کئی پاتر ہین جیہناں وچ پنڈ دی اک رنڈی زنانی، اک دیوالیہ بنگالی واہی وان، اک آزاد خیال فرانسیسی کڑی، اک آزاد کالا امریکی، جہاز چلاؤن والیاں دا اک جتھہ تے کجھ مزدوراں نوں مقدر نے آئیبس ناں دے اک جہاز وچ اکٹھا کر دتا ہے جیہڑا ہوگلی بندرگاہ توں ماریشس دے سفر تے ہے۔
ایس ناول وچ اُکا دو صدیاں تے تن بر اعظم ای نہیں سگوں برطانوی سامراج وچ لوکائی دے رہن سہن، ریتاں رواجاں تے ویاہ غمی دا وی ویروا ہے۔ جان تھیم نے لکھیا ہے کہ ایس ناول دا وہ انگ جیہڑا سمندر وچ ہے اوہ ہنرل میلول تے جوزف کانراڈ دے سمندر دے منظر وکھاؤن نال میل کھاندا ہے۔ نالو نال ای ایہدا ساحلی تے زمینی انگ وی ایناں من کھچواں ہے کہ ہریک دے مُکن تے دل کردا ہے کہ کاش ایہہ ہور ہوندا۔
امیتاو گھوش دا ناول 'سی آف پوپیز' بڑا ودھیا ہے جے اوہ باقی دے دو ناول وی انج ای لکھن وچ کامیاب ہو گئے تے اوہناں دے ایہہ ناول اکیویں صدر دے شاہکاراں وچ رلتی ہووے گی۔
