ہن تُسی عوامی جمہوری فورم دا نواں شمارہ نمبر45 آن لائن ویکھ سکدے ہو۔ پرچہ دو چار دیہاڑ تیک چھپ جائے گا۔ ایس وار دے پرچے دا اداریہ جمہوری میثاق اُتے ہے جس وچ سیاستداناں توں آساں کیتیاں گئیاں نیں پئی اوہ جمہوری نظام لئی آپسی جھیڑیاں نوں گھٹاون۔
زرداری تے میاں ہوراں دی لڑائی پاروں ایہہ مت دِتی گئی ہے کہ جے اتحاد ٹُٹ گیا تے ایس دا دوناں نوں نقصان ہوئے گا۔ ہمیش وانگ ملکی تازہ صورتحال تے 5 مضمون شامل نیں۔ لکھن والیاں وچ اسلام آباد دے وڈھے کاڈھے پروفیسر خالد محمود وی نیں اتے سی آر اسلم دے سجن کلب علی شیخ وی، غدری بابیاں نوں منن والے پنڈی دے اقبال بالی ڈھلوں وی اتے این جی او سیکٹر وچ کم کرن والے سلمان عابد وی۔ سلمان سواتی تے حکم سنگھ سیاسی دے وکھری ٹائپ دے کالم وی منہ دا سواد پورا کریندے نیں۔
فورم وچ کھٹمنڈو تُوں اک لکھت شامل ہے جیہڑی فورم لئی خصوصی طور تے لکھی گئی۔ فورم نے ہرکشن سنگھ سرجیت نوں وی یاد رکھیا ہے اتے سولزنیٹسن نوں وی۔
پروفیسر خواجہ مسعود دا لما چوڑا انٹرویو اتے تصویراں وی نیں اتے مجاہدمرزا دا مضمون وی۔ خواجہ ہوراں دا آکھنا ہے ''چین نے سرمایہ داری نوں کراہے پا دِتا ہے''۔ بلراج ساہنی دے ہتھوں مارکسسٹ بنن والے خواجہ ہوراں نیں اپنے بچپن دا احوال وی دسیا ہے اتے کمیونسٹ پارٹی بارے وی پنجابیاں دی کہانی دے گواچے پنے وی لبھے نیں۔ پنڈی سازش کیس اتے بنے بھائی دی کمزوریاں تے خوبیاں بیان کردے ہوئے خواجہ ہوراں نیں ایہہ جھات پائی ہے کہ پارٹی نوں منظم کرن دی بجائے ساڈے لیڈر دوجے چکراں وچ پھس گئے۔ خواجہ ہوری عطا اللہ شاہ بخاری دی پنجابی تقریراں دا ذکر وی کریندے نیں اتے قائداعظم دی ٹُٹی بھجی اردو بارے وی جھات پاوندے نیں۔
صوبہ سرحد دا ناں کیوں بدلیا جاوے ایس بارے فورم نے نویں بحث چھیڑی ہے۔ مشتاق الرحمن شفق نے اس بارے مضمون لکھیا ہے۔ صحت دے شعبے وچ ''فرسٹ کزن میرج'' والا مضمون معلوماتی ہے۔
راجے انور دی کتاب تے عمران خالد دا مضمون 80ء دے دہاکے ول مڑ جھات پاوندا ہے۔ ڈاکٹر مری سوبھو گیان چندانی اتے عبدالرؤف ملک سجاد ظہیر تے انہاں دے خاندان تے لڑی وار لکھ رہے نیں۔ ڈالی بارے قیصر نذیر دا مضمون بڑا سوادی ہے اتے کتاباں تے تبصرے ہمیش وانگ معلوماتی نیں۔ ایس وار یادداشتاں دے عنوان نال پروفیسر خالد محمود لہور بارے اپنی یادداشتاں لکھیاں نیں پرچہ www.awamijamhoriforum.org تے پڑھ سکدے ہو
