حکمت اوس خداوند والی مالک ملک ملک دا لاکھ کروڑ کرن چترائیاں کوئی پچھان نہ سکدا قدرت نال رہے سر گرداں دائم چرخ فلک دا ہاشم خوب ہوئی گلگاری فرش فناہ خلق دا
حکمت نال حکیم ازل دے نقش نگار بنایا ہر ارواح اسیر عشق دے قید جسم وچ پایا جو مخلوق نہ باہر اس تھیں ارض سما وچ آیا ہاشم جوش بخار عشق دے ہر اک شان وٹایا
حسن کلام جو شاعر کردے سخن نہ ساتھیں آیا جیہا کو عقل شعور اساڈا اساں بھی آکھ سنایا سن سن ہوت سسی دیاں باتاں کامل عشق کمایا ہاشم جوش طبیعت کیتا وہم اتیول آیا
آدم جام بھنبور شہر دا صاحب تخت کہاوے جاہ جلال سکندر والا خاطر مول نہ لیاولے وحوش طیور جناور آدم ہر اک سیس نواوے ہاشم آکھ زبان نہ سکدی کون تعریف سناوے
شہر بھنبور مکان الہی باغی بہشت بنایا فرش فروش چمن گل بوٹا ہر اک ذات لگایا ندیاںحوضتالاب چوطرفیں رل مل خوب سہایا ہاشم روح رہے وچ پھسایا دام فریب وچھایا
