اک دن خدمتگار پیالہ مل خرید بازاروں خاوند پاس گیا لے تحفہ دل دے شوق پیاروں ویکھ حیران ہویا سوداگر باہر صفت شماروں ہاشم خوب ہوئی استادی استاکار گھماروں
دل وچ شوق پیا اٹھ تریا تھاں مکان نہ جانے تلا نام صحیح کر شہروں پہتا اوس ٹکانے سوہنی نظر پئی اس تھاؤں مار نہار دھگانے کھاکھا عشق طمانچہ ہاشم مڑیا وانگ نمانے
آیا پھیر ٹکانے اپنے ہو دل ریش بیچارا بھلے ہوش پیا وچ حیرت کیتا عشق پسارا دلی وار سٹی گجراتوں نالے بلخ بخارا ہاشم بید کتابوں عقلوں برہوں پنتھ نیارا
نیندر بھکھ گئے ہو ودیا وسرے خویش قبیلے لکھ لکھ فکر دلیل اٹھاوے یار ملے کت حیلے برہوں آن وٹائی صورت نین لہو مکھ پیلے ہاشم راس لیاون حیلے مشکل باہجھ وسیلے
کرکے خیال بنے جس مطلب حیلہ فکر اٹھایا گھوڑا ویچ لیا کجھ پیسے شوکت شان گوایا خدمتگار گئے اٹھ نالو عاجز عشق بنایا ہاشم جام فروشی پکڑی لاہا عشق وکھایا
