مہینوال تاہیں دن گندے روز گیا شب آئی مانگن خیر فقیراں وانگر صورت جا وکھائی قدرت نال سوہنی اوس ویلے پاون خیر لیائی ہاشم درد منداں دے دل دی صاحب آس پوچائی
سوہنی آن کہیا لے بھچھیا نازک طور زبانوں سن کے تیر لگا دل عاشق تازہ تیر کمانوں مہینوال زمین پر ڈگیا گزری ہوش جہانوں ہاشم ویکھ رہے کد ثابت چمکی تیغ میانوں
جاوے کرن گدائی عاشق خیر معشوق لیاوے جانے حال سوئی ایس گل دا نیہہ کتے ول لاوے پچھی سار پتنگوں اس دی ویکھ شمع جل جاوے ہاشم جان سوئی اس پاوگ بہت جنہاں دکھ پائے
ڈگیا ویکھ سوہنی نے اس نوں عقلوں ڈول پچھاتی باہوں پکڑ اٹھایا اس نوں چوری نال چپاتی جوڑے دست کہیا بھر چشماں پھیر نہ آویں راتی ہاشم بہت بری جس ویلے دوت کنے گل جاتی
راتیں پھیر گلی ایس آیوں بھچھیا کرن گدائی جانوں مار گواوگ تینوں دوت کنے سن پائی کونجاں وانگ بھلا نہ دل نوں جھال بنی سر آئی ہاشم کوک سنیں رب صاحب جن ایہ کھیل مچائی
