سوہنی ویکھ کباب سجن دے پھیر کہیا کر زاری شابش یار مراد عاشق دی تیں کر خوب اتاری میری جان ہوئی سر صدقہ وار سٹی لکھ واری ہاشم شوق تیرے وچ تپدی عشق اتوں بلہاری
ہُن توں پھیر نہ آویں ہر گز بیٹھ ٹکاناں کر کے پوری آن ہوئی تدھ کولوںیار گھنے دکھ جر کے اوتھے بیٹھ اُڈیکیں سوہنی آس رب دی دھر کے ہاشم آن اتھائیں ملساں ویکھ جھناؤں تر کے
مہینوال سوہنی نوں مل کے پھیر ہویا مُڑ راہی اگلی رات سوہنی دی شہروں واگ نصیب اٹھائی نصفوں رات پئی جس ویلے دوڑ سجن ول دہائی ہاشم کر اسباب ندی دا نال گھڑا پھڑ لیائی
دھر کے جان تلی پر دلدا خطرہ خوف اُٹھایا انچر ڈار گھڑا بھر جھاتی صاحب نام دھیایا پیر فقیر ولی ہور جتنے خواجہ خضر منایا ہاشم صدق پچھے رب اس نوں ندیوں پار لنگھایا
جانی یار ملے مل بیٹھے صاحب پھیر ملائے وارو وار دوہاں دکھ اپنے حال احوال سنائے ملیاں بیت گئے دم جتنے جان سوئی دم آئے ہاشم جان سوئی سکھ پاون بہت جنہاں دکھ پائے
