خوشی گمان نفس دیاں فوجاں نت ددھ انہاں مکھ چووے لکھ برساں تک جیوے کوئی اتے لکھ فوجاں گھڑ ڈھووے کرے مہم لڑے دن راتیں تاں رعیت نہ ہووے کرڑی قید نفس دی ہاشم ایتھ ہر اک اٹک کھلووے
راوت فیل نشاناں والے لکھ دسدے کوئی نہ تکے چاک چگاوے مجھیں سوئی ویکھ جہان نہ سکے ماؤ روز دیوے لکھ طعنے اتے باپ دواوے دھکے رانجھا مان نمانی ہاشم اوہنوں رب سلامت رکھے
اکناں کول حس چترائی اک گھایل یار دیوانے اکناں کول قوت نہ شب دا اک بخشن روز خزانے اکناں درد ہمیشہ آہیں اک گاون نال ترانے ہاشم خواب چمن دیاں لہریں گئے پھر پھر کئی زمانے
اوس گلی دِلبر دی جائیے پر اسپ جنونہ چڑھ کے دکھاں نال کھڑا ہمراہی اتے نال سکھاں دے لڑ کے آکھن لوک دیوانہ اآیا اتے ڈھول جاون رل کے ہاشم خوب ہووے دل راضی بھائی اوس گلی وچ وڑکے
ویکھن نین نیاز نیناں دی جد نین نیناں ول اٹکے نین برے نت مارن چوگاں جد نین نیناں ول ٹپکے کاری چوگ نیناں نوں لگی ہرگز رہن نہ اٹکے ہاشم دوس نیناں وچ ناہیں نین ویکھ ادائیں لٹکے
