دل سوئی جو سوز سجن دے نت خون جگر دا پیوے نین سوئی جو آس درس دی نت رہن ہمیشہ کھیوے دل بے درد بیادیں بھریا شاہلا اوہ ہر کسے نہ تھیوے ہاشم سو دل جان رنگیلا جیہڑا ویکھ دلاں ول جیوے
نہ کجھ متھی نہ متھ لے ٹریا اسیں ٹور وتے ٹر آئے بیتن جوگ نہ متھ کے بیتے ان آپے چا بہائے کجھ معلوم نہیں اہ حکمت مڑ کتول ٹور لجائے ہاشم آپ کرے سبھ کاراں وچ حکمت اسی بنائے
دوزخ دے ول نال یاراں دے خوش ہو کر پگ دھرئیے جمل بہشت ملے بن یاراں اتے ذرا قبول نہ کرئیے جو دم دور یاراں توں ہووے اوہ دوزخ دے دم بھرئیے ہاشم ساتھ یاراں دے کرئیے خواہ ترئیے خواہ مرئیے
ٹٹا پان پئے پر ملکیں رب سٹے دور دراڈے قسمت خیال پئی بن دشمن ہن کیہ وس یار اساڈے دلبر یار وساریں ناہیں اسیں جت کت حال تساڈے عاجز لوگ نمانے ہاشم نہیں شرکت نال خدا دے
دل نون بان پیا اک مائے مینوں ظاہر مول نہ ہووے آپے بال چغہ وچ جلدا پر سیک لگے بہ رووے چھڈدا بان نہ جل بل مردا میری جان خلاصی ہووے ہاشم حال تتی دا جانے جیہڑا نال لہو مکھ دھووے
