چمک مروڑ محبوباں والی جے توں سمجھن لایق ہوویں جس توں وار سٹے لکھ ہاسے توں رون ایہا بہ روویں وصلوں آن ہجر دے پیارے اساں ویکھ ڈٹھے رس دونویں ہاشم توڑ زنجیر مذہب دے اتے ہو نر ویر کھلوویں
کیوں تلوار وچھوڑے والی توں ہر دم سان چڑھاہیں تیتھے زور نہیں بن تیغوں توں انویں مار گواویں عاشق نال نہیں سر رکھدے توں کس پر تیغ اٹھاویں ہاشم بول نہیں مت بولی کوئی ہور نصیحت پاویں
ایہنیں اکھیں رب نظر نہ آوے رب ہور اکھیں من ماہیں دیہنسر نیست اکھیں ہتھ آیا پر رام پچھاتو سو ناہیں جت ول الٹ پوے رخ دل دا ایہ نین پران تداہیں ہاشم دوس نیناں نوں کیہا ایس دل دیاں دور نگاہیں
نہیں قبول عبادت تیری توں جبلگ پاک نہ ہوویں عامل خاک پوے مل تیرا پر جب لگ خاک نہ ہوویں نہیں بیباک کدی ہر طرفوں جد بے اتفاق نہ ہوویں ہاشم کیہ مشتاق عشقدا بھلا جاں سر تاک نہ ہوویں
ایسے یار ملین سببیں جیہڑے کدی نہ موڑن کھیں دیس بدیس نہ لبھدے ڈھونڈے اتے مل نہ آون لکھیں رلدے پھرن جنون لوکائی اوہ اگ چھپائے ککھیں پر اوہ بھیت پچھانن والا توں ہاشم دل وچ رکھیں
