Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ہیر شاہجہان مقبل >> ہیر مقبل 419 - 423

ہیر مقبل 419 - 423

شاہ جہان مقبل
January 23rd, 2008

419۔
مشک وچ نجومیاں آکھیائی پئی کسے فقیر دی آہ تینوں
جے توں سد کے جوگی نوں کریں راضی صحت بخشی رب الہٰ تینوں
گھر سد منگا توں کھیڑیاں نوں اسیں دینے ہاں جیؤں صلاح تینوں
ہیر کھوہ دے دیہ توں راولے نوں مقبل بخشے رب الہٰ تینوں
420۔
کرامات فقیر دی ویکھ لتھی راجہ نوکراں نوں فرماوندا ئی
بنھ کھیڑیاں نوں سنے ہیرن لیاؤ نال حکم دے فوج دوڑاوندا ئی
سدوائے کے رانجھے نُوں نوکراں تھوں راجہ عدلی پاس بہاؤندا ئی
مقبل بخش گناہ خدائے دے ناوں کیتی آپنی توں پچھوںتاوندا ئی
421۔
کھیڑے جائیکے فوج نے پگڑاؤندے آئی ہیر سیال بھی نال میاں
ہیر کھوئیکے رانجھے نوں پھیر ملی ہویا کھیڑیاں دا بُرا حال میاں
کھیڑے ویکھ جنڈی درگاہ وچوں ہوئے ہیر تے رانجھے دےنال میاں
پیارے مقبلے نوں گل لاء ستی ہویا رب دا فضل کمال میاں
422۔
ہویا عادلی راجے دا سُول مٹھا کیتی ہیر تے رانجھے دعاء میاں
پھیر ملک سارے اُتے مینہہ ہویا ساری اگ بجھائی خداء میاں
کہیا عادلی راجے نوں ہیر رانجھے تیرا کرے مقصود خداء میاں
عشق ہیر تے رانجھے دا پاک ہویا مُقبل ظاہرا اکھ سناء میاں
423۔
عشق ہیر تے رانجھے نوں آفریں ہے قول آپنا پال وکھایا ئی
اس عشق قصاب تھوں بکری جیوں کھیڑا اپنا آپ سُنایا ئی
سانوں رب دا فضل تے زُہد بھلیا عشق عقل دے عمل اُٹھائیا ئی
اوسدا ناں قبول نماز روزہ جس عشق دا مزہ نہ پایا ئی
تیغ عشقدی آن کے جھل لیتے جویں مرن دا مزہ بھلایا ئی
سوال منیاں عاشقاں صادقاں دا قصہ ہیر دا آکھ سُنایا ئی

تمت بالخیر



Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels