Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ہیر شاہجہان مقبل >> ہیر مقبل370-374

ہیر مقبل370-374

شاہ جہان مقبل
January 26th, 2008

370۔
کھیڑے ہیر دے لئی حیران ہوئے سیدا بھیج کے وید بُلائیونے
وید آنوندے نُوں قصہ پیش کر کے رو ہیر دا حال سُنائیونے
لہو بکرے دا اَتے زہر مہرہ گھول ہیر نوں تُرت پلائیونے
نال منتاں سد کے ماندری نُوں مقبل ہیر دا ہتھ چھڑائیونے
371۔
ذرا فرق نہ ہیر نوں مُول پیندا زور ماندری بہت لگا چُکے
دکھ ہیر دا دنوں دن سرس ہووے کھیڑے اپنا زور سب لا چُکے
دارو در ملاں دی کجھ سُد نائیں جھُگا ہیر دے لئی روڑا چُکے
کھیڑے مُقبلا ہیر نوں مار چُکے لاچار ہو رو کُرلا چُکے
رفتن سہتی نزد رانجھا واظہار کرن حال بیماری خود
372۔
چوری اُٹھ کے مانوں توں شام ویلے سہتی رانجھے دے دائرے جاوندی ہے
تھال پُور کے کھنڈ تے چاولاں دا سُدھ سادھ دی نظر پہنچاوندی ہے
جدوں گیا سائیں بھکھیا منگنے نوں مینوں بولیوں جو منہ آوندی ہے
مُقبل خودی گمان نُون چھوڈ بندے بادشاہاں نوں بھیکھ منگاوندی ہے
373۔
طرف سہتی دی مول نہ نظر کیتی رانجھا خودی نُوں کم فرماوندا ہے
ماری غرض دی اساں دے کول آئیوں رانجھا سہتی نوں بولیاںلانونداہے
جدوں گیاساں پیکیاں منگنے نوں مینوں بولئیوں جو من بھانوندا ہے
مُقبل خودی گمان نوں چھوڈ میاں شاہاں توں بھیکھ منگاوندا ہے
374۔
سہتی آکھدی نہ ہے طمع کوئی ویسی مطلبی کُل جہان میاں
مارے غرض دے کن پڑوایونی پیریں خیر دے لئی حیران میاں
پہلاں سُخن اولڑے کیتونی پچھوں تاونے ہاں پشیمان میاں
مقبل بخش خدائیدے نام پچھے میرا جیؤ تے مال قربان میاں


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels