Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> ہیر شاہجہان مقبل >> ہیر مقبل 72-76

ہیر مقبل 72-76

شاہ جہان مقبل
January 29th, 2008

72۔
ہیرے خواب وچ ویکھیا رُوپ تیرا مینوں مہر دینال بولایا ہئی
میں تاں حال تھیں بہت بے حال ہویا جدوں پریم دا قدح پلایا ہئی
چھاتی بہن کلیجڑا پاڑیوئی کہیا برہوں دا تیر چلایا ہئی
مُقبل آفرین ہے تیری دوستی نُوں قول اپنا پال وکھایا ہئی
73۔
ہیر آکھدی رانجھیا کرم کیتوں دتو آن کے تُرت دیدار مینوں
سنگ اپنے چاء رلایو میں کیتوں غیر تھیں چاء بیزار مینوں
میتھوں کتناں تُمناں ہورہیا تیرے عشق دی ہے بس کار مینوں
تیری بندی آں مُقبلا باہجھ دَماں کھڑی ویچ لے ہٹ بازار مینوں
74۔
رانجھا آکھدا رَناں تھیں نفع نائیں رَناں نال نہ دوستی لائیے جیؤ
رَناں سچیاں نوں چاء کرن جھوٹا وارے رناں دے مول نہ جائیے جیؤ
سپ ڈنگ نہ مارنوں رہے مُولے ساری عمر جے دُدھ پلائیے جیؤ
مُقبل رہے جے رہن تھیں بول بیڑا نہیں تخت ہزارے نوں جائیے جیؤ
75۔
ہیر آکھدی رناں نوں نند داہیں میاں سب رَناں بُریار ناہیں
بی بی رابیعہ جہیاں بی عورتاں نے ایپرغیراں دا کُجھ شُمار ناہیں
رناں کیتیاں اولیاں انبیاں نے کوئی رناں بغیر سنسار ناہیں
مقبل ہیر دا جیؤ وکاء رہیا اجے رانجھے نوں اعتبار ناہیں
76۔
رانجھے ونجھلی واہ کے مجھ کُوکی جیؤ ہیر دا اپنے کیتا
بوُری مجھ دا چوئیکے دُدھ مٹھا رانجھے بیٹھ کے ہیر دے نال پیتا
وچ رہیا حجاب نہ ذرا مُولے پر دوہاں دا جوڑ کے جیؤ ستیا
سوال گھت خدائے دا مقبلے نوں سوٹا عشق دا رانجھنے ہتھ لیتا


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels