Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کافیاں شاہ حسین >> کافیاں شاہ حسین 11-20

کافیاں شاہ حسین 11-20

شاہ حسین
February 4th, 2008
5 / 5 (1 Votes)

(11)

عاشق ہوویں تاں عشق کماویں
راہ عشق دا سوئی دا نکا دھاگا ہوویں نال جاویں
باہر پاک،اندر آلودہ، کیا تُوں شیخ کہاویں
کہے حسین جے فارغ تھیویں تاں خاص مراتبہ پاویں

اوکھے لفطاں دے معنے

نکا: سوئی وچ دھاگہ پرون دا سوراخ
تھیویں: ہو جاون
مراتبہ: مرتبہ ،عزت

(12)

آخردا دم بُجھ وے اڑیا!
ساری عمر ونجائی آ اینویں باقی رہیا نہ کُجھ وے اڑیا
در تے آئے لتھو وپاری' جے تھوں لیتی آوست اُدھاری
جاں ترتھینداہی گڑے وے اڑیا
کہے حُسین فقیر سائیں دا، لجھ کلجھ نہ لجھ وے اڑیا

اوکھے لفظاں دے معنے

بُجھ:پتہ کرنا
وست: سودا۔چیز
جاں ترتھیندا: جتھوں تیکر ہو سکے
لجھ کلجھ: عزت۔بے عزتی
بجھ: لبھکافیاں شاہ حسین

13

سجن دے ہتھ بانہہ اساڈی،کیونکر آکھاں چھڈ وے اڑیا
رات اندھیری،بدل کنیاں،باجھ مُشکل بنیاں
ڈاہڈے کیتا سڈ وے اڑیا
عشق محبت سو ای جانن،پئی جیہناں دے ہڈ وے اڑیا
کلر کھٹن کھوہڑی چینا ریت نہ گڈ وے اڑیا
نِت بھرناں چُٹھیاں، اک دن جاسیں چھڈ وے اڑیا
کہے حسین فقیر نمانا نین نیناں نال گڈ وے اڑیا

اوکھے لفظاں دے معنے

سڈ: بلاوا
سو ای: اوہی
پئی جیہناں دے ہڈ:جنہاں تے بیتی۔
کھٹن:پاون
چھُٹیاں:چھالاں

14

گاہک ویندا اِی کُجھ وٹ لے
آیا گاہک مُول نہ موڑیں،ٹکا پنجاہا گھٹ لے
پیوکُڑے دِن چار دہاڑے، ہر ول جھاتی گھت لے
بابل دے گھر داج وہونی،وڑ بڑ پونی کت لے
ہورناں نال اُدھار کریندی، ساتھوں بھی کُجھ ہتھ لے
کہے حسین فقیر نمانا ایہہ شاہاں دی مت لے

اوکھے لفظاں دے معنے

ویندا: جا رہیا ہے
وَٹ: کما لے
پیوگڑے:باپ دے گھر
ہر: رب خدا
وہونی: بنائ
مت: نصیحت

15

کدی سمجھ نداناں،گھر کِتھے ای،سمجھ نداناں
آپ کمینہ،تیری عقل کمینی،کون کہے توں دانا
اینہیں راہیں ڈٹھڑے جاندے ،میر،ملک ،سُلطانا
آپے مارے' تے آپے جیوالے' عِزرائیل بہانا
کہے حسین فقیر سائیں دا، بِن مصلحت اُٹھ جانا

اوکھے لفظاں دے معنے

نداناں: مورکھ بندہ
اینہیں: اہناں نوں
ڈٹھڑے: ویکھے گئے
اُٹھ جانا: چلے جانا۔مرجانا

16

سائیں میں واری آں وو،واری آں وو وار،ڈاری آں وو
چپ کراں تاں دیون طعنے،جاں بولاں تاں ماری آں
اکناں کھنی نوں ترساویں' اک ونڈ ونڈ دیندے نی ساریاں
اکناں ڈھول کلاوے نی سیو' اک کُنتاں دے باجھ بچاریاں
اوگن ہاری نوں کو گُن ناہیں،نت اُٹھ کردی زاریاں
کہے حسین فقیر سائیں دا فضل کرے تاں میں تاری آں

اوکھے لفظاں دے معنے

کھنی: روٹی دا چوتھاحصہ
ڈھول: محبوب۔خاوند
کُنتاں: خاونداں
تاری آں: پار ہو جاواں،کامیاب ہو جاواں

17

نی سیو! مینوں ڈھول ملے تاں جاپے
برہوں بلائے گھتی تن اندر،میں آپے ہوئی آپے
بال پن میں کھیڈ گوایا،جوبن مان بیاپے
شوہ راون دی ریت نہ جانی،اس سنجے نرتاپے
عِشق وچھوڑے دی بالی ڈھانڈی،ہر دم مینوں تاپے
ہکس کہیں ناں داد نہ وتی اِس سنجے نر ناپے
سِکن دُور نہ تھیوے دِل توں ،ویکھن نوں من تاپے
کہے حسین سہاگن سوای،جاں شوہ آپ نجاپے

اوکھے لفظاں دے معنے

برہوں:جدائی
گھتی: داخل کر لی
آپے ہوئی آپے: اپنا آپ پہچانا
بال پن: بچپن
شوہ راون دی رِیت: خاوند نوں مناون دا طریقہ
جوبن مان: حُسن سوہناپا،غرور
سنجے نرتاپے: بے فیض جوانی
ڈھانڈی:اگ
ہکس: کسے نے
سِکن: دُکھ ۔چاہ
تاپے: تپے
سنجاپے: پچھان لوے۔قبول لوے

18

مینڈے دل تینڈے نال لگی
توڑی نہیں ٹٹدی،چھوڑی نہیں چھٹدی،قلم ربّانی وگی
سائیں دے خزانے کھلے،اساں بھی جھولڑی اڈی
کچرک بالیں میں عقل دا دیوا، برہوں اندھیرڑی وگی
کوئی میری،کوئی دولی،شاہ حسین پھسڈی

اوکھے لفظاں دے معنے

قلم ربانی:خُدا دا قلم۔ خدا دا حکم جو اُس نے لکھیا ہویا ہے۔
کچرک: کدوں تیکر
اندھیرڑی: آندھی،تیز ہوا
دگی: چلی
مِیری: سب توں اگے
دولی: دوجے نمبر تے
پھسڈی: سب توں اخیر وچ رہ جاون والا۔

19

نی سیو! اسیں نیناں دے آکھے لگے
جیہناں پاک نگاہاں ہوئیاں،سے کہیں نہیں جاندے ٹھگے
کالے پٹ نہ چڑھے سفیدی،کاگ نہ تھیندے بگے
شاہ حسین شہادت پائین، جومرن مِتراں دے اگے

اوکھے لفظاں دے معنے

نیناں: اکھاں
پٹ: کپڑے
کاگ: کاں
بگے: چٹے
متراں: محبوباں

20

سجنا ! اسیں موریوں لنگھ پیاسے
بھلا ہویا گُڑ مکھیاں کھاہدا، اسیں بھن بھنا توں چھُٹیا سے
ڈھنڈ پُرانی کُتیاں لکی، اسیں سروور نہیں دھوتیا سے
کہے حسین فقیر سائیں دا ، اسیں ٹپن ٹپ نکلیا سے

اوکھے لفظاں دے معنے

سجنا: محبوب
کھاہدا: کھا لیا
چھُٹیا سے: آزاد ہوئے
ڈھنڈ پُرانی: پُرانی اگ
سرودر: تالاب
ٹپن: او تھاں جتھوں چھال مار کے لنگھنا پوے۔














Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels