Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کافیاں شاہ حسین >> کافیاں شاہ حسین 41 - 50

کافیاں شاہ حسین 41 - 50

شاہ حسین
February 4th, 2008
1 / 5 (1 Votes)

(41)

کت گُن لگیں گی شوہ نوں پیاری
اندر تیرا کوڑا وت،گیوا ای مول نہ دتی او بہاری
کتن سُکھ نی،وللئیے کُڑئیے، چڑھیا لوڑیں کھاری
تند ٹٹی، اٹیرن بھنا، چرخے دی کر کاری
کہے حُسین فقیر سائیں دا،عملاں دے باجھ خواری

اوکھے لفظاں دے معنے

کت گن: کناں خُوبیاں توں
کوڑا وت گیو ای: کوڑا کٹھا ہو گیا ہے
اوللیے: اے نادان' اے مورکھ
کتن سکھ: کتنا سکھ
کاری: بندوبست

(42)

گھم چرخڑیا! تیری کتن والی جیوے' نلیاں وٹن والی جیوے
بُڈھا ہویوں شاہ حسینا' دندیں جھیراں پیاں
اُٹھ سویرے ڈھونڈن لگوں، سنجھ دیاں جوگیاں
ہر دم نام سنبھال سائیں دا' تاں توں استھرتھیویں
چرخہ بولے،سائیں سائیں ،بائیڑ بولے تُوں
کہے فقیر سائیں دا، میں ناہیں سبھ توں

اوکھے لفظاں دے معنے

چرخڑیا: اے چرخے
جھیراں: فرق،فاصلے
سنجھ: شام
استھر: پکا ثابت قدم
بائڑ: چرخے دا اوہ دھاگا جیہڑے تکلے وچ چلدا ہے

(43)

جاں جیویں تاں ڈردا رہو وو
باندر بازی کرے بزاری' سہل نہیں اوتھے لاون یاری
وو اڑک وچھیڑا ناری' کڈھ نہ گردن سدھا ہو،وو
نینہیں سر تے ناؤں دھراون' بلدی آتش نوں ہتھ پاون
آہیں کڈھن' تے کُوک سُناون' گل نہ تینوں بندی ہووو
در میدان محبت جاتی،سہل نہیں اوتھے پاون جھاتی
جیں تے برہوں وگاوے کاتی، مڈھ کلیجے دے اندر ڈھووو
اصلی عِشق متراں دا ایہا' پہلے مار مکاون دیہا
سہل نہیں اوتھے لاون نیہا' جے لائی اوتاں کے نہ کہو'وو
تو باجھوں سبھ جھُوٹی بازی، کوڑی دنیا پھرے غمازی
نہوں حقیقت گھن مجازی، دوویں گلاں سٹ نہ بہو 'وو
کہے حسین فقیر گدائی' دم نہ مارے بے پرواہی
سو جانیں جن آپے لائی، اوہ ویکھ جانجی آئے ہو' وو

اوکھے لفظاں دے معنے

جاں جیویں: جدوں تیکر جیوندا ہے
اڑک : اخیر
کڈھ نہ گردن: گردن نوں اُچا نہ کر
غرور نہ کر۔
نینہیں : محبت کرن والے
عاشق۔دل لاون والے
ناؤں : ناں
بلدی: سڑ دی ہوئی
کاتی : تیز
دیہا: جُثہ
نیہا: دل
گھِن : حاصل کر
سو جانیں: اوہی جاندے ہین
جانجی: براتی

(44)

ڈیکھ نہ مینڈے اوگن ڈاہوں تیرا نام ستاری دا
توں سلطان سبھو کجھ سردا مالم ہے تینوں حال جِگر دا
تَیں کولوں کجھ ناہیں پردا پھول نہ عیب وچاری دا
تُوں ہی عاقل تُوں ہی دانا تو ہی میرا کر خصمانہ
جو کجھ دل میرے وچ گزرے تُوں محرم گل ساری دا
توں ہیں داتا توں ہیں بھگتا سبھ کجھ دیندا مُول نہ جھکدا
تُوں دریاؤ مہر دا ویہندا مانگن قرب بھکھاری دا
ایہو عرض حسین سناوے تیرا کیتا میں من بھاوے
دُکھ درد کجھ نیڑے نہ آوے ھر دم شکر گزاری دا

اوکھے لفظاں دے معنے

ڈیکھ: دیکھ
اوگن: گناہ
ڈاہوں: مڈھوں ہی
ستاری : پردہ پوش
مالم : پتہ ہے
خصمانہ: حفاظت کرن والا۔
جھکدا: شرماوندا
ویہندا :وگدا ہویا

(45)

جہاں ویکھو تہاں کپٹ ہے' کہوں نہ پیوے چین
دغا باز سنسار تے گوشہ پکڑ حسین
من چاہے محبوب کو' تن چاہے سُکھ چین
دوئے راجے کی سیدھ میں کیسے بنے حسین
اوکھے لفظاں دے معنے
کپٹ: دھوکہ، فریب
سنسار: زمانہ
گوشہ پکڑ: نکرے بیہہ جا۔وکھ ہو جا
دوئے راجے: دوہواں بادشاہواں
سیدھ میں :وچکار

(46)

اتن میں کیوں آئی ساں' موری تند نہ پئی آ کائے
آوندیاں اُٹھ کھیڈن لگی،چرخہ چھڈیا جائے!
کتن کارن گوہڑے آندے کیا بلیدا کھائے
ہور ناں دیاں اڑی اٹیاں نمانی اڑی کپاہ
ہورناں کتیاں پنج ست پونیاں، میں کیہہ آکھاں گی جائے
کہے حسین سچجیاں ناریں ، لیں شوہ گل لائے
اوکھے لفظاں دے معنے
آکائے : اک ہی
گوہڑے : پونیاں دا جتھا
بلیدا: بیل ۔ دان
سُچیاں : چنگے کم کرن والیاں۔ سلیقے والیاں

(47)

عشق فقیراں دا قائم دائم کبھو نہ تھیوے بہیا
نی تینوں رب نہ بھلی دُعا فقیراں دی ایہا
رب نہ بھلی ہور سبھ کجھ بھلی، رب نہ بھلن جیہا
سوناروپا' سبھ چھل ویسی' عشق نہ لگدا لیہا
ہور ناں نال ہسدی کھڈندی،شوہ نال گھونگھٹ کیہا
چارے نین گڈاوڈ ہوئے، وچ وچولا کیہا
عشق چوبارے پائیو جھاتی، ہن تینوں غم کیہا
آئے دی سونہہ بابل دی، سونہہ گل چنگریڑی ایہا
جس جوبن دا توں مان کریندی، سوجل بھل تھیسی کھیہا
کہے حسین فقیر سائیں دا ' مرنا تاں مانا کیہا

اوکھے لفظاں دے معنے

بہیا : پرانا
ایہا : ایہو ہی
چھل ویسی: فریب دے جاوے گا
گڈوڈ ہوئے: آپو وچ رل گئے
وچولا: دلال
چنگیرڑی: بوہت چنگی
مان : غرور
کھیہا: راکھ
مانا : عُذر

(48)

وو کیہہ آکڑ آکر چلنا
کھائے خوراکاں' تے پہن پوشاکاں' کیہ جم دا بکرا پلنا
ساڈھے تن ہتھ' ملک تساڈا' کیوں جُوہ پرائی ملنا
کہے حسین فقیر سائیں دا نت خاک وچ رُلنا

اوکھے لفظاں دے معنے

حجم : ملک الموت
ساڈھے تن ہتھ: ایتھے مطلب قبر
مِلک: مالکی
جُوہ پرائی: غیر دی زمین

(49)

چارے پلو چولڑی نین روندی دے بھِنے
کت نہ جاناں پونیاں' دوس دینی آں مُنے
آون آون کہہ گیا مانہہ باراں پُنے
اِک ھنیری کوٹھڑی' دوجے مترو چھنے
کالے ہرنا چرگیوں شاہ حسین دے بنے
لکھن ہارا لکھ گیا کیہ ہوندا انے

اوکھے لفظاں دے معنے

چارے پلو : چویں نکراں
چولڑی : چار لڑیاں
نین : اکھیاں
بھنے: بھیگ گئے۔اشک آلُود
دوس : الزام
مُنا: چرخے دا اک حصہ
مانہہ : مہینے
پِنے: لنگھ گئے
وُچھنے : وکھ ہو گئے
مِتر : سنگی
چرگیاں : کھا کے چلا گیا ہے
لکھن ہارا: لکھن والا
رُنے : روندیاں ہوئیاں

(50)

تاریں ربا وے میں اوگن ہاری
سبھ سکھیاں گُن ونتیاں میں اوگن ہاری
بھے صاحب دے پربت ڈر دے وے میں کون وچاری
جس گل نوں شوہ بھیجیا ای وے سو میں بات وساری
رَل مِل سئیاں داج رنگایا پیاری میں رہی کواری
کہے حسین سہیلیو عملاں باہجھ خواری
اوکھے لفظاں دے معنے
تاریں :پار کر دینا،اپڑا دینا
کن ونتیاں : خوبیاں والیاں
بھَے : ڈر۔خوف
صاحب: اک خدا
پربت: پہاڑ
میں کون وچاری: میری کیہ حیثیت ہے؟
وساری : بھلا دتی ہے
باہجھ: بنائ
خواری : ذلت
کواری: بناء ویاہ دے یعنی کوئی عمل نہ کیتا۔










Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels