Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کافیاں شاہ حسین >> کافیاں شاہ حسین 51- 60

کافیاں شاہ حسین 51- 60

شاہ حسین
February 4th, 2008
5 / 5 (2 Votes)

(51)

جو بن گیا تاں گھولیا ربّا! تیری مہر نہ جاوے
آیا ساون من پرچاون' سیاں کھیڈن سانویں
نیں بھی ڈونگھی' تلا پُرانا مولا پار لنگھاوے
اکناں وٹیاں پونیاں، اک سُوت اناوے
اک کُنتاں باہجھ وچاریاں اکناں ڈھول کلاوے
کہے حسین فقیر نمانا جھُوٹے نبھدے نی دعوے

اوکھے لفظاں دے معنے

گھولیا: قربان کیتا
سانویں : ساون دے کھیڈ' جیہڑیاں کڑیاں کھیڈ دیاں ہین۔
نیں : ندی
تُلا: بیڑی
کُنتاں: خصماں، مالکاں
ڈھول: محبوب
کلاوے: جپھی وچ

(52)

تجھے گور بلاوے' گھر آؤرے
جو جاوے سو رہن نہ پاوے،کیا میر' ملک امراؤ رے
ہر دم نام سنبھال سائیں دا' ایہہ اوسر ایہہ داؤ رے
کہے حسین فقیر نمانا آخر خاک سماؤرے

اوکھے لفظاں دے معنے

امراؤ : امیر
اوسر: آسرا

(53)

ایتھے رہنا ناہیں' کوئی بات چلن دی کروو
وڈے اُچے محل اساریو گور نمانی تیرا گھر وو
جس دیہی داتوں مان کرینایں' جیوں پرچھاویں ڈھروو
چھوڑ تر کھائی' پکڑ حلیمی' بھے صاحب تھیں ڈر وو
کہے حسین حیاتی لوڑیں' تاں مرن تھیں اگے مروو

اوکھے لفظاں دے معنے

محل: وڈے وڈے مکان
اساریو: بنائے
دیہی : جُثہ
ترکھائی : تیزی
بھے صاحب : خدا دے خوف

(54)

جگ میں جیون تھوڑا' کون کرے جنجال
کیندے گھوڑے' ہستی،مندر کیندا ہے دھن مال
کہاں گئے ملا' کہاں گئے قاضی' کہاں گئے کٹک ہزاراں
ایہہ دنیادن دوئے پیارے' ہر دم نام سمال
کہے حسین فقیر سائیں دا جھوٹا سبھ بیوپار

اوکھے لفظاں دے معنے

جنجال: مصیبت
کیندے : کس دے
ہستی: ہاتھی
کٹک: لشکر۔فوج
سمال : ذکر کر۔وِرد کر

(55)

بال پن کھیڈ لے نی! تیرا اج کہ کل مکلاوا
کھنیوڑا کھدندیے کُڑئیے، کن سوئنے دا والا
ساہورڑے گھرا لبت جانا' پئیے کوڑا دعوے
ساون ماہ سر نگڑا آیا' دسن سانویں تلے
کہے حسین فقیر سائیں دا اَج آے کَل چلے

اوکھے لفظاں دے معنے

بال پن: بچپن
کھنیوڑا: کھِدو
کھدندئیے: کھیڈ دی ہوئی کُڑی
سوئنے : سونے
البت: ضرور۔ آخر
پیئے: پیو دے گھر۔پیکے
سرنگڑا: رنگیلا۔

(56)

ربّا وے میں نال چھپائی، توں بخشن ہارا سائیں
ہتھیں میرے مندری،کم میں کیوں کر کریں
پیریں میرے لال جُتی' میں تانا کیوں کر تنیں
چُلہے پِچھے، پنج کسیرے، مال کیوں کر بھریں
اندر بولن مرغیاں تے باھر بولن مور !
کہے حسین فقیر سائیں دا تانی نوں لے گئے چور
زورا زور

اوکھے لفظاں دے معنے

چھپائی: چھپا لینا
مُندری : انگوٹھی
زورا زور: زوریں

(57)

باجھوں سجن' مینوں ہور نہیں سُجھدا
تن تندور آہیں دے لنبو،سیج چڑھیدا مینڈا تن من پُجھدا
تن دیاں تن جانیں، من دیاں جانیں محرمی ہوئے' سو دل دیاں بُجھدا
کہے حسین فقیر سائیں دا' لوک بخیلا پچ پچ لجھدا

اوکھے لفظاں دے معنے

سمجھدا: چنگا لگنا
لنبؤ: چنگیاڑے
پُجھدا: سڑ دا
بُجھدا: پتہ کر لیندا ہے۔
لوک بخیلا: کنجوس بندہ
لجھدا: نموشی آوندی ہے۔

(58)

عملاں دے اُپر ہوگ نبیڑا،کیا صوفی کیا بھنگی
جورب بھاوے سو ای تھیسی،سائی بات ہے چنگی
آپے ایک' نیک کہاوے' صاحب ہے بہہ رنگی
کہے حسین سہاگن سائی' جو شوہ کے رنگ رنگی

اوکھے لفظاں دے معنے

ہوگ : ہووے گا
نبیڑا : فیصلہ
صوفی: اللہ والا
بھنگی: مہتر۔ چوہڑا
سو ای تھیسی: اوہی ہووے گا
سائی : ایہو
ایک انیک : وحدہٰ لا شریک
بہہ : کئی
سُہاگن : خاوند والی
سائی: اوہی ہے

(59)

دنیا طالب مطلب دی وو! سچ سُن وو فقیرا
مطبل آوے' مطبل جاوے' مطبل پوجے گور پیرا
مطبل پہناوے' مطبل کھلاوے' مطبل پلاوے نیرا
کہے حسین جن مطبل چھوڈیا' سو میرن سر میرا

اوکھے لفظاں دے معنے

دنیا طالب مطلب دی : خود غرض دنیا
مطبل: مطلب
گور پیرا: گورو تے پیر
نِیرا: پانی
چھوڈیا: چھڈ دتا
میرن : سردار

(60)

کیہڑے دیسوں آئیوں نی کڑئیے
تیں کیہا کیہا شور مچائیو کیوں ؟
اپنا سوت ' تیں آپ ونجایا،دوس جلا ہے نوں لائیو کیوں؟
تیرے اگے اگے چرخہ پچھے پچھے پیڑا، کتنی ہیں حال بھلیرے کیوں؟
چھلڑیاں پنج' پائے پروٹے' جائے بزار کھلوویں کیوں ؟
نال صرافاں جھیڑا تیرا،لیکھا دیندی توں روویں کیوں ؟
سیاں نال کھڈیندیے کڑیے،شوہ منوں بھلائیو کیوں ؟
راہاں دے وِچ اوکھی ہوسیں' اِتنا بھارا ٹھائیو کیوں ؟
کہے حسین فقیر نمانا، مرنا چِت نہ آئیو کیوں؟

اوکھے لفظاں دے معنے

کیہڑے: کِس
تیں : توں
کیہا کیہا: کیویں کیویں دا
ونجایا: ضائع کیتا
دوس: الزام
بھلیرے : بھل گئی
چھلڑیاں: حقیر روپے
پروٹے : گُتھلی ۔تھیلی
لیکھا: حساب
چِت: دل دھیان









Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels