Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کافیاں شاہ حسین >> کافیاں شاہ حسین 71-80

کافیاں شاہ حسین 71-80

شاہ حسین
February 4th, 2008

(71)

دنیا جیون چار دیہاڑے' کون کسے نال رُسے
جیں ول ونجاں' موت تنے ول' جیون کوئی نہ دسے
سر پرلدنا ایس جہانوں' رہنا تاں ناہی کے
کہے حسین فقیر سائیں دا' موت وٹیندڑی رسے

اوکھے لفظاں دے معنے

جیون: زندگی
جیں ول: جیس ول
ونجاں: جاواں
تنے ول: اُس پاسے
لدنا: چل جانا
وٹیندڑی رسّے: رسے بنا رہی ہے۔

(72)

میں بھی جھُوک رانجھن دی جاناں' نال میرے کوئی چلے
پیراں پوندی' منتاں کردی' جاناں تاں پیا اکلے !
نیں بھی ڈونگھی 'تلا پرانا شینہاں تاں پتن مَلّے
جے کوئی خبر مِتراں دی لیاوے' ہتھ دے دینی آں چھلے
راتیں درد' وینہاں در ماندی' گھاؤ مِتراں دے الھّے
رانجھن یار' طبیب سنیدا' میں تن درد اولےّ
کہے حسین فقیر نمانا' سائیں سنیہوڑے گھلّے

اوکھے لفظاں دے معنے

جھوک : ٹھکانا ۔جھگی
پیرا پوندی: پیراں وچ ڈگ دی۔
نیں : ندی
تلا : بیڑی
شینہاں : شیراں
پتن: دریا دے اوہ کنڈے جتھوں کشتی چلدی ہے تے دریا پار کرکے جتھے اپڑ دی ہے۔
مِتراں: سنگیاں
الھّے: کچے
اولّے: پُٹھے کم۔
سنیہوڑے: سُنیہا

(73)

نی مائے مینوں کھیڑیاں دی گل نہ آکھ
رانجھن میرا، میں رانجھے دی، کھیڑیاں نوں کُوڑی جھاک
لوک جانیں ھِیرکملی ہوئی، ہیرے دا ور چاک
کہے حسین فقیر سائیں دا' جان دا مولیٰ پاک

اوکھے لفظاں دے معنے

کوڑی جھاگ: بیکار اُڈیک۔ہرکھ
چاک: نوکر

(74)

بندے' آپ نوں پچھان
جے تیں اپنا آپ پچھاتا' سائیں دا مِلن اسان
سوئنے دے کوٹ' روپہری چھجے ہر بن جان مان
تیرے سِر تے جم سازش کردا' بھانویں توں جان نہ جان
ساڈھے تِن ہتھ' مِلکھ تساڈا' ایڈی توں تان نہ تان
سوئنا روپا تے مال خزینہ،ہوئے رہیا مہمان
کہے حسین فقیر نمانا' چھڈ دے خودی تے گمان

اوکھے لفظاں دے معنے

جے تیں: جے توں
سوئنے: سون
کوٹ: قلعے
روپہری: روپہلی چاندی دے۔
مسان: مر گھٹ۔جتھے ہندو اپنے مردے ساڑ دے ہین۔
مِلکھ: مالکی

(75)

سارا جگ جان دا' سائیں تیرے مِلن دی آس وو!
میری مراد ایہو سائیاں' سدا رہاں تیرے پاس وو
درشن دے دیا کر ،موکوں،سمراں میں' ساس گراس وو
کہے حسین فقیر نمانا' توں صاحب' میں داس وو

اوکھے لفظاں دے معنے

موکوں: مینوں
سمراں: وار وار تیرا ہی ناں لواں
ساس: ساہ
گراس: بُرکی
داس: غلام

(76)

لِکھی لوح قلم دی قادر نے' مائے موڑ جے سکنی ایں موڑ
ڈولی پائے لے چلے کھیڑے' نہ میتھوں عُذر نہ زور
رانجھن سانوں کُنڈیاں پائیاں،دل وچ لگیاں زور
مچھی وانگوں میں پئی تڑفاں' قادر دے ہتھ ڈور

اوکھے لفظاں دے معنے

قادر: قدرت والا
میتھوں: مینوں

(77)

کیوں گمان جندونی! آخر ماٹی سیوں رل جانا
ماٹی سیوں رل جانا' تے تاں سر پر دنیا جانا!
مِیر' ملک'پاتشاہ،شہزادے چوا چندن لاندے
خوشیاں وچ رہن متوالے،ننگیں پیریں جاندے
لا اُبالی درگاہ صاحب دی' کہیں نہ چل دا مانا!
آپو آپ جواب پچھیسی' کہے حسین فقیر نمانا

اوکھے لفظاں دے معنے

جندونی: اے جان!
ماٹی سیوں: مٹی وچ
پاتشاہ: بادشاہ
چندن: اک خشبو والے درخت دی لکڑی
دا بُورا جیہڑا مردے دے جسم تے
ملدے ہین۔
پچھیسی: پچھے گا۔

(78)

گوئلڑا دِن چار کُڑے! سّیاں کھیڈن آئیاں نی
بھولی ماؤ نہ کھیڈن دئییں' ہنجو در در وائیاں نی
چند کے چاندن' سیاں کھیڈن' غافل تمر رہائیاں نی
ساہوڑے گھر البت جانا' جانن سبھے بھرائیاں نی
کہے حسین فقیر نمانا جنہاں جائیاں سو توڑ نبھائیاں نی

اوکھے لفظاں دے معنے

گوئلڑا : زندگی۔واسا۔ چواں دناں دی زندگی
سیاں: سہیلیاں
ہنجو: اتھرو
چند کے چندن: چن دی چاننی
تمر: ہنھیرا
رہائیاں: رہیاں ہین۔
البت : ضرور
سبھرائیاں: سہاگناں
توڑ نبھائیاں : اخیر تیکر نبھایا

(79)

گھر سوہن سیاں اتیڑیاں
ہوڑیاں ہٹکیاں' رہن نہ مُولےٰ ڈونگھے چکر لُٹیڑیاں
کائیاں بھُکھیاں' کائی تہائی،کائے چگندیاں کائے نندرائی
کئیاں سکھیاں دند مچائی، پنجاں بیڑی ویہن لڑھائی
سبھ گھردیاں' منجھ بھتیڑیاں
پنجے سکھیاں،اِکو جیہیاں، حُکم سنجوگ اکٹھیاں ہوئیاں !
جو پنجاں نوں دھاگا پائے،سو سبھرائی کنت رجھائے
کہے حسین بے شرمی سئیاں' آئے پون اچیتڑیاں

اوکھے لفظاں دے معنے

سوہن: چنگیاں لگیاں
اتیڑیاں: اینیاں
لیڑیاں: لبڑی ہوئی
ہوڑیاں ہُٹکیاں: روک لاون توں مگروں
کائیاں: کئی
تہائی: پیاسی
جگندیاں: جاگ رہیاں ہین۔
نندرائی: ستی ہوئی
دند: رولا
ویہن لڑھائی: ہڑھ وچ روڑھ دتی
منجھ: ویہڑے دی۔
بھیتڑیاں: جانوں ہین۔
سنجوگ: قسمت نصیب
دھاگا پائے: قابو کرے
سبھرائی: سہاگن ۔دُلہن
کُنت: خصم
رجھائے: خش کرے
اچیتڑیاں: اچن چیتی

(80)

راتیں سوویں' دینہیں پھر دی توں وتیں
تیرا کھیڈن نال پیار جندو کدی اُٹھ رام سمار جندو
ساہورڑے گھر البت جانا پیورڑے دِن چار جندو
اَج تیرے مکلاروآئے رہیے نہ کوئی پجار جندو
کہے حسین فقیر سائیں دا آون ایہی وار جندو

اوکھے لفظاں دے معنے

رام سمار:اللہ دا ناں لے
پیورڑے:پیو دے گھر ۔پیکے
مکلارو: مکلاوہ کھڑن والے
پچار: بہانہ
ایہی وار: اک ہی ویلا



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels