Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کافیاں شاہ حسین >> کافیاں شاہ حسین 81 - 90

کافیاں شاہ حسین 81 - 90

شاہ حسین
February 4th, 2008

(81)

اک عرض نمانیاں دی سُن جندنی
سرت داتانا' نرت دا بانا' ہر ہر پٹیاون حندنی
کاہے جھُوریں تے جھکھ ماریں' رام بھجن بن بازی ہاریں
بیجیا اِی سولن جِندنی
کاہے گبھریں' ویکھ جوانی' تیں جیہناں کئیاں خان خوانی
کال لئیاں سبھ چن جندنی
کہے حسین فقیر گدائی' پچھی پونی چرخہ دے لٹائی
شوہ نوں ملنی ہیں ہُن جندنی

اوکھے لفظاں دے معنے

نمانیاں : عاجزاں
سُرت: عقل ۔ہوش
ون :آن
بانا: لباس
جھُوریں: ہرکھیاں
جھکھ ماریں: بے ہودہ بکواس کرن۔
رام بھجن: اللہ دا ناں لینا۔
بیجیا اِی: جیہڑا توں بیجیا ہے۔
سولن: اوہی وڈھے گی۔
گبھریں: آکڑن گئیاں
کال : موت

(82)

کدی سمجھ ندانا' مرجانا اِی
کوڑی سیج سویں دن راتیں' کوڑا طول وہانا اِی
ہڈاں دا کلبوت بنایا' وچ رکھیا بھور ربانا اِی
چار دیہاڑے کوئل واسا' لد چلیولبانا اِی
کہے حسین فقیر مولیٰ دا، سائیں دا راہ نمانا اِی

اوکھے لفظاں دے معنے

ندانا: اے مورکھ بندے
طُول وہانا ای: لمی عمر لنگھاونی ہے
بھور ربانا: مراد روح۔
لبانا: اک قوم۔ ٹپری واس
نمانا: کلا

(83)

سُن توں نی! کال مریندا اِی' ہر بھج لے گاہک ویندا ای
ڈونگھے جل وچ مچھلی وسدی' بھے صاحب دامن نہیں رکھدی
اوس مچھی نوں جال ڈھونڈیندا ای
میر ' ملک' پاتشاہ' شہزادے ' جھلدے نیزے وجدے واجے
اک گھڑی فنا کریندا ای
کوٹھے ممٹ' تے چوبارے' وس وس گئے کی لوک وچارے
اک پلک رہن نہ دیندا ای
چڑی جندڑی' کال سچانا' نس دن لائے بیٹھا ہے دھیانا
کہے حسین فقیر نمانا' دنیا چھوڑ آخر مر جانا
نر کوڑا مان کریندا ای

اوکھے لفظاں دے معنے

کال: موت
ہر بھج لے: اللہ دا ناں لے۔
ویندا ای: جا رہیا ہے
بھے : خوف۔ ڈر
صاحب: مالک خدا
من: دل
ممٹ: ممٹی چوبارہ۔
ڈھونڈیندا ای: لبھدا ای
کال سچانا: موت حق ہے
نر: انسان بندہ
کوڑا مان: جھوٹا غرور۔

(84)

ہن تن دیساں تیرا تانا' مینڈی جنڈڑئیے نی
صاحبزادڑئیے نی' سر پر جانئیے نی' گھم نہ آونیے نی
تن دیساں تیرا تانا
کتدیاں کتدیاں عُمر وہائی نکلیا سُوت پرانا
کھڈی دے وچ جلاہی پھاتی' نلیاں دا وکھت وہانا
تانے پٹیے اکو سوتر' دوتیاں بھاؤ نہ جانا
چوسی' پینی چھڈ کراہی ہنراریں رَچھ پچھانا
تانا آندا' بانا آندا' آندا چرخہ پُرانا
آکھن دی حاجت ناہیں' جو جانیں سو جاناں
دھرن آکاش وچ وتھ چپے دی' تہاں شہاں دا ٹھانا
سبھ ویسے شیشے دا مندر وچ حسین نمانا

اوکھے لفظاں دے معنے

صاحبزادڑیے: اے صاحبزادی!
گھم: پرت کے
پھاتی: پھس گئے
وکھت: ویلا۔مصیبت
دُوتیاں: ویریاں نے
آکاش: زمین اسمان
وِتھ: فاصلہ۔فرق
تہاں: ایسے تھاں
ٹھانا: رہن دی تھاں

(85)

گل وو کیتی ساڈے خیال پئی'گل پئی وونباہی لوڑئیے
شمع دے پروانے وانگوں جلدیاں انگ نہ موڑئیے
ہاتھی عشق،مہاوت رانجھا،انکس دے دے ہوڑئیے
کہے حسین فقیر سائیں دا لگڑی پریت نہ توڑئیے

اوکھے لفظاں دے معنے
نباہی لوڑیے: پورا کرو
جلدیاں: سڑدیاں ہوئیاں
لگڑی رِیت: لگی ہوئی محبت

(86)

ایہہ نس دس رہی دل میرے، صورت یار پیارے دی
باغ تیرا، باغیچہ تیرا، میں بُلبل باغ تہارے دی
اپنے شوہ نوں آپ رِجھاواں، حاجت نہیں پسارے دی
کہے حسین فقیر نمانا، تھیواں خاک دوارے دی

اوکھے لفظاں دے معنے

نس: ہمیش
دس رہی: آباد ہو گئی۔
رجھاواں: خش کراں
دوارے: بوہے تے

(87)
کیا کرسی باب نمانی دا
نہ اساں کتیا نہ اساں تُنبیا، بخرہ کیہا تانی دا
جمدیاں تل روون لگے' یاد پیو دن گھانی دا
گور نمانی وچ پوندیاں کہیاں ہو ہوائیں تیریاں ایتھے رہیاں
واس آیا وِچ وانی دا
کہے حسین فقیر مولا دا، آکھے سخن حقانی دا

اوکھے لفظاں دے معنے

باب: حالت۔فیصلہ
بخرہ: حصہ۔
تِل : اک زمینی پیداوار جس نوں کولُھو وچ پیل کے تیل کڈیا جاندا ہے۔
گھانی: تلاں دی اک اُچیچی وڈی مقدار جیہڑی تیل کڈن لئی کولُھو وچ پائی جاندی ہے۔
یاد پیو: یاد آیا
ہو ہوائیں: بڑائیاں
داس: آباد ہونا۔
وانی: اُجاڑ
حقانی:سچا

(88)

چوہڑی آں دربار دی
دھیان وی چھجلی،گیان دا جھاڑو، کام کرودھ نت جھاڑ دی
قاضی جانیں، سانوں حاکم جانیں، ساتھے فارغ خطی وگار دی
کل جانے، ارمہتہ جانیں، میں ٹہل کراں سرکار دی
کہے حسین فقیر نمانا، طلب تیرے دربار دی

اوکھے لفظاں دے معنے

چھجلی: نکا چھج
کام کرودھ: حرص۔ ہوا۔ لالچ
فارغ خطی: وکھیواں
کل: سب
مہتہ: عہدیدار پٹواری۔
ٹہل : سیوا۔

(89)

آؤ کُڑے گل جھُومر پاؤنی، آؤ کڑے رل رام دھیاؤ نی
مان لے گلیاں بابل والیاں، وت نہ کھیڈن دیسن،ماؤنی
ساڈا جیو ملن نوں کردا، سنجالوک بخیلی کردا' سانوں ملن دا پہلڑا چاؤنی
سئیاں وسن رنگ محلیں' چاؤ جیہناں دے کھیڈن چلی
ہتھ اٹیرن ' رہ گئی چھلی' در مکلارو بیٹھے آؤنی
اُچے پپل پینگھاں پیاں' سبھ سئیاں مل جھوٹن گئیاں' آپو اپنی گئی لنگھاؤنی
کہے حسین فقیر نمانا' دنیا چھوڑ آخر مر جانا' کدی تاں اندر جھاتی پاؤنی

اوکھے لفظاں دے معنے

گل: گلا
جھومر: اک ٹونبھ۔اک ناچ
رام دھیاؤنی: اللہ نوں چیتے کرو۔
مان لے: عیش کر لے۔
سنجا لوک: بے مہر لوک۔ محبت توں ویہلے لوک
پہلڑا: پہلا
چاؤ: خواہش۔
لنگھاؤ: گزار
کدی تاں: کدی تے

(90)

دِن چار، چوگان میں کھیل،کھڑی ویکھاں' کون جتے بازی' کون ہارے
گھوڑا کون کا چاک چالاک چالے' ویکھاں ہاتھ ہمت کر کون ڈارے
اس جیوپر بازیاں آن پڑیں، ویکھاں گوئے میدان میں کون ہارے
ہائے ہائے جہان پکارتا ہے، سمجھ بازی شاہ حسین پیارے

اوکھے لفظاں دے معنے

چوگان: پولو دا کھیڈ
گوئے: گیند۔جیس نال گھوڑ سوار کھیڈ دے ہین۔
چاک چالاک: تیز رفتار تے ہشیار
چالے: رفتار
ڈارے: ڈالے




Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels