Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کافیاں شاہ حسین >> کافیاں شاہ حسین 101-110

کافیاں شاہ حسین 101-110

شاہ حسین
February 4th, 2008



101

میاں گل سُنی نہ جاندی سچی!
سچی گل سنیوے کیونکر' کچی ہڈاں وِچ رچی
سچی گل سنی تناہاں' چننگ جیہناں تن مچی
پرد اساڑ دتیونیں پریتم' دوت موئے سبھ پچی
زہری ناگ پھرن وچ گلیئیں' جیہڑی شوہ لڑ لگی بچی
کہے حسین سہاگن سائی' جو گل تھیں واندی نچی

اوکھے لفظاں دے معنے

تناہاں : اوہناں نے۔
چننگ : چنگیاری۔
مچی : اگ لگ گئی
پڑدہ: پردہ
ساڑ دتیو: ساڑ دتا
پریتم: محبوب
دوت : حسد کرن والا
گلیئیں: گلیاں وچ
سائی : اوہی
گِل: مٹی
واندی: وکھ ہو کے۔

102

مائے نی کیہنوں آکھاں ' درد وچھوڑے دا حال
دُھواں دُھکھے میرے مرشد والا' جاں پھولاں تاں لال
سُولاں مار دیوانی کیتی' برہوں پیا ساڈے خیال
دُکھاں دی روٹی،سُولاں دا سالن' آہیں دا بالن بال
جنگل بیلے پھرے ڈھونڈیندی اجے نہ پائیو لال
رانجھن رانجھن پھراں ڈھونڈیندی' رانجھن میرے نال
کہے حسین فقیر نمانا' شوہ ملے تاں تھیواں نہال !

اوکھے لفظاں دے معنے

سُولاں : کنڈے
تھیواں نہال: خش ہو جاواں

103
مائے نی میں بھئی دیوانی' ویکھ جگت میں شور
اِکناں ڈولی' اکناں گھوڑی' اک سوے ' اک گور
ننگے پیریں جانڈرے ڈٹھے' جن کے لاکھ کروڑ
اک شاہ' اک دالدری' اِک سادھو' اک چور
کہے حسین فقیر نمانا' بھلے اساتھوں ڈھور

اوکھے لفظاں دے معنے

جگت: دنیا
سوے : شمشان۔ مرگھٹ
گور: قبر
ڈھور : ڈنگر

104

ساجن تمرے روسڑے موہے آدر کرے نہ کوئے
دُر دُر کرن سہیلیاں، میں ترتر تاکوں تو ہے

اوکھے لفظاں دے معنے

تُمرے: تیرے
ساجن: محبوب
روسڑے: رُسنا۔
موہے : میری۔
آدر : عزت
دُر دُر : دور ہو۔ جھڑکنا
ترتر: لگاتار۔ متواتر

105

ساجن رٹھڑا جاندا وے' میں بھلی آں وے لوکا
ساجن مینڈا' وے میں ساجن دی کارن میں جلی آں وے لوکا
جے کوئی ساجن آن ملاوے' بندی تس دی آں ملی آں وے لوکا
کہے حسین فقیر سائیں دا' ملے تاں میں پھلی آں وے لوکا

اوکھے لفظاں دے معنے

رُٹھرا: رُسیا ہویا
کارن : واسطے۔ لئی
لوکا : وے لوکو!
تس دی آں: تیری ہاں
ملی آں: مل گئی ہاں۔
پھلی آں : مراد پوری ہوئی ہے۔

106

بُریاں ' بُریاں' بُریاں وے اسیں بُریاں وے لوکا
بُریاں کول نہ بہووے
تِیراں تے تلواراں کولوں ' تکھیاں برہوں دیاں چھریاں وے لوکا
لد سجن پردیس سدھائے، اسیں ودیاع کر کے مڑیاں وے لوکا
جے توں تخت ہزارے دا سائیں' اسیں سیالاں دیاں کڑیاں وے لوکا
سانجھ پات کاہوں سوں ناہیں' ساجن کھوجن اسیں ٹریاں وے لوکا
جیہناں سائیں دا ناؤں نہ لِتا' اوڑک نوں اوہ جھریاں وے لوکا
اساں اوگن ہاریاں جیہے' کیہے حسین فقیر سائیں دا
صاحب سیوں اسیں جڑیاں وے لوکا

اوکھے لفظاں دے معنے

سانجھ پات : شام سویرے
کاہوں: خیال ۔دھیان
کھوجن: لبھن لئی
جھُریاں: ہرکھیاں

107

جس نگری ٹھاکر جس ناہیں سو کاکر کوکر نگری ہے
اگر چندن کی سار نہ جانیں' پاتھر سیتی گھستی ہے
چھیلاں سیتی گھونگھٹ کاڈھے' بیلاں سیتی ہنستی ہے
کہے حسین فقیر سائیں دا' سوا سیر کی مستی ہے

اوکھے لفظاں دے معنے
نگری: وستی
ٹھاکر: رب دا ذکر
کاکر: کراں۔
سار : پرکھ ۔ حقیقت۔
پاتھر: پتھر
چھیلاں: بانکے۔ گبھرو
108
نمانیاں دی ربا ربا ہوئی
بھٹھ پئی تیری چٹی چادر' چنگی فقیراں دی لوئی
درگاہ وچ سہاگن سو ای' جو کھل کھل نچ کھلوئی
کہے حسین فقیر سائیں دا تاں درلیسیں ڈھوئی

اوکھے لفظاں دے معنے

بھٹھ پئی : چولھے وچ گئی۔
در لیسیں ڈھوئی: پھیر تینوں محبوب مل جاوے گا۔

109

اوتھے ہور نہ کائے قبول میاں' گل نیہوں دی
اک لائے بھبھوت' بہن لائے تاڑی' اک ننگے پھر دے وَچ اُجاڑیں
کوئی درد نہ چھاتی تینہہ دی
اَک راتیں جاگن ذکر کریندے' اک سردے پھر دے بھُکھ مریندے
جائے نہیں اوتھے کینہہ دی
اک پڑھدے نی حرف قرآناں' اک مسئلے کر دے نال زباناں
ایہہ گل نہ ہاسی ہینہہ دی
کامل دے دروازے جاویں' خیر مینوں دا منگ لیاویں
تاں خبر پوی تس تھینہ دی
کہے حسین فقیر گدائی' لکھاں دی گل ایہا آہی
طلب نینہی نوں نینہہ دی

اوکھے لفظاں دے معنے

کائے : کوئی
نیہوں: محبت۔ دل
بھبھوت: سواہ
لائے تاڑی: نظر جما کے۔
چھاتی: سینے
تینہہ : اوہناں دے
ہاسی: ٹھٹھے۔ مخول
تھینہہ: تھاں
تینہی : عاشق
تینہہ: عشق

110

چور کرن نت چوریاں !
عملی نوں عملاں دی گھوڑیاں' کامی نوں چنتا کام دی
اساں طلب سائیں دے نام دی
پاتشاہاں نوں پاتشاہیاں' شاہاں نوں اُگراہیاں
مہر نوں پنڈ گراؤں دی
اِک بازی پائیاں سائیاں' اِک اچرج کھیل نباہیاں
سبھ کھیڈ کھیڈ گھر آوندی
لوک کرن لڑائیاں،شرم رکھیں توں سائیاں
سبھ مَر مَر خاک سماوندی
اک شاہ حسین فقیر ہے' تسیں نہ آکھو کوئی پیر ہے
اساں کُوڑی گل نہ بھاوندی
اوکھے لفظاں دے معنے
عملی: نشہ کرن والے
کامی : شہوت پرست
چنتا: خواہش
شاہاں: ساہو کاراں
اگراہیاں: قرضے دی وصولی
اچرج : انوکھا۔وکھرا
بھاوندی: پسند آئی ہے



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels