Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کافیاں شاہ حسین >> کافیاں شاہ حسین 141-152

کافیاں شاہ حسین 141-152

شاہ حسین
February 3rd, 2008



141

وت نہ دنیا آون
سدا نہ پھُلے توریا' سدا نہ لگے ساون
ایہہ جوبن تیرا چار دیہاڑے' کاہے کو جھُوٹھ کماون
پیوکڑے دن چار دیہاڑے' البت ساہورڑے جاون
شاہ حسین فقیر سائیں دا' جنگل جائے سماون

اوکھے لفظاں دے معنے

پیوکڑے: پیکے
البت: اخیر
ساہورڑے : سوہرے۔اگلے جہان
جائے سماون: دفن ہوون دی تھاں

142

روندا مُول نہ سوندا ای
جِس تن درداں دی آہ' سو ای تن روندا اِی
کنیاری دے سیجے اُپر' سُکھیا کوئی نہ سوندا اِی
چارے پلے میرے چکڑ بوڈے' کیہڑا مل مل دھوندا اِی
درداں دا دارو تیرے اندر' دسدا کوئی سنت طبیب بلواندا اِی
کہے حسین فقیر ربانا' جو لکھیا سو ای ہوندا اِی

اوکھے لفظاں دے معنے

کنیاری : کنڈیاں
سُکھیا: آرام والی زندگی بیتاون والا
چکڑ بوڑے: چکڑ نال لتھ پتھ
دارُو : علاج
سنت : درویش
طبیب: حکیم
بلوندا: سد دا

143

حسینوں کِس باغے دی مولی
باغاں دے وِچ چنبا مروا' میں بھی وچ گندھولی
کوڑی دنیا' کوڑا مانا' بھلی دنیا پھر دی بھولی
چھوڑ تکبر' پکڑ حلیمی' شاہ حسین پائے سمجولی

اوکھے لفظاں دے معنے

گندھولی : خراب بوٹی
مانا : غرور۔ آکڑ
سمجھولی : عقل دی گل

144

یا د لبر ' یاسِر 'کر پیاریا
جے توں نہیں مشتاق یگانہ' سر دیون دا چھوڑ بہانا
دے دے لعل لباں دے لارے' سُولی اپر چڑھ لے ہلارے
جیہناںسچ تیہناں لب نہیں' پیارے سچو سچ پھر ساچ تہارے
شاہ حسین جیہناں سچ پچھاتا' کامل عِشق تیہناں دا جاتا
آئے ملیا تیہناں پیارا

اوکھے لفظاں دے معنے

یا دلبر یاسر: یا محبوب نوں پسند کرے یا اپنے سرنوں۔
لعل لباں : لال بُلھاں
لارے : جھوٹی تسلی
تیہناں لب نہیں : اوہ چُپ ہین،
ساچ : سچ
تہارے : تینڈے
سچ پچھاتا : حقیقت نوں پچھان لیا۔
جاتا : پتہ لگیا۔

145

آپ نوں پچھان بندے !
جے تُدھ اپنا آپ پچھاتا' صاحب نوں ملن آسان بندے
اُچی ماڑی سوئینے دی سیجا، ہر بن جان مسان بندے
ایتھے رہن کے داناہیں' کاہے کوں تانے تان بندے
کہے حسین فقیر ربانا' فانی سبھ جہان بندے

اوکھے لفظاں دے معنے

تُدھ : توں
اُچی ماڑی : اُچی عمارت
مسان: فنا
تانے تان: غرور کرے

146

ٹک بُوجھ سمجھ دل کون ہے' من کا وسیلہ پون ہے
بندا بنایا جاپ کوں' توں کیا لبھاویں پاپ کوں
من اورہے مُکھ اورہے' دینات اواگون ہے
شاہوحسین فقیر ہے' جگ چلتا ویکھ وہیر ہے

اوکھے لفظاں دے معنے

جاپ کوں : عبادت لئی
لبھاویں : لبھن
من اور ہے مُکھ اور ہے: دل وچ کجھ ہور ہے تے مونہہ وچ ایس توں وکھ ہے۔قرآن دے نیڑے منافقت ہے۔ دل تے زبان دی موافقت اک چنگے انسان دی خوبی ہے۔اقبال آکھدے ہین۔
ہزار خوف ہو' لیکن زباں ہو دل کی رفیق
یہی رہا ہے ازل سے قلندروں کا طریق
ادا گون : آونا جاونا۔ ہندوواں دا وی ایہہ نظریہ ہے کہ ہر بندہ مرن توں مگروں اک واری پھیر جم دا ہے۔انج آون جاون دا ایہہ سلسلہ اُس ویلے تیکر جاری رہندا ہے جدوں تیکر ایس دی مکتی (نجات نہیں ہوجاندی)۔
وہیر: قافلہ

147

جیتی جیتی دنیا رام جی تیرے کولوں منگدی
کُونڈا دئیں' سوٹا دئیں' کوٹھی دئیں بھنگ دی
صافی دئیں' مرچاں دئیں' بے منتی دئیں رنگ دی
پوست دئیں' باٹی دئیں' چاٹی دئیں کھنڈ دی
گیان دئیں' دھیان دئیں' مہما سادھو سنگ دی
شاہ حسین فقیر سائیں دا' ایہو دُعا ملنگ دی

اوکھے لفظاں دے معنے

بے منتی: بے منگے
مہما: ساتھ ۔ صحبت

148


متراں دی مجمانی کارن دل دا لو ہوچھانی دا
کڈ کلیجہ کیتا بیرے' سو بھی ہیں نالائق تیرے
ہور توفیق نہیں کجھ میرے' اِک کٹورا پانی دا
سیج ستی نینیں نیند نہ آوے' ظالم برہوں آن ستاوے
لِکھاں کتاب' بھیجا در تیرے' دل دا حرف پچھانی دا
راتیں درد دیہیں در ماتی' ہن نیناں دی لائی آکاتی
کدی تے موڑلے پاوو جھاتی' ویکھو حال نمانی دا
جیویں بھاویے' تیویں کرپیارا' ایہناں لگیاں دا پنتھ نیارا
راتیں دیہیں دھیان تمھارا' جیوں بھاوے ' تیوں تاری دا
تیرے کارن میں پھراں آزادی' جنگل ڈھونڈیا میں پیر پیادی
رو رو نین کرن فریادی' کیہا دوس نمانی دا
دُکھاں سُولاں رَل ایکا کیتا' نہ کوئی سوہرا' نہ کوئی پیکا
آس رہی ہُن تیری ایکا' پلا پکڑ ایانی دا
کہے حسین فقیر کراری' درد ونداں دی چال نیاری
ایہا دیدن میں تن بھاری' اگے سچ پچھانی دا

اوکھے لفظاں دے معنے

مِتراں : سنگیاں
مجمانی: پروہن گیری
لوہو: خون
بیرے : ٹوٹے
نینیں: اکھاں
برہوں : ہجر۔فراق
کتاب : چٹھیاں
دیہیں : دیہاڑ نوں
درماتی: پریشانی
کاتی : نیزہ
پاوو جھاتی: نظر پاوو۔
پنتھ: مذہب
نیارا: وکھ
لگیاں : عشق
پیر پیادی : پیدل
دوس: گناہ
آس: امید ۔آسر
ایکا : تیرا اک ہی دا
پلا : پلو
ایانی: نادان۔مورکھ۔ نکی نیانی
دردونداں : درد منداں
نیاری : وکھ
ایہا : ایہو

149

تن من اپنا پرزے کیتا' تینوں مہر نہ آئی آ میتا
سانوں ہور عذر نہ کائی' چارا کیہا نمانی دا
کہے حسین فقیر نمانا' تیں باجھوں کوئی ہور نہ جانا
توں اِی دانا'توں اِی بینا' توں اِی تان نتانی دا

اوکھے لفظاں دے معنے

میتا: اے سنگی!
تیں باجھوں : تیرے بنائ
تان : مان
نتانی : عاجز

150

سبھ وَل چھاڈ کے توں اِکے ول ہوئے
وَل وَل دے وچ کئی وَل پیندے' اک دن دیسیں روئے
اوکھی گھاٹی ' بکھڑا پینڈا ' ہُن ہی سمجھ کھلوئے
چھوڑ تکبر' پکڑ حلیمی' پوی کڈاہیں سوئے
کڑک نہ کپڑ شوہ دریاواں' تھیو مہانا بیڑی ڈھوئے
کہے حُسین فقیر نمانا' جو ہونی سو ہوئے

اوکھے لفظاں دے معنے

چھاڈکے : چھڈ کے
اِکے : اک ہی
ول : گنجل۔ ہیر پھیر
اوکھی: اوکھا۔
بکھڑا پینڈا: گنجل دار راہ
کڈاہیں: کدی
کڑک نہ کپڑ: رولا تے تندی نہیں۔
شوہ دریا: چڑھیا ہویا دریا
مہانا : ملاح
بیڑی : کشتی
ڈھوئے: لے جاوے۔
ہونی : تقدیر۔ قسمت

151

انی حسینو جلاہا' ناں اِس مول نوں لاہا
نہ اوہ منگیا نہ اوہ پرنایا
نہ اوس گنڈھ' نہ ساہا
نہ گھر باری' نہ مُسافر
نہ اوہ مومن' نہ اوہ کافر
جو آہا سو آہا!
اوکھے لفظاں دے معنے

منگیا : منگنی کیتی
پرنایا : ویاہ کیتا
گنڈھ: گنڈھ۔منگنی یاں ویاہ دی تاریخ متھنا۔
ساہا: مہورت۔ویاہ دا دیہاڑ
جو آہا سو آہا : جو ہویا اوہ چنگا ہویا

152

پایا نی' میں پایانی' میں اپنا پیا پایا
عرش، کُرسی،پون،پانی سبھ میں آپ سمایا
کل شی
أاََ محیط کہایا' کُنت کنزاََ آکھ سُنایا
کہے حسین ایہہ مرم اسانوں' شاہ جلال بتایا

اوکھے لفظاں دے معنے

پیا : محبوب
پون: ہوا
کُل شی
أاََ: دنیا دی ہر شے
محیط : گھیرے وچ
کنزاََ : خزانہ۔گجی دولت
مَرم : مرہم
شاہ جلال: غالباََ شاہ حسین دے مرشد ہوواں گے۔







Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels