Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> مرزا صاحباں >> مرزا صاحباں - حافظ برخوردار >> مرزا صاحباں بند 1-10

مرزا صاحباں بند 1-10

حافظ برخوردار
February 8th, 2008
5 / 5 (2 Votes)

حمد

موڑے کون کلام نوں جاں لکھی لکھن ہار
عشق گھائیے عاشقاں کر کے چشماں چار
ناوک وگن زہر دے وسر جاون سار
ہک سہکن ہک تڑپھدے لنگھ پئے ہک ہار
عاشق مثل پتنگ دے سڑینے تاوڑی مار
لگا کرم نخاس جیؤں عشقے دا بازار
برہوں ڈباسئے سوہنئے ادھکڑے وچار
سسی کتھے لٹدی جنگل وچ اجاڑ
بانئے' لیلاں ' ہیر نوں سنیں جلالی چار
دھر کے سولی عشقدی چاڑھے وارو وار
مرزے تائیں چھڈ لئیں گلیں ککھیں ساڑ
جس کھارے چڑھدی صاحباں ٹھگ کھڑی وچ بار
داج دتا مل مانیاں صاحباں دے پروار
ناوک تیراں برچھیاں تیعناں دی چھمکار
دفتر واچھے درد دے رانجھے برخوردار
قصے کردا عاشقاں گل رہے سنسار

احوال لانگی مہری
٢۔

اکدن سیر کریندیاں راوی والے دیس
اگے مہری داناں باد دی بھوندی پھرے بدیس
اوس آپناں آپ چھپا لیا کر فقراں دا ویس
باہجھوں حکم خدا دیوں اوہدی کاری کون کریس

٣۔

لانگی مہری دی زاری

مہری داناں باد دی کوکے وانگ کلنگ
لڑکا سی وچ شکم دے سکا ہویا کرنگ
رب دکھوں سکھ وکھاؤندا لا کے گوڑھے رنگ

٤۔

پیر نو شوہ دی آمد

خبراں پئیاں داناں باد نوں اک آیا خوب جوان
سخی شاہ سلیماندا لاڈلا نوشوہ سخی جوان
خبر جدھی چار کوٹ تے عالی جس دا شان
اوس چھٹا دتا عشقدا وچ زمین آسمان
اوس رنگن چاڑھی عشقدی بیٹھا کر سمیان
اوس پہلے بوڑے عشقدے رنگیا پاک رحمان
اوتھے بولن طوطے بطخاں جپن رحمن رحمن
میتھوں بھل گئیاں سبھ چالیاں مسجد رہیا قرآن
پھوکے انسے عشقدے دتی سر گردان

٥۔

مہری لانگی دی پیر دے حاضری

بھر کٹورا ددھ دا مہری نیویں ہو ٹری
خاطر نوشوہ پیر دی جاندی گھڑی گھڑی
اوہدی سکی ول قدیم دی مولا کیتی فیر ہری


٦۔
پیر نوشوہ دی دعا

مہری نوں کول بہا کے دتا عشق پو آ
فاتحہ آکھیا خیر دا دونویں دست اُٹھا
اساں منگ لیا حضور توں دتا آپ خدا
چن ماہ رمضان دا توں جھولی گھت کھڈا
اوہدے دوں نئیں وچ پاسنے دیسی دھرت کنبا
ایس مجازوں عشقدیوں جاسی جان کہا
نیلی دا اسوار ہے ریہسی وچ ہوا

٧۔

پیدائش مرزا

جس دن مرزا جمیاں اوہ دن نورو نور
اوہدی زیارت کرن فریشتے جھولی پاکھڈایا حور
والشمس والضحیٰ ہویا نور ظہور
قالو بلیٰ کر جانناں کیتا رب مشہور
اوہدیاں حاصل ہویاں نیکیاں بدیاں ہوئیاں دور
جاں ملی مبارک عاشقاں جاں گئے معراج حضور
آخری عاشق اوس نوں کیتا رب غفور

٨۔

جس دن مرزا جمیاں پہیڑی اتے بال
گلاں کرے نال عشقدے وت کرے جواب سوال
کم پوے تدنال تد دے تینوں کتھوں کڈھاں بھال
جتھے لیلاں تے مجنوں دی گزری میں اوتھے کیتی جال
شیریں تے فرہاد کول کئی لنگھائے سال
حافظ گھت جھناویں جھونپڑی کھیوے جھنگ سیال

٩۔
مرزے دا ماں نوں سوال

مائے نی سن میرئیے دس دلے دی گل
دسیں جھب مکان توں جتھوں مشکل ہوون حل
بازی باہجھوں لڑکیاں جھوٹھے رنگ محل

۱۰۔


ماں دا جواب

توں خادم نوشوہ پیر دا تیرا مڈھ قدیمی پیر
جد آہئیں اندر شکم دے اوس آن پوایا شیر
من لے سچے رب نوں روشن بدر منیر



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels