Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> مرزا صاحباں >> مرزا صاحباں - حافظ برخوردار >> مرزا صاحباں بند 11-20

مرزا صاحباں بند 11-20

حافظ برخوردار
February 8th, 2008

١١۔

مرزے دی دعا

منگن آیا منگتا ہور نہ منگاں مول
تیری پاک جناب وچ ہر دم عشق وصول
جے کدے لج رکھیں گل اپنے منگاں نام رسول
میں جیہاں لکھ عاصیاں لطفوں کر قبول

۱۲۔

تعریف حسن صاحباں

عشق وہے وچ چند لے عاشق گھت پھرن
بیڑے عشق مجاز دے اس وچ لکھ ترن
جھنگ مثال بہشت دے جتھے حوراں وار کھڈن
پینچھی جویں جو جھاڑیاں کھرے عشق پون
دھی کھیوے دی صاحباں جس تے حوراں گھنڈ کڈھن
تے پریاں پربت تسنے جٹی دا ویکھ حسن
صاحباں دا قد سروکل کونج جیؤں دوہبے واہ پون
لباں سے جام شراب دا پی عاشق مست تھون
صاحباں دے خونی نین پکھاولے بازاں وانگ تکن
اوہ پاڑن ول ول دلاں نوں بکیں رت پیون
پپنیاں تھیں ناوکاں ترگش جد لٹن
رکھ نشانے دلاں تے کہیاں وانگ ہٹن
اوہ باہجھوں کجلیؤں سرمئیوں انویں گھاہ کرن
جاں نوکاں کڈھن کجلیؤں سولی لوک چڑھن
صاحباں دے نین سندورے عشقدے ہاتھی مست پھرن
جیؤں شیشہ ویہنیں ساہمنے لاٹاں حسن مچن
اوہدا متھا بنیاں امِردا جاں پوہ پھٹی چن
اوہدے سر تے بھوچھن کا ہڈواں وچ تلیئر چوگ چگن
اوہدے ہوٹھ پاناں تھیں پتلے دند ا ناراں ون
اوہدی ٹھوڈی حلقہ میم دا پرزے ہو چلن
اوہدے گل چولی چوتار دی جویں جھالر بند کرن
اوہدی چھاتی تختہ سیم دا جتھے دونویں لعل بھخن
اوہدی دھنی ٹنگ شرابدی جتھے عاشق گھٹ بھرن
اوہدے پٹ دو چنن گیلیاں کھیہ کھیہ مشک چھڈن
زہر چڑھائیے زہر تے فیر عاشق کیوں جون
ایس کستوری دی بھار نوں حاقطا مرزے لائی سن

۱۳۔

کھیوے ماہنی وڑدیاں اک صورت نظر پئی
ذات پری دی استری جٹی ہو گئی
اوہدی نی شکاری جھٹلے ویہندیاں جان لئی
اوس بھر اکھیں جت ویکھیا جندیں کھیت رہی

۱۴۔

اوہدی کایا بنی پلٹنی وچ کٹھیالی ڈھال
جویں سچے وچ سنیاریاں سوناں پایا گال
رکھ دگراسان تے اوہنوں کیتی تیز لوہار
اوہدیاں اکھیں پنبل والیاں کہو توں کت ہندال
اوہ وچ سیاں دے کھیڈ دی اوہدا ہافظ حسن کمال
جٹاں پھل لپٹیا وچ بھورے پا رومال

۱۵۔

مرزے دے حسن دی تعریف

منیں کھرل قدیم تھیں وڈے ساکاں نال
مرزا نکڑا ہندا پیار نال پلیا گھر ننھال
اسدی صورت اتے حسن دا آہا روپ کمال
ویکھ سیالیں اوسنوں ہو ہو پون نہال

۱۶۔

مرزے دی جوانی

مرزے چڑھی خماری حسندی ہویا آء جوان
اوہدے خونی نین نثارچی عشق جھڑائے سان
جوین رت کلیجؤں دل دا گوشت کھان
داد سیالاں دے اوس پاس ہل آون ہک جان

۱۷۔
صاحباں دا اکھ مٹکا

صاحباں چوری مرزے کھرل ول دلدی کرے نگاہ
نین وچولے دوہاندے دیون گھڑت سناہ
عشق کمائیے حال میں ہوون نیں گواہ
ککھیں اگ چھپائیے آخر بھڑ کے بھاہ

۱۸۔

صاحباں دی بے کلی

برہوں پیائی سی گھول کے صاحباں نوں پریم جڑی
باجھوں مرزے کھرل دے کوکے سڑی سڑی
سولاں گھٹاں جھڑائیاں لاون نین جھڑی
سنجیں عشق لا باولی اچن چیت پھڑی

۱۹۔

صاحباں دی زاری

صاحباں چتیک مرزے کھرل دی کھجی سلھ دھے
ربا کیہ جاناں کیہ ورتسی الہ الہ کرین بہے
ایہا روز میثاق دے میرے مستک قلم وہے
لائی اے بازی عشقدی ویکھاں پاسہ کدیں ڈھے

۲۰۔

صاحباں دا سنگار

صاحباں زلفاں دی لائی جا لکی سر مئیوں رنجک پا
ماری مرزے کھرل نوں گئی کلیجہ کھائ
اوس لوہ لیا دل جٹ دا آہ کریندا آہ
اوس بھن کلیجہ نکلے نین تفنگ بلائ





Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels