Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> مرزا صاحباں >> مرزا صاحباں - حافظ برخوردار >> مرزا صاحباں بند 21-30

مرزا صاحباں بند 21-30

حافظ برخوردار
February 8th, 2008



21۔

دو ولاہیج

دکھ دولیں مورچے کرن لوائیے نین
اوس چھتے اوس مہنڈیاں اکو جیہا سین
صاحباں دا مرزے کھرل نیں مار لیا سی پہن
سول آیوس گھٹ بنھ کے نس گئے سکھ چین

22۔

صاحباں مرزے کھرل دا ہویائی بہت پیار
مرزا دندا پاسنیں دو ندیاں وچکار
نیلی آئی زوم تے کاہی سندل بار
اوس جنگی لائے کپڑے نالے خوب ہتھار

23۔

روانگی مرزا

مرزا ٹریا راویوں کر کے پڑھنے دی نیت
پنج روپئے پنج روڑیاں لئی نذر مسیت
صاحباں تے میں پڑھناں پڑھناں ٹھیکو ٹھیک

24۔
مرزا گھروں سوار ہو نانکے ترے نرول
ماں آکھے بچہ نیوں کے کریں سلام موں تھیں مٹھا بول
مرزے دا سر چمن ماسیاں پانی پیون گھول
کھنڈ ملائی ددھ دے دیہن پیالے جھول

25۔

صاحباں دا سن کے آوناں

ترنجن اندر صاحباں لٹکے وانگ کلی
پریاں توشہ پرے چھند سیالاں دے سنگ رلی
سرخی غازے پان چوپ خونی رتک ملی
اوہ چڑھ کے تیرنگاہ دا مارن ہار کھلی
مرزے دی نیلی ساہمنے ایسے راہ ٹھلی
صاحباں چھڈ سیالیں یار دے استقبال کھلی
ہست دلاں وچ پیلیا کر کے علی علی
نین ملے گل لگ کے کھنڈے کھیر رلی

26۔

مقولہ شاعر

ایہہ پتر وہنجل خان دا سوہنیاں دا سلطان
تیرے نالوں اوکڑا ہے اوہ خوب جوان
اٹھ کے ویکھ لے صاحباں مڑ جم جم پڑھیں قرآن
ایہہ بیٹا رائے وہنجل دا اوہدا ناں ایں مرزا خان
صورت دا سوہناں تدھ تھیں سوہنیاں دا سلطان
کوئی لعل عجائب قیمتی اوائل عمر جوان
اٹھ کے اکھیں ویکھ لے صاحباں مڑ پئی پڑھیں قرآن

27۔

صاحباں دا وراگ

اٹھ کھلوتی صاحباں جد نظریں پیا امیر
بیخود ہو کے جھڑ پئی جھل نیناں دے تیر
اوہنوں برہوں لائیاں کانیاں اوتھے عشق پڑھی تکبیر
حافظ دے لت کٹھی صاحباں اتے برہوں پڑھی تکبیر

28۔

ترنجن کھیڈے صاحباں دست سوہیندی ونگ
بھٹھی چڑھی پریم دی چو چو ہوے پتنگ
عشق مجازے کھرل دا چھپا لائیں انگ
چیتک مرزے یار دا سوہا چڑھیں رنگ

29۔

مقولہ شاعر

حافظ ہاتھی عشق سندوریا پوش کریندا پوش
وانگوں مٹ شرابدے صاحباں اندر جوش
اوہ چشم پیالے یار دے پی کے بہے بیہوش
سکن سول فراق غم نقل کریندے نوش

30۔

صاحباں دا ورلاپ
مار نہ ملاں جھانبڑاں تتیاں نوں نہ تا
اگلا پڑھیا بھل گیا سانوں عشقے دتا سبق پڑھا
ہن تاروگی گھر عشق دے ویداں نوں خبر نہ کائ
ماں بھولی کیہ جان دی جس آندے وید بلائ
تینوں میاں میاں کر آکھدی تیرا رکھدی شرم حیا
سانوں کٹھیاں رت نہیں آؤندی توڑے ویکھ لے چھری چلا












Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels