Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> مرزا صاحباں >> مرزا صاحباں - حافظ برخوردار >> مرزا صاحباں 71- 80

مرزا صاحباں 71- 80

حافظ برخوردار
February 13th, 2008



71۔

بھلی وت نی ایں صاحباں کیوں بیٹھی
مرن چکور اتاولے کیہ پرواہ سی چن
بے پرواہی کھرل دی جو چاہے سر تے جھل
جٹ دی نکیاں ہندیاں دی دوستی اوس منوں وساری گل

72 ۔

مرزے نوں خط ملناں

کاتی وانگ خلیل دے کرموں دست پھڑی
اوس لائی دہی کھرل دی اگے دکھاں نال بھری
اوہدی جند قلب نوں چھڈ گئی انحد جاوڑی
اوہنوں پیا آوازا ہاتفوں تدے خبر ہوئی
خبر ہوئی جبرائیل نوں اوس جاندی دی جند پھڑی

73 ۔

صاحباں دیاں دعائیں

مندری آسلیمان دی جیہڑی بخش ہوئی بلقیس
اوہدا سے ورہیاں روح قالبوں پیا قدرت نال دسیس
جٹی چڑھ گئی وچ فلک دے داناں باد پیادسیں
اوہ جھک پئی وچ سجود دے گل جاتی حق تحقیق

74 ۔

مرزے دا خط پڑھناں

مرزے پڑھ کے خط محبوب دا مہت نہ ڈٹھا وار
متھے آہیاں جوکنیں جاں ہویا اوہ ہشیار
رن ملی اوس چڑھدیاں شگن ہویا بریار
پر عاشق ڈرن نہ موت تھیں ورتی ورتن ہار
مینوں پوہتا خط معشوق دا وسر گیا گھر بار
کپڑے ملے نہیں پہننے لینیں نہیں ملے ہتھیار
حافظ نیلی آندی زین کر مرزا ترت ہویا اسوار
مرزا چودھری داناں باد دا ہویا کھیوے طرف تیار
خرچ جدھاسی نت دا اک لکھ چوی ہزار
میں سر پر کھیوے جاوناں میرا صاحباں نال قرار

75 ۔

مرزے دی تیاری

ستا مرزا اٹھیا کیتا یاد خدا
اوس حکم کیتا نفرنوں پانی گرم کرا
اوہ نہاتا گھڑی پلٹ کے کعبے سیس نوا
اوہ پہنیں زری تے بافتے اتے بند رہے جڑلا
ٹر پیا سیالاں دے دیس نوں خواجہ پیر منا
ڈیگر راہی ہووناں پوناں لمیں راہ
ایہہ نقارے کوچ دے حافظا کیتی گئے وجا

76 ۔

ماں دی مت

چڑھدے مرزے خان نوں متیں دے کھلی
جتول لائیے دوستی نہ جائیے اوس گلی
اگے کڑاہ تپ گئے تیل دے توں ادے نہ لت دھری
اگے ہاتھی سند دریا عشق دا کردا علی علی
دونہاں پڑاں وچ آئیکے حافظا کیوں ہندائیں ذری ذری

77

مقولہ شاعر

چکی پھر دی ویکھ کے نانک دتا رو
دونہوں پڑاں وچ آن کے خالی گیا نہ کو
مانی دے گل لگیاں حافظا جو اللہ کرے سو ہو

78

ماں دی فریاد

چڑھدے مرزے خان نوں ماں کرے فریاد
کھیوے ٹریائیں بچیا مینوں کر برباد
رہو اکھیں دے ساہمنے اندر داناں باد
پچھا دے نہ جائیں مرزیا ڈاھڈی سک اولاد

79۔

جواب مرزا

مرزا ترت جواب سناؤ ندا کر کے ادب آداب
رکھ مائے دل حونصلہ آنواں دوڑ شتاب
پہر چوتھے نوں آؤ ساں نہ کر جی خراب
ہجر صاحباں دے ساڑیا میرا جگر کباب

80 ۔

ماں دی سد

چڑھدے مرزے خان نوں ماں مریندی سد
پتر مرزا نہوں صاحباں مینوں سوہبھا دیسی جگ
اکے نہ چاڑھیں بیل تے اکے نہ آنویں چھڈ
پچھے پی
أاں نوں چھوڑ کے دارے بہن نلج
دیکھ تماشہ حافظا مکیوں پرانہہ نہ حج
مینوں برچھی لگی عشق دی میرا رہیا نہ گوڈا ہڈ
پڑھ لے کلمہ دین دا تینوں بانہاں پھڑی دی لج


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels