Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> مرزا صاحباں >> مرزا صاحباں - حافظ برخوردار >> مرزا صاحباں بند 81-90

مرزا صاحباں بند 81-90

حافظ برخوردار
February 13th, 2008



81

بھین دی زاری

بھین اٹھی لڑ چمبڑی توں سن ویر بھرا
جامہ تیرے کاج دا رکھیا خوب رنگا
زریں جامہ پہن کے مینوں گلیئں لٹک وکھا
لونگ تے کیسر گھول کے کتے سبھ چھنکا
واسطہ گھتوں رب دا توں کھیوے شہر نہ جا

82

بھین اٹھی لڑ چمبڑی توں مینوں کتے لڑ لا
میں صاحباں جہیاں رانیاں لکھ دیساں پرناہ
آون گے لے جاہن گے مینوں کھڑن ڈولی وچ پا
تیرے ڈھونڈن گے دارے بیٹھکاں کتھے کھرلاں دا بادشاہ
تینوں واسطہ گھتنی آں رب دا اجوکا وار کھنجا
جویں شہیداں نوں کربلا تویں کھیوا ساڈے جا

83 ۔

جواب مرزا

مندا کیتا ای چھتے توں کیتی اے گل بری
میں عشق نوں کجھ نہیں جان دا میں وگیا کر کھری
میں سر پر سیالیں جاوناں توڑے ماریں پیٹ چھری

84 ۔

جواب چھتی

میں ستی سفناں واچیا سفناں بری بلا
تیرے تھم کڑکا ماریو تیرا مہل ڈگا گرڑا
بالا چھجہ جھڑ پیا جس تے توں لئیں ہوا
میرے ہتھ اٹیرن رنگلا پئی گن گن اٹیاں لاہ
اک بھورا جیہا جھوڑا سیالاں کٹھا جا
اوہناں بوٹی بوٹی کرلئی وت لئے کباب بنا
بھین مٹھی میٹ کے بہہ گئی لیندی اہبھے ساہ
کوئی مسافر مر گیا اوہدی کے نہ ماری ڈھاہ
اک کالی جیہی استری جیہڑی کھلی سرہاندی آ
تینوں واسطہ گھتاں رب دا توں کھیوے شہر نہ جا

85

ونجھلی دی مت


چڑھدے مرزے خان نوں جٹ ونجھل دیندا مت
بھٹھ رناں دی دوستی کھری جنھاں دی مت
ہس کے لاون یاریاں روکے دیون دس
لکھیں ہتھ نہ آوندی دانشمنداں دی مت
جھلیں چلدے شیر نوں کسے نہ ماری نتھ
اوہ ہتھیں یار کوہاندیاں دے چھاتی تے لت
ریتوں کوٹ نہیں اسرے کوڑ نہ ہندے سچ

86

بھائی دا روکناں

بھائی آیا چل کے عرض بھرا دی من
جگرا چلیائیں کپ کے سانجھاں چلیائیں بھن
نہ بھائی نہ مارئیے نہ پردیس وچھن
جدھے پچھے ٹر چلیائیں اوہ کون سیالیں رن

87 ۔

توں مرزا میں سر جا میری جوڑی بھنگ نہ پا
میں ورہے راتیں دیاں بھنگاں دتیاں سبھ اڈا
میں تینوں واسطہ گھتاں ربدا اجوکا وار گھا
صاحباں جہیاں رانیاں تینوں لکھ دیساں پرناہ

88

سوال جواب قاضی تے سرجا

آ سر جا ساہیا کیوں کھلائیں توں ہو کے دلگیر
قاضی وچھڑ کے ٹر پیا میرا نکڑا ویر
کائی ویکھ کتاب تفسیر دی کائی دس مینوں تدبیر
بھنی ہوئی ڈٹھی مٹکی ڈہلی ہوئی ڈٹھی کھیر
ایہہ ریہندا ای تے رکھ لے بھلکے وار بھلیرا ویر

89 ۔

جواب مرزا

مرزا آکھے کھڑیا باغ کشمیر تھیں ہل اوئے سیالو ہل
چنوں آہی چودھویں جٹی جس میں گل
اوہدا ناں رکھیو نیں صاحباں جیوں سوسن دا پھل
صاحباں وست بازار دی حافظا مرزے لئی اے مل

90 ۔

جواب چھتی

میں جاندے نوں نہیں سوہوڑدی تیری مدد ہون پیر
توں سودے کتے من دے وچ دھر کے نین وکیل
تینوں وحی وگا لئیاں کانیاں عزرائیل پائے زنجیر
اوہ بھیناں نہیں جیوندیاں وچھڑے جنھاں دے ویر
دے کے کنڈ توں ٹرپیوں لا کلیجے نوں تیر
جیوں جیوں تیر نہیں رڑ کدے میرے ہندی کلیجے پیڑ
تریوے راضی رکھنے عاش بھور فقیر
نکلی لنب تیرے عشقدی سڑ گئے جنڈ کریر
اوکھے ویلے سینویاں حافظا بابا چشتی پیر
مانواں نوں میلیں بچڑے بھیناں نوں میلیں ویر


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels