Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> مرزا صاحباں >> مرزا صاحباں - حافظ برخوردار >> کلام مرزا صاحباں بند 121-130

کلام مرزا صاحباں بند 121-130

حافظ برخوردار
February 13th, 2008



121

کلام مرزا

دس کھاں چچ ونوٹیا تیرے وچ کنگوبیر
میرے بھوچھن دالڑ اڑ گیا میری قسمت دے وچ پھیر
اڑیائی تے صاحباں ریہن دے اگانہاں دی بھوچھن ڈھیر
اسی چلئے داناں باد نوں صاحباں توں اگلا پندھ نبیڑ

122

کلام صاحباں

صاحباں آکھے شیریں نوں غم فرہاد ہوئی ذری ذری
لوکاں نوں شغل ویاہ دا میری جند قہر توں پھڑی
اک صاحباں دو بیڑیاں پیر دھراں کیہڑی کڑی
دونویں کھلیاں آہمنوں ساہمنے میری بھنیں کون اڑی
دعا کرونی سہلیو میں مرزے دی بیل چڑھی
میں بکرا دیساں پیر دا خیریں داناں باد وڑی

123

رات چنے دی چاننی وت چوراں وٹ لئی چپ
ہن تیرے میرے عشق دی کوئی نہ رہ گئی لک
عشق سکالے آدمی برف سکالے رکھ
چھانویں بہئے اوسدی جیہڑا ہتھیں لائیے رکھ
لے چل داناں باد نوں مرزیا جاہن تکاوے مک

124

چناں وے تیرا چانناں تاریا وے تیری لو
میں رج گلاں نہ کیتیاں ویہڑے وچ کھلو
سجناں کنڈاں چادتیاں نیناں دتا رو
میں و اسطہ گھت نی آں رب دا نیلی نیڑے ڈھو

125

اوہ جے دسدیاں ٹاہلیاں وت خان کھیوے دے رکھ
اوتھے عشق پنگھوڑا اڈیا جھوٹے دیندے نی دکھ
سر کلوتر ذکرئیے کہی وٹی سو چپ
شیخ سلیمان نوں سٹیونے تخت توں جاپیا کسے مکھ
لے چل داناں باد نوں وت جاہن تکاوے مک

126

ویکھ اوہ جے دسدیاں ٹاہلیاں ودھ ودھ ہوئیاں جھنگ
اوہنا ندے ہیٹھ گلیاں تازی بھور جنہاندے رنگ
گھتن نہیں دیندیاں کاٹھیاں لین نہ دیندیاں تنگ
صاحباں کھیڈے وچ سہلیاں راجے دی دھی ملنگ
اوہ نظر کرے وچ بھوچھناں اوہدے ہتھ سونے دی ونگ

127

مقولہ شاعر

چٹی چادر ماہنیاں لائیائی صاحباں داگ
جنھاں امید پلاؤ دی تنھاں ہتھ نہ لگا ساگ
ماتم ہوئے مجلسیں جتھے بولن ریہائی نہ واگ
تائیاں ڈوماں اچوی تنھای ہتھ نہ لگا لاگ

128

شور غوغا

شہر کھیوے ہے غلغلہ نماں نماں شور
کھارے چڑھدی نوں لے گیا کھرل حرامی چور
ترنکن نین سوانیاں کجھ نہ چلدا زور
مر مر کے پے پوندئے کھیوے تائیں لور

129

مقولہ شاعر

یارو اکبر جیڈ نہ باتشاہ کوجٹ کھیوے جیڈ نہ تران
پر کالا کیتا جگ وچ صاحباں کڑی اجان
کوکاں پاندے نکلے خان اتے سلطان
یارو شرم نہ ریہندی ماہنیاں جے جاندا نہ پرتان

130

ماہنیاں دی چڑھت

مھڑیکا چڑھیا ماہنیاں ڈھولاں گھتی ڈنڈ
سیناں دھرت اچھاہیا بارے پیؤ گھمنڈ
لک تڑنا ہے ڈھولدا مارن پور سمند
فوجاں گھٹاں ہنیریاں جیوں ساون دی پھنڈ


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels